優惠情報

[酒店情報] 購買希爾頓榮譽客會 Hilton Honors 額外積分100%

希爾頓榮譽客會 (Hilton Honors) 不時都會推出買分優惠,而且通常都做買一送一~新一期優惠日前已經推出咗,八百蚊美金就有十六萬分啦!

今次優惠只要購買 10,000 分或以上,就會額外獎賞 100% 嘅積分。亦即係買一萬送一萬,買八萬送足八萬!間中有優惠會順便提升會員購買限額去到最多十六萬分,如果大家對希爾頓積分有大啲需求嘅話,不妨等等睇吓下次優惠~

以買盡今次嘅限額計算,八百蚊美金可以得到總數十六萬積分,亦即係每分價值 0.5 美仙,又或者港幣 $0.0388。持有希爾頓榮譽客會銀卡或以上嘅會員兌換獎勵住宿嘅時候可以享有住四送一優惠,俾四晚嘅分數,第五晚就免費,咁就再抵玩啲~

優惠期間:即日起 至 2020年2月20日 12:59
詳情與條款及細則:hilton.com

一如其他買分優惠,唔建議大家喺無計劃下囤積積分。積分價值隨時都可以因為會籍規則改變而貶值。雖然係咁,最近希爾頓嘅會籍計劃都有啲好嘅變動值得同大家講講~

由2020年1月9號,希爾頓嘅積分會喺會員帳戶無活動後十五個月先失效,先前一年內無活動就會被取消,加多三個月寬限期俾大家。

另外,之前只有房價可以賺取希爾頓積分嘅四個品牌 - Hampton, Tru, Homewood Suites,以及 Home2 Suites ,依家就連其他消費項目都可以賺取希爾頓積分。

除此之外,會員同一時間可以由最多四間客房賺取希爾頓積分,之前只可以賺取最多兩間客房嘅積分。之前喺指定品牌同酒店限制會員賺取最多 100,000 基本積分嘅條例亦都取消。

仲有多一項值得留意嘅變動,就係現金+積分混合兌換住宿嘅時候,選擇俾現金嘅部份同樣可以賺取積分~至於抵唔抵玩就要自己計計數啦!

資料僅供參考,稅項及附加費或會有所變動,請以有關公司官網資料為準,或直接向有關單位確認。
所有優惠均需受有關條款及細則約束,請仔細參閱條款及細則並確保完全理解後始進行預訂或交易。

0 個留言於 “[酒店情報] 購買希爾頓榮譽客會 Hilton Honors 額外積分100%

發表回覆

你的電郵地址並不會被公開。 必要欄位標記為 *