更新：2020年5月31日（修訂各間酒店開業日期）
注意：
因應武漢肺炎（新型冠狀病毒 COVID－19）疫情，全球多國仍然維持出入境限制及人流管理措施。有關措施可能隨時有所更改，故此預訂前應先留意有關更改或取消的條款及細則。除此之外，酒店亦可能因防疫或營運需要，更改開業日期，或修訂提供的服務及設施，文章內容只供參考。
東京周邊有咁多地方好玩，有時間嘅話相信大家都一定會去埋近郊～可能會係近近哋即日來回橫濱，又或者去日光遊山玩水！
受惠奧運熱潮，神奈川、茨城、千葉等東京周邊嘅縣市都有唔少新酒店登場～有國際奢華品牌，亦都有經濟實惠嘅選擇～
今次先介紹一部分2020年上半年關東地區開幕嘅新酒店，等大家春夏去玩嘅時候有得試！即刻睇睇有邊九間開張啦～
- 1月開幕
- 3月開幕
- 4月開幕
- 5月開幕
- 6月開幕
- 7月開幕
- 8月開幕
- 2020年開幕
2020年1月24日開業
箱根強羅英迪格酒店
Hotel Indigo Hakone Gora
IHG 旗下嘅英迪格酒店 (Hotel Indigo) 今年將會首度登陸日本！英迪格系列主力融入每個目的地嘅歷史同人文故事，所以每一間英迪格酒店都好唔一樣㗎～今次佢哋就選擇落戶箱根，加入成為溫泉酒店嘅一份子！
酒店一共設有98間房，其中10間屬於套房。房間景觀大致以山景同河景兩種為主，其中就以河景房佔大多數～最重要嘅係每間房都配備私人溫泉風呂！想熱鬧啲嘅話亦都可以去到大浴池嗰邊～呢度嘅客房面積由328呎起，算幾闊落～
地址：神奈川縣足柄下郡箱根町木賀924-1
鄰近車站：箱根登山線 強羅站
電話：+81 06-6347-1240
立即訂房：Agoda / Booking.com / 酒店官網 (英文)
參考價錢：連稅每晚約港幣 3,247 元
2020年3月19日開業
星野度假村 BEB5 土浦
Hoshino Resorts BEB5 Tsuchiura
星野集團嘅最新品牌 BEB5，今年將會開辦第二間酒店，開喺茨城嘅土浦站外～BEB5 系列主打青年市場，理念係要打造「無拘無束、猶如逗留好友家中般的飯店」。所以每間 BEB5 都會有專屬嘅社交區域，等三五知己以及同路人聚埋一齊！
BEB5 土浦係星野集團旗下第一間以單車為主題嘅酒店，順帶推廣單車旅行，所以部份房間都特別設計成適合停泊單車添！除咗CYCLE Room 之外，佢哋仲有其他類型嘅客房，適合唔同人數組合～客房面積由252呎起。
地址：茨城縣土浦市有明町1-30
鄰近車站：JR 常磐線 土浦站
電話：+81 0570-073-022 (預約專用)
立即訂房：Agoda / Booking.com / 酒店官網
參考價錢：連稅每晚約港幣 769 元
2020年3月26日開業
MALIBU HOTEL
想享受陽光與海灘嘅朋友，或者唔會第一時間諗起日本～不過想渡假都唔係無好選擇㗎！位於逗子市嘅海洋俱樂部內，有新開嘅 MALIBU HOTEL ～懷抱著相模灣嘅佢，話唔定就係你搵緊嘅渡假村～
酒店只係設有11間套房，由 Alexander Design 設計。每間套房都配備露台或花園，間間都有至少 538 呎大，最大嘅一間更加去到超過 1,500 呎大添！作為寵物友善嘅酒店，想帶埋你既愛寵一齊去住都無問題～
地址：神奈川縣逗子市小坪五丁目23-16
鄰近車站：JR 鎌倉站 及 JR 逗子站
電話：+81 0467-23-007
立即訂房：酒店官網 (英文)
參考價錢：連稅每晚約 49,205 日圓 (折合約港幣 3,481 元)
2020年4月24日開業
鎌倉大都會大酒店
Hotel Metropolitan Kamakura
大都會系列酒店全部都好近車站，交通夠晒方便，皆因佢哋屬 JR 東日本旗下～今次佢哋南下去到鎌倉，開佢哋喺神奈川嘅第一間大都會大酒店，離開鎌倉站兩分鐘路程～
為咗融入鎌倉嘅環境，酒店將入口打造成庭園，所以由踏入門口開始，到入到酒店房，佢每個角落都呼應住古都氣氛～除此之外，酒店同無印良品合作，除咗引入細細間嘅MUJIcom，亦都將早餐交由Café&Meal MUJI 提供～
客房一共分成十二種房型，部份客房仲可以睇到喺大街嘅地標之一－二之鳥居！客房面積由215呎起。
地址：神奈川縣鎌倉市小町一丁目 8-1
鄰近車站：JR 鎌倉站
電話：+81 0467-60-1250 (預約專用)
立即訂房：一休.com / 酒店官網 (英文)
參考價錢：連稅每晚約港幣 893 元
2020年5月18日開業
川崎大都會大酒店
Hotel Metropolitan Kawasaki
大都會大酒店除咗會喺四月份喺鎌倉開幕之外，五月份會再喺川崎開多間，離開川崎站兩分鐘路程～川崎非常近羽田機場，搭京急只係大約二十分鐘左右，出入東京市中心都好方便！
酒店唔單止位置照顧晒商務同休閒旅客，就連設施都一樣照顧得幾周到～健身室、會議室以及洗衣房都有齊！洗衣室仲特登設計成一個可以俾住客交流嘅空間添～
