目的地介紹

[日本東京] 2019年下半年精選新酒店巡禮

日本 東京

嚟到2019年下半年,東京新酒店開幕嘅浪潮一波比一波犀利~上半年已經開咗起碼十間,下半年仲要再嚟多另外一批!
今次為大家介紹11間下半年開幕嘅東京酒店,有平有貴,有本地品牌亦都有國際品牌,多元化嘅程度比上回有過之而無不及~佢哋仲分佈東京各區添,銀座、日本橋、秋葉原以至係東京灣一帶都有~
想知道嚟緊有咩新酒店等緊你?即刻睇睇有啲咩新選擇啦~

重溫
2018年東京精選新酒店巡禮:1月 至 3月 | 4月 至 6月 | 7月 至 12月
2019年東京精選新酒店巡禮:1月 至 6月 | 7月 至 12月 (你在此)

2019年7月8日開業
卡拉扎酒店東京站
karaksa hotel TOKYO STATION

karaksa 集團今年喺東京連續開兩間酒店,繼五月份喺銀座開張之後,七月份就喺東京站前開張~酒店離開東京站八重洲口大約5分鐘路程,附近都已經有唔少地方行街同開餐~
酒店一共提供六種房型,其中一種係可以住到6個人嘅和式家庭房,能夠喺榻榻米房體驗日本文化~百幾間客房裡面,有其中40間可以同相鄰嘅客房打通成為相連房,啱晒大夥出行!設施方面頗為充足,有 handy 電話亦都有投幣洗衣機,而且指定時間喺大堂仲有免費飲品供應添。客房嘅面積由146呎起,相對地細少少。

地址:東京都中央區八重洲一丁目 5-3
鄰近車站:JR 東京站 及 東京Metro 地鐵銀座線、東西線、都營地鐵淺草線 日本橋站
電話:+81 03-3243-6602
立即訂房:Agoda / Booking.com / Expedia / 酒店官網
參考價錢:連稅每晚約港幣 1,377 元

2019年8月20日開業
日比谷花季酒店
THE BLOSSOM HIBIYA

搶先福岡分店開業,JR九州今年新推出嘅高檔品牌 THE BLOSSOM 會先喺東京登場~酒店落戶新橋站附近,喺建築物內佔據高層位置,橫跨18樓至27樓,每間房都有靚景!
酒店以和紙以及四季變遷為主題,當然亦都唔少得九州元素啦~雙人房以及雙床房仲再有各自嘅主題顏色,設計方面嘅心思非常仔細。雙人房由237呎起,雙床房就由269呎起,兩者都偏大,最大嘅房型更加可以去到657呎添!
設施方面都充足,有健身室同會議室等,無論係去出差抑或去玩都幾適合~

地址:東京都港區新橋一丁目 1-13
鄰近車站:JR、東京Metro 地鐵銀座線、都營地鐵淺草線 新橋站 及 都營地鐵三田線 內幸町站
電話:+81 03-3280-4111
立即訂房:Agoda / Booking.com / Expedia / 酒店官網
參考價錢:連稅每晚約港幣 1,424 元

2019年8月29日開業
VIA INN 日本橋人形町
VIA INN Nihonbashi Ningyocho

日本橋附近近嚟都有唔少新酒店登場,而今個下半年就有 VIA INN 開幕啦~配合返日本橋呢一個商業同文化嘅中心,酒店採用和式設計,揉合龜殼以及傳統色調作裝飾。
至於交通方面,酒店離人形町地鐵站大約4分鐘路程,出入羽田機場都唔使轉車,去銀座上野等地都同樣方便~
酒店配備多種房型,單人房、雙人房、雙床房以及三人房都有~雙人房面積由183呎起,中規中矩。唔同房型都有佢哋各自嘅主題顏色,大家不妨留意一下~

地址:東京都中央區日本橋小網町 16-12
鄰近車站:東京Metro 地鐵日比谷線、都營地鐵淺草線 人形町站
電話:+81 03-5640-5489
立即訂房:Expedia / 酒店官網
參考價錢:連稅每晚約港幣 774 元

