目的地介紹

[日本京都] 2019年下半年精選新酒店巡禮

去得大阪玩,好多時都會過埋去京都玩,連帶京都嘅酒店業都好熱鬧~正因為係咁,下半年繼續有唔少新酒店登場㗎~下半年喺京都開業嘅酒店非常多元化,既有國際奢華品牌,亦都有當地精品酒店!要平有平,要型有型!
今次為大家介紹十一間新開幕嘅京都酒店,事不宜遲即刻睇睇係邊啲同有咩特別~

重溫
2018年京都精選新酒店巡禮:3月 至 6月 | 7月 至 12月
2019年京都精選新酒店巡禮:1月 至 6月 | 7月 至 12月 (你在此)

2019年7月18日開業
MIMARU 京都站
MIMARU KYOTO STATION

想住公寓式酒店嘅朋友,喺京都一共有兩個新選擇~ MIMARU 七月份會先喺京都站開一間,到八月再喺烏丸御池附近開多一間~而京都站呢間離開車站只係兩分鐘路程咋,搭車非常方便!
MIMARU 京都站嘅所有客房都係西式客房。呢度最細嘅房都已經夠五個人入住,佢哋仲更加有相連客房可以俾最多十個人一齊住添~每間客房都配備廚房,等大家可以自己下廚㗎。另外亦都有 handy 手機俾大家上網同打電話~每間公寓嘅面積由431呎起。

地址:京都府京都市南區東九条東山王町 15-1
鄰近車站:JR、近鐵 及 京都地下鐵烏丸線 京都站
電話:+81 075-585-9291
立即訂房:Agoda / Booking.com / Expedia / 酒店官網
參考價錢:連稅每晚約港幣 1,594 元

2019年7月26日開業
京都八條東口露台大和 ROYNET 酒店
Daiwa Roynet Hotel Kyoto Terrace Hachijohigashiguchi

喺剛才介紹嘅MIMARU 京都站旁邊,仲有同樣新開幕嘅京都露臺八條東口大和 ROYNET 飯店,離開車站一樣都係2分鐘路程~
酒店主打方便,除咗位置好之外,酒店樓下就已經有便利店,10分鐘路程內仲有間超大嘅 AEON Mall 等緊大家 Shopping 添!
同平日嘅大和 ROYNET 一樣,呢度提供雙人房同雙床房等房型,另外仲提供 Junior Suite 套房添~以商務酒店嘅價位嚟講,呢度嘅房唔算細,最細嘅房都由215呎起~

地址:京都府京都市南區東九条東山王町14-1
鄰近車站:JR、近鐵 及 京都地下鐵烏丸線 京都站
電話: +81 075-682-0855
立即訂房:Agoda / Booking.com / Expedia / 酒店官網
參考價錢:連稅每晚約港幣 714 元

2019年8月1日開業
MIMARU 京都烏丸御池NORTH
MIMARU KYOTO KARASUMA OIKE NORTH

下半年另一間新開業嘅 MIMARU 將會開喺烏丸御池站附近,離開車站大約5分鐘路程。酒店鄰近二條城以及文化博物館,位處嘅地段相對上寧靜一啲~
呢一間 MIMARU 提供較多不同房型,不過主要可以分為供5人住宿,以及供8人住宿兩大類別。除此之外,呢度既有西式客房,亦都有和式客房,可以體驗下榻榻米~順帶一提,佢哋其中一款客房獲認證為「嬰兒友善」,帶住小朋友出行嘅爸爸媽媽不妨留意下!公寓面積由431呎起。

地址:京都府京都市中京區釜座通御池上る下松屋町724
鄰近車站:京都地下鐵烏丸線 烏丸御池站 及 二條城前站
電話:+81 075-708-2120
立即訂房:Agoda / Booking.com / Expedia / 酒店官網
參考價錢:連稅每晚約港幣 1,095 元

2019年8月23日開業
京都四條靜鐵 PREZIO 酒店
Shizutetsu Hotel PREZIO Kyoto Shijo

靜鐵今年繼續向外闖,今次就由靜岡嚟到京都開新酒店~酒店座落喺四條,離開車站大約係6分鐘路程左右~附近除咗地鐵之外亦都有阪急電鐵,步行距離內仲有錦市場同各大百貨公司!
佢哋早餐主打各式由京野菜炮製嘅美食~「京野菜」係凡指喺京都出產嘅蔬菜,喺京都食返當地出產嘅蔬菜自然夠晒地道!客房房型方面,提供單人房、雙人房、雙床房等等。雖然無提供三人房,不過指定嘅雙床房備有梳化床,照樣可以三人一房。綜觀各個房型,酒店客房面積就由192呎起。

