目的地介紹

[日本名古屋] 名古屋 JR GATE TOWER 酒店 Nagoya JR Gate Tower Hotel

名古屋 JR GATE TOWER 酒店

月初去咗一轉日本中部,為嘅就係去立山黑部睇雪啦!雖然今年多咗直航機飛小松,不過就唔係日日有飛機,所以用返名古屋出入會比較方便~正因為係咁,今次嘅旅程就先後喺名古屋住咗幾晚。揀酒店嘅時候都盡量揀一啲方便出入火車站,所以好快就決定咗住喺車站上蓋嘅 JR Gate Tower 酒店啦!

名古屋JR站一共有兩間上蓋酒店,一間係歷史悠久啲,2000年開張嘅萬豪 (Marriott) 酒店。另一間就係今次住宿嘅 JR Gate Tower 酒店,相對上新一啲,2017年上半年先開業~話明係上蓋,兩間酒店都係直接連住車站。萬一唔好彩天氣惡劣嘅話,都一樣可以輕鬆出入,何況酒店低層已經係商場呢!地理位置優越,自然價格亦都會貴些少,房價坐底都要一千蚊一晚。

酒店位於 JR Gate Tower 嘅中層部分,所以由地面往返空中大堂嘅高速升降機會同辦公室嘅使用者共用。遇著返工放工,又或者係食晏等嘅繁忙時間,拖篋出入就可能會略有不便。空中大堂有便利店同 Starbucks,亦透過電梯通到過去另一邊嘅高島屋百貨,值得加分。

酒店入口 - 七夕裝飾
酒店入口 - 七夕裝飾

大堂設於15樓,同層仲有餐廳以及健身室。而客房就分佈於18樓至24樓。大堂一共用咗兩層樓嚟打造超高樓底,無論係日夜都好靚~可以閒坐嘅位置算充足,即使係 Check-In Check-Out 嘅高峯期都唔會唔夠位坐。

今次住宿基本房型-Moderate Double,面積大約215呎。因為睡床偏大嘅緣故,要開大篋嘅話會有些少麻煩。儲物空間就相當充足,有唔少大櫃桶可以擺嘢,就連夾萬都係大嘅~善用各個儲物空間嘅話,相信可以留返最後一晚先一次過執篋,唔怕東一袋西一袋。

名古屋 JR GATE TOWER 酒店 - Moderate Double 客房
名古屋 JR GATE TOWER 酒店 - Moderate Double 客房

兩次入住嘅景觀大致相同,都係向東面。要留意因為酒店唔及旁邊嘅郵政大樓高,所以有啲房會變成同辦公室對望,相對上差一啲。天氣好加上運氣好嘅話,咁就可以望遠啲,遠眺名古屋城都得!另一面嘅客房就會同路軌距離近啲,對雜音比較敏感嘅朋友可能要多加留意。

每間房裡面都設有平板電腦,除咗可以用嚟上網同做鬧鐘之外,佢最重要嘅功能就係控制房內燈光同冷氣!想開燈熄燈、調教光暗、調教冷氣等等,全部都可以透過平板電腦做到。部腦有齊日文、英文同中文,所以就算係小朋友或者長輩都可以輕鬆用到,唔怕睇唔明。

洗手間方面,基本房型無採用乾濕分離設計,採用淋浴浴缸,相對上比較傳統。透過官網了解過其他房型,有啲有採用乾濕分離,亦都有啲分隔返淋浴同浴缸兩部分,所以唔同房型嘅體驗可以話相當唔一樣。備品方面齊備,仲好特別有提供美容套裝,特別啱女士~

佢哋嘅服務亦都好周到~開首提過今次行程主要係去立山黑部,所以中間有兩晚過咗富山住,回頭返香港前先再留宿。佢哋容許我哋寄存行李兩晚,而且仲喺我哋 Check-In 之前已經率先將行李送上房,唔使自己拖篋上房!英文溝通方面亦都完全無問題,好快就可以處理好各樣嘅需要。

窗外景色 - 名古屋市景
窗外景色 - 名古屋市景

實而不華,想必係總結 JR Gate Tower 酒店最好嘅四個字。雖然無特別花巧嘅地方,但又唔會比其他人輸蝕,係一個好踏實、沉穩嘅選項。喺價格無大幅上升嘅前提下,我覺得我諗唔到一個唔住呢度嘅理由。

今次嘅介紹暫告一段落,下次為大家介紹另一間今次旅途住宿嘅酒店!大家如果你有任何關於旅遊嘅問題,歡迎您留言或者Inbox問㗎~

名古屋 JR GATE TOWER 酒店官網:www.associa.com/ngh/
電話:+81 052-566-2111
參考價錢:連稅每晚港幣 1,120 元

地址:愛知県名古屋市中村区名駅1-1-3
交通:JR GATE TOWER 直接連接名古屋站,於櫻通口離站後向左轉,直行可達升降機大堂。到達十五樓後,則可通往酒店大堂。

0 個留言於 “[日本名古屋] 名古屋 JR GATE TOWER 酒店 Nagoya JR Gate Tower Hotel

發表回覆

你的電郵地址並不會被公開。 必要欄位標記為 *