[日本富山] 立山黑部阿爾卑斯山脈行程規劃－票券、交通、路線

上兩個星期分別為大家介紹過我今次旅程住嘅兩間酒店，今日就同大家分享返我今次去立山黑部玩嘅行程～初初睇資料嘅時候，或者會覺得立山黑部嘅交通好複雜，唔知應該點樣入手～不過大家唔使擔心，睇啱資料就自然會事半功倍㗎啦～

立山黑部阿爾卑斯山脈－票券

由名古屋出發，最簡單就係買一張5日嘅立山黑部、高山、松本地區周遊券～呢張 JR Pass 可以搭特急列車往返名古屋同富山或者松本，大家可以依呢兩點作為據點過夜。周遊券亦都包咗立山黑部區間內嘅各種交通工具，有效期內可以無限次咁搭。

不過就要留意返指定席嘅相關限制。呢張周遊券只係包4次 JR 嘅指定席，搭富山地方鐵道嘅時候就只能夠坐自由席。

喺呢張周遊券嘅適用範圍裡面，其實仲有唔少值得去嘅地方㗎。以今次往來嘅高山本線為例，高山同飛驒古川都係一啲熱門嘅景點～我都有喺飛驒玩返半日，嚟緊可以為大家介紹埋～

立山黑部、高山、松本地區周遊券嘅國外售價係 17,500 日圓 (港幣 1,269 元)，喺旅行社或者旅遊網站都買得到，大家配合埋一啲優惠代碼咁買就可以慳返啲啦～

立山黑部、高山、松本地區周遊券資料：touristpass.jp/zh-tw/alpine/

阿爾卑斯山脈路線內有相當多種類嘅交通工具，每搭完一樣又會轉搭另一樣～比較特別嘅會有登山纜車、隧道無軌電車以及架空索道！呢啲都唔係常見嘅交通工具，有啲甚至係全日本獨一無二㗎～

買咗剛才介紹嘅周遊券後，喺登山前需要先兌換一張「乘車整理券」，之後喺山內乘搭各種交通工具都係靠晒張「整理券」～沿路車站嘅資料屏幕都齊備日文、英文、中文等嘅多國語言，唔需要擔心睇唔明～

每個車站都有唔同隊列，例如係巴士站會按照目的地而有唔同嘅隊伍，纜車站等又會將旅客分為旅行團隊伍同個人隊伍等等。大家排隊等車嘅時候就要特別留意啦！

立山黑部阿爾卑斯山脈官網：www.alpen-route.com

睇時間表睇到一頭煙？唔使驚～立山黑部佢哋嘅網站有個好好用嘅行程表功能！只要揀返日期、出發時間、出發地同目的地，佢就會自動幫你計劃好整個行程嘅路線㗎啦～

除咗時間表所列嘅班次之外，佢哋間中會根據實際情況而增加特別班次～咁樣轉乘時間就可以縮短，爭取返多啲時間俾大家參觀！

仲有一點要留意㗎，就係尾班車時間，以及各個景點或者設施嘅關閉時間！以位於室堂站嘅大雪谷為例，雖然尾班車五六點先開，但係大雪谷三點鐘就停開～所以大家整好行程表之後，記得要核實埋呢啲細節呀！

下星期再同大家分享喺立山黑部嘅所見所聞～大家如果你有任何關於立山黑部行程，又或者係任何旅行嘅問題，都歡迎您留言或者Inbox問㗎～