2019年9月12日開業
日本橋濱町 Trusty 酒店 Premier
Hotel Trusty Premier Nihonbashi Hamacho

下半年另一間會喺日本橋開業嘅係Hotel Trusty!呢一間亦係佢哋 Premier 系列嘅第一間酒店嚟,較位於熊本嘅第二間 Premier 系列酒店早少少開業~酒店位處於濱町,係比較寧靜嘅地段~
因應返佢 Premier 嘅定位,設計方面除咗著重「時尚 (Stylish) 」、「舒適 (Comfortable) 」以及「價值 (Valuable) 」,仲同時加入「戲劇性 (Dramatic) 」!所以整體設計比較華麗同優雅,一啲都唔似商務酒店~
酒店一共有8種房型,分為雙人房同雙床房,雙人房面積由183呎起,至於雙床房面積就由248呎起~

地址:東京都中央區日本橋浜町二丁目 61-1 (地番)
鄰近車站:都營地鐵新宿線 浜町站
電話:+81 052-300-8633
立即訂房:Agoda / Booking.com / Expedia / 酒店官網
參考價錢:連稅每晚約港幣 820 元

2019年9月12日開業
大倉東京酒店
The Okura Tokyo

貴為日本酒店「御三家」之一嘅大倉,早前就將旗下東京總店嘅本館拆卸重建。大倉東京位於虎之門,靜中帶旺。出年新開嘅日比谷線地鐵站比較近,遠少少就有溜池山王站等車站~
重建後嘅本館部分會一分為二,分別成為樓高17層嘅大倉古雅館 (Heritage Wing) ,以及41層高嘅大倉新頤館 (Prestige Wing)。新頤館嘅客房全部位於28樓以上,可以欣賞到開揚嘅景色!至於想體驗和式典雅嘅話,就一定唔可以錯過古雅館嘅客房啦!無論係古雅館抑或係新頤館嘅房都好闊落,兩者嘅入門級客房面積都由五百幾呎起~

地址:東京都港區虎ノ門二丁目 10-4
鄰近車站:東京Metro 地鐵銀座線 虎之門站 及 溜池山王站
電話:+81 03-3224-6700 (預約專用)
立即訂房:Booking.com / Expedia / 酒店官網
參考價錢:連稅每晚約港幣 4,200 元

2019年9月26日開業
三井花園酒店銀座五丁目
Mitsui Garden Hotel Ginza-gochome

三井今年繼續密密喺東京開酒店,率先喺九月登場嘅有三井花園酒店銀座五丁目~酒店離開東銀座地鐵站只係1分鐘路程,就算係步行返去有樂町或者新橋兩個 JR 車站都只係大概10分鐘左右~
喺正「歌舞伎座」附近,酒店自然都用返「歌舞伎」做主題~無論係房內嘅裝飾,抑或係大浴場內嘅壁畫等等,全間酒店都貫穿住呢一個主題㗎~
酒店提供六種房型,既有雙人房雙床房,亦都有三人房~設施方面,酒店設有大浴場以及健身室,相對同級酒店又再齊備一啲~

地址:東京都中央區銀座五丁目 13-15
鄰近車站:東京Metro 地鐵日比谷線、都營地鐵淺草線 東銀座站 及 東京Metro 地鐵銀座線 銀座站
電話:+81 03-6226-5131
立即訂房:Agoda / Booking.com / Expedia / 酒店官網
參考價錢:連稅每晚約港幣 1,133 元

2019年10月7日開業
JR東日本秋葉原METS酒店
JR-EAST HOTEL METS AKIHABARA

JR 東日本會喺下半年連開兩間酒店,第一間選址秋葉原站旁邊,行一分鐘就到~唔單止有好幾條唔同鐵路可以揀,本身所在嘅地段亦都夠熱鬧同多嘢行!
講到秋葉原,相信大家一定會諗起電器~酒店嘅設計主題亦都圍繞返呢個特點,透過唔同嘅幾何設計表達出嚟~加埋鮮明嘅顏色,每間房望落都好精神~
房型分為五類,其中兩款仲係帶有露台,喺旺區實屬比較少見嘅設計嚟~房間面積方面,雙人房由183呎起,雙床房就由226呎起。

地址:東京都千代田區外神田一丁目 17-4
鄰近車站:JR、東京Metro 地鐵日比谷線、筑波快線 秋葉原站
電話:+81 03-5294-1011 (預約專用)
立即訂房:Agoda / Expedia / 酒店官網
參考價錢:連稅每晚約港幣 779 元

