[泰國曼谷] 美食推介 － Four Seasons 文興酒家

一連兩個星期介紹過曼谷飲茶嘅好去處之後，今個星期介紹一間食晚飯嘅酒家～今次只係喺返酒店前面嘅 Siam Paragon 搵食，美食固然唔少，所以一樣有出色嘅中菜㗎！試過佢哋晚市之後，相信下次要去埋其他分店試吓佢哋嘅茶市點心～事不宜遲介紹－文興酒家！

喺英國留學或者定居過嘅朋友可能會對文興呢個名有啲印象，因為呢間文興同英國頗出名嘅文興係同一間嚟～佢哋最出名就係燒鴨，話唔定各位食過都唔出奇～佢哋除咗英國之外，就只有喺中國大陸同埋泰國有分店。而且佢哋喺曼谷都有幾間分店，唔使特登兜路應該都會見到佢哋～

同今次介紹嘅另外兩間酒家唔同，呢度無得揀茶，就只有要同唔要呢兩個選擇，未必人人鍾意。另外佢哋預先擺喺枱嘅濕紙巾要收費，唔用嘅話可以俾返佢哋～呢一點好似新加坡咁～至於環境方面就唔錯，話晒都係商場舖嘛！

今次係嚟食晚飯，所以試嘅就唔係點心，而係小炒～除咗乾炒牛河同炒龍脷之外，當然唔少得燒鴨啦！仲試咗個湯羹添～

先講佢哋招牌之一嘅燒鴨～燒鴨一嚟就已經淋上燒鴨汁，比起一般燒鴨嘅上菜方式有少少唔同～再者燒鴨嘅肉質好嫩滑，不枉佢咁出名～

湯羹以及炒龍脷兩者嘅定價稍貴，但對比起香港嘅價錢仍然平唔少～價錢貴少少之餘，份量唔細，水準亦都高㗎！

乾炒牛河陣味相當正宗，又有鑊氣，仲有好多牛肉喺裡面，相當之難得～更加好嘅係，食落唔油膩，唔會有罪惡感～

我見佢餐牌仲有好多其他美食值得試，例如係鮑魚花膠麵等等，定價亦都幾實惠～所以相信下次去到曼谷都應該會再去開餐，唔知幾時可以再去試呢？

如果你有任何關於旅遊嘅問題，例如係揀酒店、行程規劃等等，都歡迎您Inbox我哋或者留言問，我會盡全力解答你有嘅疑難～

曼谷文興酒家 Facebook 專頁：www.facebook.com/Four-Seasons-Restaurant-Bangkok-277151308973138/

曼谷文興酒家 Siam Paragon 分店營業時間：
星期一至五：11:00 至 22:00
星期六及日：10:30 至 22:00

文興酒家 Siam Paragon 分店地址：G/F, Siam Paragon, 991 Rama I Rd, Khwaeng Pathum Wan, Khet Pathum Wan, Bangkok 10330, Thailand
交通：
乘搭BTS 素坤逸線 (Sukhumvit Line) 前往 Siam 站 (CEN)，出站後可直達暹羅百麗宮 (Siam Paragon)。