旅遊新聞

[酒店消息] 福岡麗思卡爾頓酒店 The Ritz-Carlton Fukuoka 2023年開幕

福岡麗思卡爾頓酒店 The Ritz-Carlton Fukuoka

福岡會喺2023年春天迎嚟九州第一間 Ritz-Carlton 酒店,座落喺天神嘅重建項目內~

福岡近年大力拓展天神一帶嘅重建計劃 (Tenjin Big Bang),將30座舊樓重建,增加商用面積~今次 Ritz-Carlton 就聯同多個日本當地發展商合組財團發展!

重建項目位於天神嘅舊大名小學用地,亦即係現時西鐵大酒店後方,離天神地鐵站大約5分鐘路程左右。酒店大堂設喺地下,而客房以及其餘設施就會分佈喺18至24樓,盡覽福岡嘅景色~

舊⼤名⼩學校重建計劃 結構
舊⼤名⼩學校重建計劃 結構 (圖片來源:積⽔ハウス)

福岡 Ritz-Carlton 計劃設有162間客房同套房,全部面積都唔會低過50平方米 (538呎) ~另外仲會有6間餐廳以及酒吧,當然亦都唔少得 The Ritz-Carlton Spa!除此之外,佢哋仲有泳池、健身室以及各類型會議設施!

福岡麗思卡爾頓酒店 明治通入口
福岡麗思卡爾頓酒店 明治通入口 (圖片來源:積⽔ハウス)

雖然近年福岡有唔少新酒店開幕,不過豪華品牌就相對上欠奉,大多數都係中價以及實惠型嘅酒店。加上之前有報導提及過福岡嘅酒店客房數量不足,今次 Ritz-Carlton 開業相信能夠開拓到新市場,唔會對現有嘅酒店造成太大影響~

順帶一提,呢間將會係日本嘅第七間 Ritz-Carlton!除咗現時嘅四間 Ritz-Carlton 之外,北海道二世古以及櫪木日光嘅 Ritz-Carlton 亦都會相繼喺2020年開幕~想體驗奢華酒店嘅各位就記得要 Bookmark 定佢哋啦!

資料來源:積⽔ハウス

0 個留言於 “[酒店消息] 福岡麗思卡爾頓酒店 The Ritz-Carlton Fukuoka 2023年開幕

發佈留言

發佈留言必須填寫的電子郵件地址不會公開。 必填欄位標示為 *