目的地介紹

[泰國曼谷] 美食推介 - Hong Bao 紅包

Hong Bao 紅包

介紹過一啲曼谷嘅好去處之後,點都要介紹返曼谷嘅美食~喺之前星期日嘅Blog 都曾經介紹過文苑嘅中菜,而今次我就去多咗唔同嘅中菜餐廳飲茶食飯,所以一連幾星期同大家分享下中菜美食!既然之前啱啱寫過 ICONSIAM 嘅遊記,咁今日就先寫一寫喺 ICONSIAM 嘅紅包~

紅包喺曼谷有好幾間分店,除咗今次去嘅 ICONSIAM 分店之外,佢哋喺 Central Embassy 裡面,以及有「小日本」之稱嘅Phrom Phong附近都有分店。當中 ICONSIAM 呢一間就最新,舊年11月先開,而且景觀開揚可以欣賞到河景,所以喺 ICONSIAM 唔知食咩好嘅話,嚟呢度飲茶的確係一個唔錯嘅選擇!

佢哋大部份分店都無落場時間,所以好似我今次咁去飲下午茶都得~佢哋比起一般茶樓有更多款式嘅茶揀,最特別嘅款式相信係羅漢果茶!而且佢哋嘅服務好周到,一直都好主動咁斟茶。亦因為呢個原因,佢哋唔會將茶壺放喺枱,咁就多啲位擺嘢食啦!

因為係嚟下午茶嘅關係,所以唔算試咗好多嘢,兩個人夾埋叫咗燒賣、蒸排骨、叉燒腸粉同燒味雙拼,一共四樣點心。

Hong Bao 紅包-燒賣
Hong Bao 紅包-燒賣

呢度嘅燒賣同平日嘅燒賣唔同,呢一款係冬菇燒賣,無蝦肉喺裡面,所以就算係對海鮮敏感嘅話都可以放心食燒賣!而且豬肉餡唔係用免治肉,而係切肉,食落比較有咬口~

Hong Bao 紅包-蒸排骨
Hong Bao 紅包-蒸排骨

至於蒸排骨,用腐皮墊底係比較少見嘅配搭。腐皮比較薄,所以比起用豆卜墊底會有更多排骨,非常抵食~

Hong Bao 紅包-叉燒腸粉
Hong Bao 紅包-叉燒腸粉

叉燒腸粉都好足料㗎,話佢餡多過腸粉都唔過份,裡面既多叉燒亦都多芫茜!

Hong Bao 紅包-燒味雙拼
Hong Bao 紅包-燒味雙拼

燒味係咁多樣食物裡面最推薦嘅一樣!燒腩仔皮薄之餘仲非常脆~燒鴨望落雖然有少少乾身嘅感覺,但裡面仲有好多肉汁!佢哋醬汁方面一啲都唔孤寒,但係呢個雙拼就已經俾四款醬汁我哋蘸嚟食~

雖然曼谷有好多好嘢食,但係飲茶確實不失為一個好選擇!質素高之餘,價錢亦都經濟抵食~嚟緊仲會為大家介紹更多嘅曼谷中餐廳,大家記得密切留意~

如果你有任何關於旅遊嘅問題,例如係揀酒店、行程規劃等等,都歡迎您Inbox我哋或者留言問,我會盡全力解答你有嘅疑難~

紅包 Facebook 專頁:www.facebook.com/hongbaorestaurant/

紅包 ICONSIAM 分店營業時間:
星期一至五:11:00 至 22:00
星期六及日:10:00 至 22:00

紅包 ICONSIAM 分店地址:5/F, ICONSIAM, 299 Charoen Nakhon Soi 5 , Charoen Nakhon Road, Khlong Ton Sai Sub District, Khlong San District, Bangkok 10600
交通:
乘搭BTS 是隆線 (Silom Line) 前往 鄭皇橋站 (Saphan Taksin, S6) ,於2號出口碼頭轉乘免費接駁船,或前往 恭吞武里站 (Krung Thonburi, S7),於1號出口轉乘免費接駁巴士,可抵達ICONSIAM。

0 個留言於 “[泰國曼谷] 美食推介 - Hong Bao 紅包

發表回覆

你的電郵地址並不會被公開。 必要欄位標記為 *