[新加坡] 新加坡總統府開放日 The Istana Open House

農曆新年前同大家介紹過結霜橋叻沙，今個星期繼續同大家介紹下新加坡嘅好去處～不過今次要同大家介紹嘅景點就需要些少運氣先至能夠去到！事關呢個地方一年只有五日對外開放，唔係你話幾時去就幾時去㗎～講緊嘅就係 The Istana，亦即係新加坡總統府！

The Istana 呢個名嚟係馬來語，係「宮殿」咁嘅意思。喺殖民地時代，呢度只係總督府，所以只係命名為 Government House of Singapore，要去到1959年實施自治嘅時候先更改至現時嘅名字～Istana 一詞其實相當常見，大家喺馬來西亞都會見到唔少嘅 Istana，因為各州嘅統治者，又稱為「蘇丹」，就係住喺宮殿入面啦！

新加坡總統府一年只係開放五日，分別係喺農曆新年假期期間、勞動節 (5月1日)、開齋節 (Hari Raya Puasa)、國慶日 (8月9日) 以及排燈節 (Deepavali)。相信農曆新年以及國慶當日會係香港朋友比較大機會去到參觀嘅日子，話晒兩個日子都係喺傳統旅遊旺季入面。

總統府位於烏節路 (Orchard Road)，近住多美歌地鐵站 (Dhoby Ghaut)，交通非常方便，好容易編排入行程。參觀完之後行去索美塞 (Somerset) 嗰邊繼續行街都唔使10分鐘，又或者可以搭車去其他地方都得～齋講地理位置就已經同佢周邊嘅其他建築形成強烈對比，同附近嘅福康寧公園一齊成為新加坡市中心嘅小綠洲！

沿正門入場首先會檢查證件，然後就要買飛，再經過埋安全檢查先可以進入總統府嘅範圍～安全檢查比照其他大型活動嘅安檢措施，需要檢查隨身行李，所以一啲踩界嘅物品，例如尖銳物件或者易燃物品 (例如打火機) 就唔好帶埋去啦，免得被沒收！

總統府園地結構簡單，一條主要車路通往山丘頂嘅主建築，傍邊就係一片又一片嘅大草地。唔同部份各有主題，例如有天鵝湖、日式庭園等等～最簡單當然就係順著入場人潮一路行！當日我就沿人潮順時針咁行，靠左上到去主建築度。左方同時會見到另一座法定古蹟－斯里淡馬錫 (Sri Temasek)～呢座係總理辦公室，喺開放日嘅時候並唔會對外開放，所以只能夠遙望～

途中大家會見到有唔少攤位進行籌款活動，另外指定時間會有不同表演單位表演，亦都可以睇守衛交更嘅儀式～仲有，據講總統本人不時都會喺開放日出嚟與民同樂，大家運氣好嘅話話唔定會遇到佢～

主建築需要另外付費入場，而開放嘅範圍就限定於地下樓層嘅幾間廳房。室內唔能夠影相，所以只能夠文字描述一下裡面嘅展覽。展品大多都係由各國領導人或者重要人物送贈俾新加坡嘅禮物，當中包括雕塑、瓷器、畫作等等。因為送贈嘅國家嚟自世界各地，所以大家會見到唔同風格嘅禮物，有啲零舍金碧輝煌，又有一啲比較低調內斂～

總統府開放嘅範圍唔算好大，所以參觀嘅時候會有走馬看花嘅感覺，少啲能夠深入了解嘅地方～如果大家抱住見識下嘅心態嚟會比較好，因為呢個都係一個幾獨特嘅體驗活動，唔係成日都可以遇得到！

今次嘅介紹暫告一段落～如果您有任何關於旅遊或者行程上嘅問題，請隨便留言或者Inbox問，我會盡力解答㗎～

新加坡總統府官網：www.istana.gov.sg

開放日 (詳情)：
每年農曆新年假期、勞動節、開齋節 (Hari Raya Puasa)、國慶日及排燈節 (Deepavali)，各一日，合共五日
開放日開放時間：08:30 至 18:00 (最後入場時間: 17:30

入場費 (詳情)：
新加坡國民及永久居民免費入場，參觀主建築額外收費新幣 2 元
其他人士收費新幣 2 元 (大小同價)，參觀主建築額外收費新幣 4 元 (小童半價)

地址：Orchard Road, Singapore 238823

交通：乘搭新加坡地鐵南北線 (North South Line)、東北線 (North East Line) 或 環線 (Circle Line) 前往 多美歌站 (Dhoby Ghaut, NS24/NE6/CC1)，沿 C 出口進入 Plaza Singapura 再從烏節路方向出口離開，右轉並步行約3分鐘即達。