旅遊新聞

[航空消息] ANA 推出全新國際線頭等艙 商務艙

ANA New First Class - THE Suite

ANA 早排先啱啱推出咗一系列新嘅客艙產品,配合佢哋專飛夏威夷嘅A380機隊,轉過頭依家已經推出另一系列嘅國際線客艙產品!
新產品以東西薈萃為主題,將和式文化注入西式設計裡面,所以設計師分別係嚟自日本嘅隈研吾,同英國嘅 Acumen Design Associates。

頭等艙

設有8席嘅頭等艙,新產品以 THE Suite 命名。THE Suite 採用近年大熱嘅趟門設計,增加私隱度~佢哋亦都一改之前被詬病嘅設計,為座位加入活動式間隔,等中間位嘅乘客方便啲傾偈。
新座位嘅最大賣點,好難唔係佢嘅43寸 4K 螢幕!因為仲未有其他航空公司為旗下機隊安裝4K螢幕,而且呢個尺寸相信都係業界裡面最大嘅~

ANA New First Class - THE Suite
ANA New First Class – THE Suite

商務艙

商務艙一共設有64個位,其中一半改成反向排列,同卡塔爾航空嘅 QSuite 有些少相似~新商務艙座位 THE Room 亦有加入趟門,論私隱度嘅話,比頭等艙都唔輸蝕好多!THE Room 仲好闊落添,官方甚至號稱新位係舊版兩倍咁闊!
THE Room 配備嘅係24寸 4K 螢幕,比上一代都要大同清~順帶一提,因為呢個座位嘅配色係出自隈研吾手筆,所以用色秉承住佢嘅風格,分別嚟自三種唔同嘅木材,望落柔和舒服。

特選經濟艙 及 經濟艙

至於特選經濟艙以及經濟艙,就採用現時配備喺波音 787-10 嘅客艙產品,兩者都係今年先初推出嘅,所以都算係新產品嚟~

一齊睇睇新客艙產品嘅介紹影片啦~

新客艙一共會喺 ANA 旗下12架波音 777-300ER 客機安裝,而首架配備新客艙產品嘅客機就會喺下月 (8月2號) 投入服務,隔日往返東京羽田同倫敦希斯路~暫時尚未公佈之後冬天航季嘅營運時間表,有興趣體驗嘅朋友務必要留意住佢哋嘅最新消息啦!

資料來源:全日空

0 個留言於 “[航空消息] ANA 推出全新國際線頭等艙 商務艙

發佈留言

發佈留言必須填寫的電子郵件地址不會公開。 必填欄位標示為 *