目的地介紹

[泰國曼谷] Jim Thompson House 湯普生博物館

Jim Thompson House 湯普生博物館

喺介紹過新景點之後,今個星期介紹返一個古色古香啲嘅景點~唔知道大家有無聽過「Jim Thompson」呢個名呢?大家可能會知道佢有餐廳,大家亦都可能知道佢有唔同嘅時裝。除咗呢兩項比較多人認識嘅生意,佢哋仲有自己嘅博物館同藝術中心㗎~今日就一於同大家介紹下佢哋嘅博物館-Jim Thompson House!

Jim Thompson 其實係一名退役美軍,佢退役後選擇喺曼谷落腳,並且開展一門絲綢生意。佢絕對可以話係泰國絲綢業嘅靈魂人物,因為現時泰式絲綢搶眼嘅顏色配搭,就係由佢嘅公司所發明!難怪時代雜誌將佢嘅事蹟,形容為單人匹馬咁拯救咗當時瀕危嘅泰國絲綢業。若然無咗佢獨到嘅眼光,相信泰國絲綢業可能已經唔存在。

Jim Thompson House 內一攝
Jim Thompson House 一攝

喺建立絲綢事業嘅同時,Jim Thompson亦都對其他亞洲工藝品感到興趣,所以漸漸建立起佢嘅收藏系列。至於Jim Thompson House就係佢特登興建嚟展出收藏品嘅地方~佢係由幾間傳統泰式獨立屋所組成,而呢啲屋更加係由泰國各地搬過嚟,唔係新興建而成。博物館現時以基金會嘅形式營運,所以入場費算幾相宜~

博物館內禁止影相,所以內籠同展覽內容就只能夠透過文字為大家約略介紹下。喺呢度參觀必須要參加導賞團,而導賞服務並唔需要另外俾錢。導賞團提供5種唔同語言嘅服務,參加英文嘅又得,參加中文嘅都得。導賞員會沿路為大家介紹Jim Thompson 嘅事蹟,以及旗下事業嘅故事,包括剛才提過有關Jim Thompson House六座木屋嘅歷史亦都有一一介紹~

如果大家對歷史或者時裝等有興趣嘅話,我都幾肯定呢度嘅展覽唔會令你悶,因為佢嘅故事真係幾精彩,而且收藏品亦都好值得欣賞下~就算你對展覽無乜興趣,都一樣值得過嚟行下,因為呢度仲有Jim Thompson嘅商店同埋餐廳,有嘢買又有嘢食!

戶外絲綢展品
戶外絲綢展品

如果大家淨係嚟食嘢同買嘢嘅話,並唔需要俾入場費,只係參觀展覽先要買入場券~今次我就無入到餐廳食嘢,淨係去咗博物館同商店。商店同喺外面嘅Jim Thompson 舖頭略有不同,喺呢度可以搵到比較多嘅家品,亦都有多少少比較簡約嘅時裝。反過嚟諗,如果你想搵啲新穎款式嘅話,咁就去返一般門市比較合適。

就現場所見,去參觀嘅比較多歐美各地嘅遊客。話唔定歐美嘅遊客對於佢哋同鄉喺泰國發跡嘅歷史零舍感到興趣~亦都係因為呢個現象,現場唔覺有旅行團到訪,所以環境比較清靜,令到大家都可以好放鬆自在咁參觀,了解箇中嘅故事。

如果您有任何關於旅遊或者行程上嘅問題,請隨便留言或者Inbox問,我會盡力解答㗎~

Jim Thompson House 官網 (英文)www.jimthompsonhouse.com

開放時間:每日 09:00 至 18:00
入場費:
成人:200 泰銖
青年 (22歲或以下):100 泰銖
10歲或以下小童可隨同成人免費入場

地址:6 Soi Kasemsan 2, Rama 1 Road. Bangkok 10330
交通:乘搭BTS 是隆線 (Silom Line) 前往 國家運動場站 (National Stadium, W1),由1號出口離開車站,到達地面後右轉進入 Soi Kasemsan 2,前行約300米即達。

0 個留言於 “[泰國曼谷] Jim Thompson House 湯普生博物館

發佈留言

發佈留言必須填寫的電子郵件地址不會公開。 必填欄位標示為 *