目的地介紹

[日本岐阜] 飛驒古川半日遊 - 飛騨牛専門店 祭

飛驒古川半日遊 - 飛騨牛専門店 祭

上星期就記錄咗我喺飛驒古川附近散步嘅遊記,仲未同大家介紹喺飛驒古川嘅美食!一場去到飛驒,當然唔可以錯過佢哋大名鼎鼎嘅飛驒牛!所以今個星期就為大家介紹一間飛驒牛專門店,等大家能夠食到當地嘅名產~

先介紹咗咩為之「飛驒牛」~唔知大家知唔知道,「飛驒牛」同「飛驒和牛」有咩分別呢?根據當地市政府觀光網站嘅定義,「飛驒牛」首先要係縣內飼養超過14個月嘅黑毛和牛,其次要符合日本食用肉等級認證協會認證體系內指定嘅可食用率,以及肉質等級,再經由飛驒牛品牌推進協議會事務局確認同認可,先可以稱謂「飛驒牛」。如果只係符合第一項條件,而唔符合餘下其他標準嘅話,就只可以稱為「飛驒和牛」。雖然兩者嘅來源大致相同,不過兩者嘅肉質等就唔一樣~

今次喺飛驒搵食嘅時候,都無特登揀定要試邊間餐廳~行下行下咁啱去到一間專賣飛驒牛嘅餐廳就決定入去試吓啦!飛騨牛専門店 祭 喺飛驒之匠文化館附近,如果大家沿著瀨戶川一路向文化館呢邊餵魚嘅話都會經過~喺度食飽行返車站都好近下,所以佢嘅位置都好方便~

飛騨牛専門店 祭 - 飛驒牛壽司
飛騨牛専門店 祭 - 飛驒牛壽司

既然佢係飛驒牛專門店,自自然然就係將飛驒牛整成唔同嘅美食!佢最出名嘅有飛驒牛牛扒丼,另外亦都有其他煮法,例如係炭燒、味噌煮,甚至乎係壽司~今次一行四人就係試咗呢四種做法,每一款都做得相當好~如果只可以推介一款嘅話,咁我個人就最鐘意炭燒啦,因為面頭燒到好香嘅時候,裡面仲略帶少許粉紅,而且仲好 Juicy 添!

飛騨牛専門店 祭 - 炭燒飛驒牛
飛騨牛専門店 祭 - 炭燒飛驒牛

點餐嘅時候每款煮法通常都只有 Size 同埋肉質等級揀,想經濟一啲又得,想享受吓又得~午餐時段嚟計,整體價錢大概係三千日圓左右一位。呢度除咗可以單點之外,亦都可以選擇跟餐,咁就會有埋漬物或者菜,以及一碗餐湯。雖然呢啲只係配菜,但都一樣做得幾出色~

飛騨牛専門店 祭 - 味噌煮飛驒牛
飛騨牛専門店 祭 - 味噌煮飛驒牛

如果大家咁啱喺飛驒呢邊住嘅話,話唔定可以考慮吓佢哋嘅晚市~雖然價錢一定會貴過午市唔少,不過既然係要預訂先有得食嘅話,相信質素都一啲好高!有機會嘅話我都要再去試吓!

今次嘅介紹唔知大家有無睇到流晒口水呢?歡迎各位喺下低留言或者Inbox我哋,一齊分享下心得又得,有問題想問嘅話亦都無任歡迎~


飛驒市觀光局介紹:www.hida-kankou.jp

飛騨牛専門店 祭 營業時間:
4月 至 11月:11:00 至 15:00
12月 至 3月:11:30 至 14:00
晚餐採用預約制,需提前訂位

地址:岐阜県飛騨市古川町壱之町15-6
交通:由 JR 飛驒古川站出口步行約5分鐘即達。


延伸閱讀:
[日本富山] 富山站前大和ROYNET 酒店 Daiwa Roynet Hotel Toyama-Ekimae
[日本富山] 立山黑部阿爾卑斯山脈行程規劃-票券、交通、路線
[日本富山] 立山黑部阿爾卑斯山脈行程-旅程記錄
[日本岐阜] 飛驒古川半日遊 - 漫步古色古香街道

0 個留言於 “[日本岐阜] 飛驒古川半日遊 - 飛騨牛専門店 祭

發表回覆

你的電郵地址並不會被公開。 必要欄位標記為 *