地址:京都府京都市中京區西洞院通錦小路上る古西町452
鄰近車站:阪急電鐵 烏丸站、京都地下鐵烏丸線 四條站
電話: +81 075-741-7891
立即訂房:Agoda / Booking.com / Expedia / 酒店官網
參考價錢:連稅每晚約港幣 530 元

2019年8月29日開業
三井花園酒店京都站前
Mitsui Garden Hotel Kyoto Station

京都嘅第四間三井花園酒店,今年喺京都站前揭幕~之前嘅都係開喺三條同四條附近,所以更加顯得今次新開幕嘅呢間三井有幾方便!酒店離開車站步行大約3分鐘左右~
酒店設有住客休息室,每日 12:00 到午夜都提供免費飲品同閒坐區域~住宿其他京都嘅三井花園酒店,亦都可以喺呢度托運同領取行李!
客房方面,唔計無障礙客房的話,三款房型分別屬雙人房、雙床房以及三人房。呢間並無提供任何特色房型,全部劃一等級。客房面積偏大少少,最細嘅客房亦由226呎起。

地址:京都府京都市下京區東塩小路町848番
鄰近車站:JR、近鐵 及 京都地下鐵烏丸線 京都站
電話: +81 075-353-3135
立即訂房:Agoda / Booking.com / Expedia / 酒店官網
參考價錢:連稅每晚約港幣 1,046 元

2019年9月2日開業
京都東方酒店 藝廊
Oriental Hotel Kyoto Gallery

東方酒店系列今年會喺京都連開兩間酒店~先開幕嘅有位於五條嘅「京都東方飯店 藝廊」,離開車站只有1分鐘路程~
叫得「藝廊」又點會淨係得個名好聽呢?酒店裡裡外外嘅設計都展現住京都嘅特色㗎~入口仿照傳統門扇設計,並且配合返市松花紋。內裡就分別見到有雪見障子同水墨畫等嘅裝置~大家入住嘅時候不妨多多留意佢嘅小細節!
酒店提供多種不同房型,不過都係雙人房同雙床房配置,只有少量客房可以加床俾三人入住。客房面積則由182呎起。

地址:京都府京都市東山區問屋町通五条下る一丁目朱雀町423番
鄰近車站:京阪本線 清水五條站
電話: +81 075-541-8111
立即訂房:Agoda / Booking.com / Expedia / 酒店官網
參考價錢:連稅每晚約港幣 615 元

2019年10月30日開業
京都柏悅酒店
Park Hyatt Kyoto

今年京都有兩個奢華品牌華麗登場,其中率先登場嘅有 Park Hyatt !京都柏悅只係全日本嘅第二間柏悅,更加係近畿地方嘅第一間~各位凱悅會員去玩嘅時候就多個選擇啦!
酒店毗鄰高台寺以及清水寺,所以離開車站都有一段距離,比較適合嚟個深度遊。
京都柏悅只係設有70間客房,其中9間係套房嚟。設計以當地手工藝為主題,用上水曲柳木材,配合當地藝術家嘅作品為裝飾。部分客房仲融入咗枯山水嘅元素喺裡面。入門級別嘅客房,面積由484呎起。

地址:京都府京都市東山區高台寺桝屋町 360
鄰近車站:京阪本線 祗園四條站 及 阪急京都本線 京都河原町站
電話: +81 075-531-1234
立即訂房:Agoda / Booking.com / Expedia / 酒店官網
參考價錢:連稅每晚約港幣 8,029 元

2019年11月1日開業
安縵京都
Aman Kyoto

另一間備受矚目嘅新酒店,就係喺大北山開幕嘅 Aman 啦~呢間安縵足足籌備咗十幾年,同時亦都係建築師 Kerry Hill 為安縵設計嘅最後一間度假村。今次佢哋隱藏喺金閣寺附近嘅庭園內,是為日本第三間嘅安縵 ~
呢度以傳統溫泉旅館為藍本,再注入安縵對當代設計嘅理念,形式小巧精緻,只得26間套房嘅安縵京都。內裡設施一應俱全,齊備室內室外溫泉,每座庭閣都有不同嘅用途。庭院範圍亦都無浪費,可以由酒店安排野餐或者瑜伽體驗~基本套房面積由646呎起。

