目的地介紹

[日本福岡] 福岡塔 | 日本最高海濱塔

福岡塔

喺介紹過國營海之中道海濱公園之後,今次同大家介紹另一個福岡嘅海邊景點~喺博多灣嘅另一邊有全日本最高嘅海濱塔-福岡塔!由福岡塔可以遙望海之中道㗎~福岡塔係一個唔錯嘅景點,值得大家專程過去睇睇~事不宜遲,即刻睇睇福岡塔嘅介紹!

福岡塔-遠眺海之中道
福岡塔-遠眺海之中道

福岡塔高234米,以高度計,喺日本只係僅次於東京天空樹以及東京鐵塔~正如佢哋嘅用途一樣,福岡塔亦係一座電波塔,肩負起福岡縣內電視訊號發射嘅重任!由1989年嘅平成元年開幕至今,啱啱好同福岡走過整個平成年代!正因為今年係佢哋開幕三十週年紀念,所以佢哋喺今年年初啱啱完成咗翻新工程,加入唔少新設計同設施~

位於海傍嘅福岡塔離開地鐵站比較遠,所以巴士會比較方便往返~由博多站嘅巴士總站出發,搭306號或者312號巴士,唔使半個鐘就到~沿路停站數目唔多,而且大部分路段都係高速公路,所以程車好快就過!落車嘅時候認住「福岡タワー[TNC放送会館前]」站就啱啦~週邊仲有其他景點可以去,例如係海灘或者博物館,亦都有餐廳以及商店等等~

買完飛之後,千祈唔好咁心急上觀景台吖!樓上得餐廳裡面有洗手間俾食客用,所以一定要喺樓下去咗廁所先~職員喺放大家上樓前都會再提醒大家,記得聽佢哋嘅勸告~尤其係上去入咗場之後,就無得用同一張飛重新入場,無得落樓方便之後再入去!

雖然搭𨋢呢個步驟好似平平無奇,不過喺福岡塔呢度,我覺得係其中一個重點嚟!喺觀光𨋢裡面抬頭一望就可以欣賞到佢嘅內在結構,複雜得嚟又有條理~如果向外望又可以睇到出面嘅景色!一次過睇唔晒嘅話,就唯有搭上去嘅時候睇一樣,搭落嚟嘅時候睇另一樣,咁就唔會錯過呢兩個重點啦~

福岡塔內觀
福岡塔內觀

有儲開印仔嘅朋友,喺日本旅行肯定會四圍搵啲景點嘅紀念印章~呢度亦唔例外,喺唔同嘅角落都有得扱印,而且仲係自動㗎!咁就唔怕印得唔靚啦!佢哋仲有其他貼心位,例如喺有凳俾大家坐低唞吓,又有位俾一眾情侶扣返個情侶鎖~當然仲有唔同影相位!

福岡塔-福岡市景
福岡塔-福岡市景

同去程一樣,回程嘅時候有唔同巴士路線可以返到去市中心,有去博多站嘅,亦都有去天神嘅~大家要留意清楚路線,唔好坐錯咗慢車吖!有啲路線會兜多幾個站,令到車程長唔少㗎~如果唔係有計劃去某啲沿路嘅景點,咁就倒不如等多一兩班車,揀一架路線無咁迂迴嘅嚟搭啦!

今次稍為早咗少少上去觀景台,無睇到日落或者夜景。不過呢度係一個相當好嘅觀景設施,專程過嚟睇日落同夜景嘅話,相信唔會令你失望!日頭雖然無咁精彩,不過人流少啲,行亦都輕鬆啲,所以各有各鐘意~

如果您有任何關於旅遊或者行程上嘅問題,請隨便留言或者Inbox問,我會盡力解答㗎~

福岡塔官網:www.fukuokatower.co.jp

開放時間:09:30 至 22:00 (最終入場時間:21:30)
休館日子:6月最後一週的星期一及二 (若其中一日跌入七月份,則改為上一週的星期一及二)

入場費:
成人:800日圓
中、小學生:500日圓
小童 (四歲或以上):200日圓

地址:福岡縣福岡市早良區百道濱2丁目3番26號
交通:於博多站巴士客運大樓1樓乘搭306號或312號巴士,於博多塔南口 (TNC放送會館) 巴士站落車即達,車程約25分鐘。

0 個留言於 “[日本福岡] 福岡塔 | 日本最高海濱塔

發表回覆

你的電郵地址並不會被公開。 必要欄位標記為 *