[泰國曼谷] 美食推介 － Lukkaithong Royal Cooking 金雞泰國菜館

介紹過兩間唔同嘅輕食之後，講開泰國又點可以唔介紹返啲地道嘢呢？今日同大家分享下泰國菜館～唔知大家有無聽過「金雞泰國菜館」？佢哋喺曼谷都薄有名氣，唔少人都會專登試吓佢哋嘅刨冰㗎～不過今次我就無食刨冰，所以為大家介紹嘅都係熱食～

Lukkaithong Royal Cooking 係一間由媽媽同囝囝夾手夾腳開嘅餐廳，至於餐廳名同招牌嘅金雞，就係取自爸爸嘅生肖啦～所以餐廳自自然然就大打親情牌，以媽媽家常菜嘅味道作為招徠！佢哋另外仲有副線牌子 (Fucheer by Lukkaithong) 專做刨冰甜品，所以唔想食正餐嘅話可以直接去佢哋嘅甜品舖～

佢哋喺曼谷有三間正舖以及兩間甜品舖，而兩間甜品舖分別同 Siam Paragon 以及 The EmQuartier 嘅正舖相鄰，大家喺埋同一層。今次我就去咗佢哋位於 Siam Paragon 嘅分店，另外仲有一間分店就係喺 Chic Republic ，離開市中心遠啲，所以大家應該都係去前兩間多啲～

佢哋設計方面真係好有心思！最有趣嘅就係佢哋嘅鐘聲，因為舖頭空間比較大，所以要撳鐘叫侍應。而嗰鐘聲唔係普通嘅「叮噹」聲，而係雞啼聲嚟～所以大家一路食飯嘅時候，耐唔耐就會聽到「咯咯」聲啦！另外佢哋仲有大大個鳥籠作為間隔，有啲檯會係坐喺鳥籠入面食飯，夠晒過癮～

雖然佢係一間泰國菜館，但係佢都融入咗唔少中菜甚至係香港嘅元素喺裡面。譬如我今次食嘅就有鹹魚肉餅臘腸飯、雲吞湯、魚蛋湯同炒通菜～

鹹魚肉餅臘腸飯係出乎意料地好！啲飯粒粒分明，而且唔使再落豉油都已經好好食～雖然佢加咗鹹魚喺肉餅裡面，但就唔會一味死鹹，調較得啱啱好！

魚蛋湯都做得幾好，而且有唔同款式，有白魚蛋、炸魚蛋同魚片，係個好豐富嘅淨食嚟～

佢哋餐牌裡面仲有好多唔同嘅推介項目，例如係今次叫嘅肉餅飯就係其中一樣啦～另外推介嘅嗰啲炒粉麵望落都唔錯，下次多啲人一齊去嘅時候一定要叫多幾款試吓～

如果你有任何關於旅遊嘅問題，例如係揀酒店、行程規劃等等，都歡迎您Inbox我哋或者留言問，我會盡全力解答你有嘅疑難～

Lukkaithong 官網：lukkaithong.com

Lukkaithong Royal Cooking Siam Paragon 分店營業時間：每日 10:00 至 22:00

Lukkaithong Royal Cooking Siam Paragon 分店地址：
432-434A, 4/F, Siam Paragon, 911 Rama I Rd., Pathumwan, Bangkok 10330, Thailand

交通：
乘搭BTS 素坤逸線 (Sukhumvit Line) 或 是隆線 (Silom Line) 前往 Siam 站 (CEN)，出站後可直達暹羅百麗宮 (Siam Paragon)