旅遊新聞

[航空消息] 阿拉斯加航空宣佈於2021年夏季加盟寰宇一家

阿拉斯加航空 加入 寰宇一家

阿拉斯加航空 (Alaska Airlines) 對喺亞洲嘅我哋嚟講,好可能係因為佢哋嘅飛行里數計劃先至會認識佢哋~佢哋一直都未有加入任何航空聯盟,所以佢哋好自由咁同嚟自五湖四海嘅航空公司合作。不過嚟講就可能無呢支歌仔唱,事關佢哋剛啱宣佈要同美國航空 (American Airlines) 結盟,並且準備加入寰宇一家 (oneworld) 啦!

根據阿拉斯加航空喺官網嘅公告,佢哋預計喺出年2021年嘅夏天加入寰宇一家,屆時將會容許自家會員兌換所有寰宇一家成員嘅航班,並且向其他寰宇一家航空公司嘅高級會員提供相應嘅禮遇。

至於同美國航空結盟一事就會即時生效,阿拉斯加航空嘅里數可以即時用嚟兌換美國航空嘅所有航班~今個春天內仲會開始容許會員喺美國航空嘅全部航班上累積里數添。另外,美國航空會開辦由阿拉斯加航空樞紐-西雅圖出發,不停站直飛印度班加羅爾同英國倫敦嘅航班~

阿拉斯加航空加入寰宇一家的時間表
阿拉斯加航空加盟時間表(來源:阿拉斯加航空官網

阿拉斯加航空現時同十七間航空公司有合作協議,其中七間係寰宇一家嘅成員,相當於大半個聯盟嘅成員啦~所以加入寰宇一家都好正常。

喺阿拉斯加航空加入之後,相信佢哋會放鬆兌換機票時對於路線嘅規定。因為佢哋嘅獎勵機票表格係以區域嚟劃分,所以喺兌換機票嘅時候有唔少關於飛行路線嘅限制。

以兌換國泰嘅航班為例,兌換由亞洲前往歐洲及澳洲嘅航班,係限制咗只能夠由香港出發,而不能夠由其他亞洲航點開始行程。要由日本、台灣等地出發就需要另外再買或者換多一張機票。

阿拉斯加航空獎勵機票兌換標準 - 亞洲往來歐洲
阿拉斯加航空獎勵機票兌換標準 - 亞洲往來歐洲(圖片攝取自阿拉斯加航空官網

但如果你係兌換由亞洲前往北美嘅獎勵機票就唔同,可以由亞洲區任何一點出發,再經由香港前往北美洲。亦都即係話,無論你由曼谷出發同由香港出發,兌換機票所需嘅里數都係一樣嘅,亦都唔需要自己另外安排機票返香港上機。

阿拉斯加航空獎勵機票兌換標準 - 亞洲往來美國
阿拉斯加航空獎勵機票兌換標準 - 亞洲往來美國(圖片攝取自阿拉斯加航空官網

隨住佢哋加入聯盟,大概可以估計佢哋會將獎勵機票重新定價,以便提供更準確咁計算每張獎勵機票所需嘅里數。加入咗聯盟之後,佢哋將會難以限制會員兌換指定嘅路線或者航班,大概唔能夠再用返現有嘅兌換標準。

唔單止係咁,另一樣相信會改變嘅,會係佢哋嘅累積標準。除咗可以兌換合作夥伴嘅航班之外,亦都可以喺搭乘合作夥伴嘅航班時累積里數。如果大家有留意「子艙位」嘅話,或者會知道國泰航空嘅「O」子艙位係屬於最平嘅票價種類,累積落亞洲萬里通 (Asia Miles) 係無分嘅~

亞洲萬里通里程累計標準 - 國泰航空
亞洲萬里通里程累計標準 - 國泰航空(圖片攝取自亞洲萬里通官網

但同樣嘅「O」子艙位,累積落阿拉斯加航空嘅 Mileage Plan 反而有相當於飛行距離 25% 嘅里數!除非佢哋嘅兌換標準升到離晒地,如果唔係,話晒換機票又抵啲,賺里數又容易啲,點解唔轉過去玩呀?但當一大班人一窩蜂咁轉過去嘅時候,佢又可以點樣為生喎?

阿拉斯加航空里程累計標準 - 國泰航空
阿拉斯加航空里程累計標準 - 國泰航空(圖片攝取自阿拉斯加航空官網

整體嚟講,阿拉斯加航空加入寰宇一家,對佢哋嚟講固之然係一件值得慶祝嘅事。至於對我哋一眾用家嚟講,係咪好事就真係要再觀察,睇下後續發展如何啦!

資料及封面圖片來源:阿拉斯加航空官方部落格 (Blog)

0 個留言於 “[航空消息] 阿拉斯加航空宣佈於2021年夏季加盟寰宇一家

發表回覆

你的電郵地址並不會被公開。 必要欄位標記為 *