2019年11月7日開業
JR東日本東京灣新木場METS酒店
JR-EAST HOTEL METS TOKYO BAY SHINKIBA

又想喺市區Shopping 同買嘢,又想去迪士尼?咁就不妨諗吓住喺東京灣啦~新木場啱啱好就喺呢兩個地方中間,去東京、銀座、舞濱等都唔使轉車!
新木場係一個昔日用作儲存木材嘅地方,就算時至今日仍然同木材素有關係,喺呢度會搵到唔少同木材有關嘅嘢~今次新開嘅 METS 酒店亦唔例外,以木為主體!
房型一共有五種,唔少都可以加床,其中一種最多可以加兩張床,四個人一齊住~房間面積方面,雙人房由172呎起,雙床房就由194呎起,比另一間 METS 細少少。

地址:東京都江東區新木場一丁目 6-1
鄰近車站:JR 京葉線、東京Metro地鐵有樂町線、臨海線 新木場站
電話:+81 03-3522-0711 (預約專用)
立即訂房:Agoda / Expedia / 酒店官網
參考價錢:連稅每晚約港幣 693 元

2019年11月22日開業
三井花園酒店神宮外苑東京普米爾
Mitsui Garden Hotel Jingugaien Tokyo Premier

今年另一間新登場嘅三井酒店,將會係座落喺奧運主場館旁邊嘅三井花園酒店神宮外苑東京普米爾~如果有計劃去睇奧運嘅朋友,可能呢間酒店就係你嘅不二之選啦!
同國立競技場只有一街之隔,酒店附近亦都有三個車站,所以就算附近係比較靜嘅區分,佢嘅交通都依然好方便~
酒店設計以「Japan New Vintage」為主題,所以用石同木等材料打造復古味~為咗唔好浪費外面嘅景色,酒店為面向神宮外苑和新宿御苑嘅房都加設露台㗎~佢哋一共提供六種房型,雙人房以及雙床房各三種,面積就由199呎起。

地址:東京都新宿區霞岳町 11-3
鄰近車站:都營地鐵大江戶線 國立競技場站、JR 中央本線 千駄谷站 及 信濃町站
電話:+81 03-5786-1531
立即訂房:Agoda / Booking.com / Expedia / 酒店官網
參考價錢:連稅每晚約港幣 1,159 元

2019年12月9日開業
東京豐洲日航都市酒店
Hotel JAL City Tokyo Toyosu

大倉日航今年除咗有佢哋嘅旗艦重建完畢之外,佢哋亦都有新酒店開幕~新嘅日航都市酒店落戶豐州,開正喺新嘅豐州市場旁邊!自問鐘意食海鮮就一流啦,朝朝落去開餐都得!
雖然係西式客房,不過佢嘅設計就相當和式,用上唔少嘅天然材料去裝飾~房間分類比較簡單,一共三個等級,以及雙人房同雙床房兩種配置。另外升級版嘅 Plus 客房就位於最高嘅兩層,想欣賞靚景就記得留意啦~房間面積偏大一啲,雙人房226呎起,雙床房就由258呎起~

地址:東京都江東區豊洲六丁目 4-20
鄰近車站:百合海鷗線 市場前站
電話:+81 03-5962-4000
立即訂房:Agoda / Booking.com / Expedia / 酒店官網
參考價錢:連稅每晚約港幣 836 元

2019年12月24日開業
銀座雷姆 Plus 酒店
remm plus Ginza

隸屬阪急阪神酒店旗下嘅 remm 系列,今年新開升級版嘅 remm plus~喺呢度無細雙人床 (Double) ,最起碼都係Queen Size 嚟!一如其他remm,呢度所有房都配備按摩椅~酒店所在嘅位置好方便,喺銀座行街又得,經新橋站搭車四圍去又得!
酒店提供一共三種房型,各自以一種江戶時代嘅傳統顏色為主題。入門級房型係雙人房,面積由194呎起,而較高級嘅兩種房型都係雙床房,面積就由248呎起!雖然雙人房無浴缸比大家嘆,但就同其他房一樣有 Rain Shower ~

地址:東京都中央區銀座八丁目11番
鄰近車站:JR、東京Metro地鐵銀座線、都營地鐵淺草線、百合海鷗線 新橋站
電話:+81 03-6693-4123 (預約專用)
立即訂房:Agoda / Booking.com / Expedia / 酒店官網
參考價錢:連稅每晚約港幣 1,200 元

今次介紹住咁多先,下次再為大家介紹另一啲新酒店,大家記得留意啦~


相關文章:
[日本] 2019年東京近郊精選新酒店巡禮
[日本東京] 2019年上半年精選新酒店巡禮
[日本東京] 2018下半年精選新酒店巡禮

0 個留言於 “[日本東京] 2019年下半年精選新酒店巡禮

發表回覆

你的電郵地址並不會被公開。 必要欄位標記為 *