目的地介紹

[泰國曼谷] 美食推介 - Ah Yat Abalone Arnoma Hotel 曼谷阿一鮑魚

曼谷阿一鮑魚

上星期介紹過大家去 ICONSIAM 飲茶,唔知大家有無興趣呢?如果略嫌嗰度唔就腳嘅話,咁今日嘅介紹就啱晒你啦~今日繼續同大家講飲茶,而今次介紹嘅酒樓喺正市中心,交通非常方便!今次要為大家介紹嘅,唔係當地品牌,而係嚟自香港嘅阿一鮑魚~

阿一鮑魚嘅背景相信唔使我多介紹,喺香港嘅各位都應該略知一二~不過唔講唔知,佢嘅海外版圖都唔細,新加坡、印尼、泰國等地都搵得到佢!上次同朋友喺新加坡食飯嘅時候試過都唔錯,所以今次喺曼谷就順道去飲茶,試一試佢哋嘅點心!

曼谷嘅阿一位於 Arnoma 酒店裡面,鄰近 Big C 同 Centralworld,附近仲係唔少酒店嘅集中地,例如係之前介紹過嘅萬麗,所以位置夠晒方便,幾乎肯定會路過~佢哋喺曼谷仲有另外兩間分店,不過一間就專門做大型宴會,而另一間嘅位置就比較偏僻,相信大家有興趣嘅話都係會去返 Arnoma 呢一間。

環境雖然同一般港式茶樓無異,但空間就闊落啲,唔使背貼背咁迫。而且佢哋同香港一樣係用點心紙落單,可以話跟足香港嘅模式!最大亮點相信在於佢哋嘅價錢,平日午市飲茶所有點心一律半價!原價就話同香港差唔多,半價之後就完全無得比,非常超值!

阿一係我哋喺曼谷第二間去飲茶嘅茶樓,所以不自覺哋都嗌咗相似嘅點心~今次分別試咗牛肉球、蒸排骨、炸兩、燒腩仔同蛋撻~

曼谷阿一鮑魚 - 牛肉球、蒸排骨
曼谷阿一鮑魚 - 牛肉球、蒸排骨

牛肉球同蒸排骨嘅水準都屬於中上,上枱嘅時候仲夠哂熱辣辣添~

曼谷阿一鮑魚 - 炸兩
曼谷阿一鮑魚 - 炸兩

炸兩亦都唔錯,感覺上幾新鮮,唔會覺得係將隔夜貨攞嚟做炸兩!

曼谷阿一鮑魚 - 燒腩仔
曼谷阿一鮑魚 - 燒腩仔

燒腩仔陣皮又薄又脆,唔會肥淋淋,食多兩件都唔會有罪惡感~

曼谷阿一鮑魚 - 蛋撻
曼谷阿一鮑魚 - 蛋撻

最有驚喜嘅係蛋撻!本身只係落單嘅時候隨便加嘅一樣小食,反而係成餐印象最深刻嘅一樣!佢哋嘅蛋撻做得出乎意料地好,一定要試一試!

佢哋關於營業時間嘅資料比較混亂,Facebook 專頁、酒店官網以及喺 Google 地圖上列出嚟嘅營業時間都唔一樣,建議大家穩陣啲,唔好太晏去到。總括而言,半價點心唔會得返半價嘅質素,認真值得大家搵一日去飲茶~

如果你有任何關於旅遊嘅問題,例如係揀酒店、行程規劃等等,都歡迎您Inbox我哋或者留言問,我會盡全力解答你有嘅疑難~

曼谷阿一 Facebook 專頁:www.facebook.com/ahyatrnoma/

營業時間:每日 11:00 至 15:00 及 18:00 至 23:00

地址:99 Ratchadamri Road, Pathumwan, Bangkok 10330, Thailand
交通:
乘搭BTS 素坤逸線 (Sukhumvit Line) 前往Chit Lom站 (E1),出站後經6號出口離站,經由Gaysorn Village到地下,再向水門市場方向步行約200米識即達。

0 個留言於 “[泰國曼谷] 美食推介 - Ah Yat Abalone Arnoma Hotel 曼谷阿一鮑魚

發表回覆

你的電郵地址並不會被公開。 必要欄位標記為 *