目的地介紹

[日本富山] 立山黑部阿爾卑斯山脈行程-旅程記錄

立山黑部阿爾卑斯山脈 - 室堂站外

上次同大家分享過計劃立山黑部行程嘅一啲心得同實用資訊,今日呢篇 Blog 就記錄返我立山黑部之旅嘅見聞~今次行程就選擇咗以黑部水庫為折返點,一日行程後夜晚返到富山,過一晚之後再沿路返名古屋

立山黑部阿爾卑斯山脈-立山、美女平

由富山出發嘅話,第一樣要搭嘅交通工具就係富山電鐵~喺富山站旁邊就係電鐵富山站,由呢度就能夠搭火車去到立山站,展開大家嘅登山之旅!火車班次一樣有分普通、快速急行同特急,搭到特急當然最方便,不過最重要始終都係唔好上錯車,一定要認住「立山」~

去到立山站之後,上一層就會係立山登山纜車嘅等候區,等搭纜車上美女平~呢程纜車雖然只有短短幾分鐘時間,但係一口氣就會爬升大約500米!據介紹,纜車現時仍然保留貨運車卡,以便提供各類型嘅運送服務~

上星期介紹咗張立山黑部嘅周遊券~如果大家買咗 Pass 嘅話,喺電鐵富山站入閘前要先攞咗整理券再上車,張整理券就會幫你預約好纜車班次㗎啦。如果大家唔係買 Pass 的話,就要睇睇上網預約,因為纜車成日都滿座,人多嘅時候可能要等好耐㗎!

立山登山纜車-往返 立山站 及 美女平站
立山登山纜車-往返 立山站 及 美女平站

立山黑部阿爾卑斯山脈-室堂

去到美女平之後,就要再轉巴士上山去到路線中最高嘅車站-室堂~巴士有屏幕一路介紹沿路嘅景色,亦都會係去到某啲位嘅時候稍作停留。不過當日天色唔多好,能見度頗低,所以睇到嘅景色都唔多。大家有幸嘅話可以睇到瀑布同山峰等嘅景色㗎~雖然車程裡面有好多彎彎曲曲嘅山路,不過程車都好定,所以大家應該唔使太擔心會暈車浪!

室堂係整個立山黑部其中一個熱點嚟,話晒「大雪牆」雪之大谷就係喺呢度啦!但係大家千祈唔好好似我咁諗住回程返轉頭先去睇,因為呢度三點鐘就停開~想漫步雪之大谷嘅話,大家最好一去到就漫步咗先啦~

錯過咗大雪谷,仲有另一個地方可以親親白雪,就係室堂站三樓外面嘅廣場!即使呢度積雪唔及大雪谷高,都仲係高過人㗎!呢個平台亦都可以眺望附近山峰,景色都唔錯~喺雪融咗嘅時候,呢度就會搖身一變成為登山健行路線嘅起點~所以無論幾時呢度都值得上嚟睇吓!

立山黑部阿爾卑斯山脈
室堂站三樓廣場外景

立山黑部阿爾卑斯山脈-大觀峰、黑部平

喺室堂之後,大家就會開始慢慢降低返高度~要去黑部水庫,首先要搭無軌電車穿越立山!雖然佢叫電車,但就同大家想象嘅樣好唔同,因為佢係巴士嚟~因應返日本嘅分類,無軌電車係當作鐵路管理,所以呢條路線係全日本最高嘅鐵路線嚟,亦係現存唯一一條無軌電車!

到咗大觀峰之後,就要再轉下一款交通工具,今次就輪到架空索道!受地形所限,架空索道近兩公里嘅路線都無設置任何枝柱,所以佢亦都係日本最長嘅無支柱式空中纜車~堪稱為「移動觀景台」嘅佢,喺天氣唔好嘅時候都睇得唔差,相信天氣好嘅時候一定睇到靚靚景色!

立山架空索道-往返 大觀峰站 及 黑部平站
立山架空索道-往返 大觀峰站 及 黑部平站

立山黑部阿爾卑斯山脈-黑部水庫

要嚟到黑部水庫,仲要再搭多一個登山纜車落山。黑部水庫係今次旅程嘅折返點,由富山站嚟到呢個位已經搭咗足足六種交通工具咁多㗎啦。

黑部水庫係全日本最大嘅拱形結構式水庫,興建時都遇到唔少困難,一共用咗成七年時間先起好!規模大,排水量亦都大,講緊每秒可以排十噸以上嘅水,氣勢澎湃~想睇到呢啲咁精彩嘅畫面,就一定要走上樓梯,去到高位嘅觀景台居高臨下咁欣賞~觀景台除咗啱睇水庫之外,眺望附近嘅山峰亦都好適合~

黑部水庫每年只會喺指定嘅期間放水,一般都唔會同漫步大雪谷嘅日子重疊,所以兩者只能是但遇到一個~正因為咁,您第二年又可以有原因再嚟立山玩多次!不過一日行的確有啲趕,有機會的話喺山上過一晚夜應該會輕鬆唔少~

黑部水庫
黑部水庫

今次旅程記錄嘅時間都差唔多啦~大家如果你有任何關於立山黑部行程,又或者係任何旅行嘅問題,都歡迎您留言或者Inbox問㗎~

立山黑部阿爾卑斯山脈官網:www.alpen-route.com

0 個留言於 “[日本富山] 立山黑部阿爾卑斯山脈行程-旅程記錄

發表回覆

你的電郵地址並不會被公開。 必要欄位標記為 *