目的地介紹

[日本富山] 富山站前大和ROYNET 酒店 Daiwa Roynet Hotel Toyama-Ekimae

Daiwa Roynet Hotel Toyama-Ekimae

上星期介紹名古屋酒店嘅時候,賣咗個小小嘅關子,同大家講過今次旅途嘅主要目的就係去立山黑部睇雪~所以今次除咗喺名古屋住幾晚之外,亦喺富山住咗兩晚。我覺得由富山市區往返立山比信濃大町嗰邊方便啲,而且酒店選擇亦都比較多,所以就決定以富山為據點,展開今次立山黑部之旅啦~

為咗方便搭火車,選擇酒店嘅時候都盡量以靠近富山站為基礎。電鐵富山站同JR富山站拍住一齊喺左右,咁樣就無論係搭車往返名古屋定係去立山,都一樣咁方便。富山站週邊近嚟有唔少新酒店開幕,例如今次住宿嘅富山站前大和ROYNET 酒店就係其中之一~距離車站大約兩個街口嘅佢哋,今年四月初先開張,所以六月初住嘅時候都仲係新簇簇㗎!

富山站前大和ROYNET 酒店 - 大堂
富山站前大和ROYNET 酒店 - 大堂

由富山站南口行過嚟好容易就會搵到酒店~一樓係餐廳同24小時營業嘅便利店,搭𨋢上到2樓先係大堂,拍房卡再上就係客房嘅層數。據升降機內嘅說明,因應當地條例所限,不論上落嘅時候有無人撳掣停喺2樓,升降機每次都會喺大堂層打開𨋢門。相信咁樣嘅要求可以保障到住客嘅安全,等大堂職員能夠盡早提供協助。可能會有人覺得麻煩,但我又覺得咁樣嘅安排都唔錯。大堂設有閒坐區,有電視同一啲雜誌。等辦手續嘅時候,都留意到酒店有招待旅行團入住,所以大堂同升降機偶然會比較繁忙,但就未至於會構成不便~

富山站前大和ROYNET 酒店 - Standard Double 雙人房
富山站前大和ROYNET 酒店 - Standard Double 雙人房

今次住標準房型-Standard Double,面積已經有226呎起,以商務酒店嚟講都真係算幾大~活動空間唔算太多,因為洗手間嘅 Size 都比較大~就算係咁,房裡面都仲有枱櫈可以坐吓同做嘢,甚至乎連熨褲板都有,設備好齊全!

富山站前大和ROYNET 酒店 - Standard Double 雙人房
富山站前大和ROYNET 酒店 - Standard Double 雙人房

酒店唔算高,所以窗外景觀相對有限,例如今次嘅房就對住後街嘅多層停車場。另一邊嘅房會望返車站對出嘅大街,可以睇到電車駛過~酒店隔音方面做得唔錯,所以喺房裡面唔多覺有車輛經過嘅聲音,又或者係走廊其他住客嘅聲音。

房內嘅洗手間非常大,嚴格嚟講佢嘅間隔唔算係乾濕分離,只可以分為浴室同廁所兩個部分。浴室部份有浴缸亦都有淋浴設施,而且仲係 Rain Shower 嚟添!浴室部分可以另外上鎖,唔介意嘅話,其實洗手間都可以同時 Share 用嘅~以商務酒店級數同價錢,佢嘅洗手間可以話係做得好好,無挑剔嘅地方。

今次房價仲包咗自助早餐,所以可以同大家分享下佢哋嘅早餐~早餐喺地下嘅壽司店供應~朝早就無壽司食啦,取而代之係各式各樣嘅小菜同單品!佢哋有一部份嘅食材都係當地美食嚟,例如係螢光魷魚、魚板、魚卵等等~想食西式早餐亦都有唔少選擇,即使我略嫌做得唔夠和式咁出色,其實都算唔錯㗎~若果大家安排到嘅話,就喺呢度食完早餐先展開一日嘅行程啦!

總括而言,富山站前大和ROYNET 酒店嘅位置係佢哋最大嘅賣點!而且價錢唔貴,係一個抵住嘅選擇~如果大家都係同我一樣計劃去立山玩嘅話,咁就不妨選擇住喺呢度,嘆個靚早餐吖~下星期再同大家分享立山黑部嘅行程,大家記得留意~

大家如果你有任何關於旅遊嘅問題,歡迎您留言或者Inbox問㗎~

富山站前大和ROYNET 酒店官網 (日文):www.daiwaroynet.jp
電話:+81 076-471-6422
參考價錢:連稅每晚約港幣 919 元 (包兩位自助早餐)

地址:富山県富山市桜町1-3-1
交通:由 JR 富山站南口步行約3分鐘即達。

0 個留言於 “[日本富山] 富山站前大和ROYNET 酒店 Daiwa Roynet Hotel Toyama-Ekimae

發表回覆

你的電郵地址並不會被公開。 必要欄位標記為 *