全酒店合共303間房，絕大部分客房屬雙人房以及雙床房，只有一間套房。每間房都係用蓆夢思床褥同埋 4K Smart TV，夜晚可以輕鬆睇戲休息～呢度就算係最細嘅客房，亦都有248呎大㗎～
地址：神奈川縣川崎市幸區大宮町 1-5
鄰近車站：JR 川崎站
電話：+81 03-5954-1070 (開業籌備辦公室)
立即訂房：Agoda / Booking.com / 酒店官網 (英文)
參考價錢：連稅每晚約港幣 1,003 元
2020年6月5日開業 (原定2020年4月7日開業)
橫濱東急 REI 酒店
Yokohama Tokyu REI Hotel
東急 REI 係東急酒店集團嘅商務品牌，不過都一樣可以好高質㗎！嚟緊喺橫濱開業嘅呢間就係好好嘅例子啦～先講位置，酒店離開最近嘅車站只係兩分鐘路程左右～
酒店以「WARP」為主題，帶大家穿越古今未來！大堂設有兩米大嘅月亮裝置，營造出科幻嘅感覺，等大家一入到酒店就好似去咗另一個空間～旁邊設有休息室俾大家傾偈同做嘢～
234間客房分成雙人房同雙床房兩大類，較高級嘅雙床房最多可以俾三人一房甚至係四人一房㗎～可以留意到房內嘅配色比較柔和，同大堂再形成另一個對比～房間面積由207呎起。
地址：神奈川縣横浜市西區みなとみらい四丁目
鄰近車站：橫濱高速鐵道港未來線 新高島站
電話：+81 045-663-0109
立即訂房：Agoda / 酒店官網 (英文)
參考價錢：連稅每晚約港幣 1,086 元
2020年7月開業 (預計，原定2020年5月22日開業)
日光麗思卡爾頓酒店
The Ritz-Carlton Nikko
日本嘅第五間 Ritz-Carlton，今年喺日光開幕～今次係佢哋第一次深入日本山區，選址位於華嚴瀑布附近！位置距離日光車站大約40分鐘車程，適合到日光深度遊嘅遊客～
濃濃和風除咗能夠係佢嘅裝潢睇得到之外，亦都能夠從佢嘅設施中散發出嚟～皆因呢度係第一間配備正宗日本溫泉嘅 Ritz-Carlton，齊備嘅露天溫泉、室內溫泉同硫磺溫泉！
酒店一共設有 94 間客房同套房，客房間間都有614呎大。另外仲有九間過千呎嘅中禪寺湖景套房，以及只得一間，近三千呎大嘅麗思卡爾頓套房！房間分別望山景以及中禪寺湖景，各有好處～
地址：栃木縣日光市中宮祠 2482
公共交通：距離 日光站 及 東武日光站 約 40 分鐘車程
電話：+81 02-8825-6666
酒店官網：按此進入 (英文)
參考價錢：連稅每晚約港幣 6,154 元
2020年8月1日開業 (預計，原定2020年5月1日開業)
新橫濱最佳西方 Fino 酒店
Best Western Hotel Fino Shin-Yokohama
橫濱今年將會有第二間 Best Western 登場，落戶新橫濱站附近，離開車站大約五分鐘路程。新橫濱站一帶雖然唔及橫濱站嗰邊咁璀璨繁華，但都有唔少地標喺附近，例如係「拉麵博物館」以及「橫濱日產體育場」～
酒店提供四種不同房型，其中一款係無障礙單人客房。較高級嘅行政雙人房可以加床供三人一房。雙人房面積有163呎大，而雙床房面積就由194呎起。
地址：神奈川縣横浜市港北區新横浜二丁目 2-9
鄰近車站：JR、橫濱市營地下鐵藍線 新橫濱站
電話：+81 045-474-0171 (開業籌備辦公室)
立即訂房：Agoda / Booking.com / 酒店官網 (日文)
參考價錢：連稅每晚約港幣 579 元
2020年開業 (延期，原定2020年6月17日開業)
橫濱卡哈拉酒店及度假村
The Kahala Hotel & Resort Yokohama
嚟自美國夏威夷嘅卡哈拉酒店 (The Kahala)，今年將會衝出夏威夷，去到橫濱開佢哋第一間嘅海外酒店！酒店位於臨港公園旁，並且設有行人天橋連接鄰近嘅新高島站。
外形以「海浪」為靈感，再用上玻璃外牆仿照海水反光，充分融入橫濱海灣嘅環境～酒店內部就以「水晶」為主題，豪華得嚟又唔會好老土～作為度假村，呢度設施自然唔會少，齊備泳池、大浴場、健身室同 Spa～
客房方面，146間房一共分成七大類，其中三款係套房。客房面積偏大，就算係入門級嘅客房都已經有507呎大，套房甚至可以上到接近千三呎㗎！
地址：神奈川縣横浜市西區みなとみらい一丁目 1-3
鄰近車站：橫濱高速鐵道港未來線 新高島站
電話：+81 045-522-0088
立即訂房：Agoda / Booking.com / 酒店官網
參考價錢：連稅每晚約港幣 3,736 元
今次先介紹住以上九間酒店俾大家，嚟緊再同大家睇睇世界各地嘅新酒店，大家記得留意啦～
相關文章：
[日本東京] 2020年精選新酒店巡禮－淺草 新宿 上野 東京各區
[日本東京] 2019年下半年精選新酒店巡禮
[日本] 2019年東京近郊精選新酒店巡禮
封面圖片由日光麗思卡爾頓酒店提供，特此鳴謝。
0 個留言於 “[日本] 2020年關東精選新酒店巡禮－橫濱 箱根 日光 東京周邊”