地址:京都府京都市北區大北山鷲峯町1番
公共交通:距離京都站約30分鐘車程
電話: +81 075-496-1333
立即訂房:酒店官網
參考價錢:連稅每晚約港幣 17,380 元

2019年11月1日開業
京都御池精選巴哈大酒店
Hotel Grand Bach Select Kyoto Oike

京都嘅第二間Grand Bach 鄰近烏丸御池地鐵站,步行大約2分鐘左右就到~喺正烏丸線同東西線嘅交匯處,無論係去購物定觀光,要去各大景點都相當方便~
返酒店之後唔好咁早瞓住吖!佢哋每晚都提供免費酒精飲品、佐酒小食同宵夜,等大家食飽飽,輕嚐淺酌~其他時間亦都有提供飲品俾住客享用~
酒店提供雙人房、雙床房及三人房等房型,另備有套房~房內裝潢以當地文化為主題~雙人房面積由194呎起,雙床房就由205呎起。

地址:京都府京都市中京區室町通押小路下る御池之町314番地
鄰近車站:京都地下鐵烏丸線、東西線 烏丸御池站
電話: +81 075-241-7770
立即訂房:Agoda / Booking.com / Expedia / 酒店官網
參考價錢:連稅每晚約港幣 688 元

2019年11月1日開業
京都六條東方酒店
Oriental Hotel Kyoto Rokujo

另一間開幕嘅東方酒店選址六條,鄰近西本願寺以及東本願寺兩個古蹟~酒店所在嘅位置比較寧靜,需要由地鐵站步行大約9分鐘左右。
呢間東方酒店以「禪」為主題,除咗有仿照茶室嘅裝飾之外,亦都有同茶相關嘅活動,例如係逢有「6」字嘅日子都為客人提供用六條水所泡嘅抹茶~酒店唔單止將主題貫穿自身建築之內,更加透過應用程式將周邊社區連結起嚟,等旅客可以嚟個禪之旅~
酒店各級別嘅雙人房以及雙床房,都有細分作和式客房以及西式客房㗎,大家可以隨便選擇~基本房型面積由200呎起。

地址:京都府京都市下京區油小路通六条上るト味金仏町181番
鄰近車站:京阪本線 清水五條站
電話: +81 075-343-8111
立即訂房:Agoda / Booking.com / Expedia / 酒店官網
參考價錢:連稅每晚約港幣 549 元

2019年12月9日開業
GOOD NATURE HOTEL KYOTO

京阪集團上半年就喺京都推出新嘅豪華品牌,下半年就新推行 Lifestyle 路線嘅 GOOD NATURE HOTEL KYOTO,座落河原町,同京都高島屋相連~
酒店以追求生活為理念,提倡身心健康、五感享受。為咗貫徹展現佢哋嘅理念,酒店內嘅燈光都特意按照生理時鐘而作出調節㗎!除咗喺酒店嘅裝修上面落功夫之外,佢哋仲會透過舉辦各類型活動以及導賞團,為每位住客提供一個「GOOD NATURE」嘅體驗~
佢哋一共提供六種房型以及三種套房,部份客房最多可以3人或者4人入住。客房面積偏大,入門級別由301呎起。

地址:京都府京都市下京區河原町通四条下ル2丁目稲荷町318番6
鄰近車站:京阪本線 祗園四條站、阪急京都本線 京都河原町站
電話: +81 075-352-6730
立即訂房:Agoda / Booking.com / Expedia / 酒店官網
參考價錢:連稅每晚約港幣 1,326 元

今年嘅新酒店巡禮系列告一段落~來年再為大家介紹世界各地嘅新酒店,大家記得留意啦!


相關文章:
[日本京都] 2019年上半年精選新酒店巡禮
[日本大阪] 2019年下半年精選新酒店巡禮
[日本大阪] 2019年上半年精選新酒店巡禮

封面圖片由 Chapman Chow 拍攝,特此鳴謝。

0 個留言於 “[日本京都] 2019年下半年精選新酒店巡禮

發佈留言

發佈留言必須填寫的電子郵件地址不會公開。 必填欄位標示為 *