[泰國曼谷] 美食推介 － Hong Bao 紅包

介紹過一啲曼谷嘅好去處之後，點都要介紹返曼谷嘅美食～喺之前星期日嘅Blog 都曾經介紹過文苑嘅中菜，而今次我就去多咗唔同嘅中菜餐廳飲茶食飯，所以一連幾星期同大家分享下中菜美食！既然之前啱啱寫過 ICONSIAM 嘅遊記，咁今日就先寫一寫喺 ICONSIAM 嘅紅包～

紅包喺曼谷有好幾間分店，除咗今次去嘅 ICONSIAM 分店之外，佢哋喺 Central Embassy 裡面，以及有「小日本」之稱嘅Phrom Phong附近都有分店。當中 ICONSIAM 呢一間就最新，舊年11月先開，而且景觀開揚可以欣賞到河景，所以喺 ICONSIAM 唔知食咩好嘅話，嚟呢度飲茶的確係一個唔錯嘅選擇！

佢哋大部份分店都無落場時間，所以好似我今次咁去飲下午茶都得～佢哋比起一般茶樓有更多款式嘅茶揀，最特別嘅款式相信係羅漢果茶！而且佢哋嘅服務好周到，一直都好主動咁斟茶。亦因為呢個原因，佢哋唔會將茶壺放喺枱，咁就多啲位擺嘢食啦！

因為係嚟下午茶嘅關係，所以唔算試咗好多嘢，兩個人夾埋叫咗燒賣、蒸排骨、叉燒腸粉同燒味雙拼，一共四樣點心。

呢度嘅燒賣同平日嘅燒賣唔同，呢一款係冬菇燒賣，無蝦肉喺裡面，所以就算係對海鮮敏感嘅話都可以放心食燒賣！而且豬肉餡唔係用免治肉，而係切肉，食落比較有咬口～

至於蒸排骨，用腐皮墊底係比較少見嘅配搭。腐皮比較薄，所以比起用豆卜墊底會有更多排骨，非常抵食～

叉燒腸粉都好足料㗎，話佢餡多過腸粉都唔過份，裡面既多叉燒亦都多芫茜！

燒味係咁多樣食物裡面最推薦嘅一樣！燒腩仔皮薄之餘仲非常脆～燒鴨望落雖然有少少乾身嘅感覺，但裡面仲有好多肉汁！佢哋醬汁方面一啲都唔孤寒，但係呢個雙拼就已經俾四款醬汁我哋蘸嚟食～

雖然曼谷有好多好嘢食，但係飲茶確實不失為一個好選擇！質素高之餘，價錢亦都經濟抵食～嚟緊仲會為大家介紹更多嘅曼谷中餐廳，大家記得密切留意～

如果你有任何關於旅遊嘅問題，例如係揀酒店、行程規劃等等，都歡迎您Inbox我哋或者留言問，我會盡全力解答你有嘅疑難～

紅包 Facebook 專頁：www.facebook.com/hongbaorestaurant/

紅包 ICONSIAM 分店營業時間：
星期一至五：11:00 至 22:00
星期六及日：10:00 至 22:00

紅包 ICONSIAM 分店地址：5/F, ICONSIAM, 299 Charoen Nakhon Soi 5 , Charoen Nakhon Road, Khlong Ton Sai Sub District, Khlong San District, Bangkok 10600
交通：
乘搭BTS 是隆線 (Silom Line) 前往 鄭皇橋站 (Saphan Taksin, S6) ，於2號出口碼頭轉乘免費接駁船，或前往 恭吞武里站 (Krung Thonburi, S7)，於1號出口轉乘免費接駁巴士，可抵達ICONSIAM。