目的地介紹

[日本東京] 市區美食推介-京橋千疋屋 Kyobashi Sembikiya

京橋千疋屋

上星期介紹完酒店之後,今個星期都繼續講吓東京先~喺酒店嘅斜對面就有出名賣靚生果嘅千疋屋,喺東京站大丸裡頭我亦都試過千疋屋嘅甜品,有一日經過咖啡店門口亦都見到千疋屋寄賣嘅三文治。後來查證過之後,原來啱啱講緊嘅係三間唔同嘅千疋屋嚟,而我只係試咗其中一間!

日本一共有成三間唔同嘅千疋屋,分別係今次介紹嘅京橋千疋屋、千疋屋總本店,以及銀座千疋屋。佢哋當中嘅淵源非但同溏心風暴一啲關係都無,反而係一個幾窩心嘅故事嚟!三間裡面,以千疋屋總本店嘅歷史最悠久,創立於1834年,透過喺街頭販賣新鮮生果以及菓子起家,至今已經有近185年歷史~佢哋足足做咗成30年先至入舖㗎~

至於點解會有三間千疋屋,就要講到第三代嘅歷史。第三代傳人代次郎嘅妹夫憑著出色嘅生意頭腦,以及工作期間逐步建立嘅聲望,獲准以「千疋屋」嘅名字開辦分店。1881年嘅時候,佢選擇咗喺現今京橋一帶開舖,無幾耐仲見證住東京站開業,人流繼而滔滔不絕,越做越大,所以京橋千疋屋喺東京站一帶最多分店!

如果京橋千疋屋嘅故事打動唔到你,咁銀座千疋屋嘅故事應該感動到你。再推進到1894年,第三代傳人批准佢嘅好伙計用「千疋屋」嘅品牌自立門戶。呢個好伙計-齋藤義政年輕嘅時候隻身走到東京打工,聰明又正直嘅佢喺總本店非常落力工作,好快就晉升成為經理,最後27歲嘅時候就去到銀座開舖啦,是為銀座千疋屋。

今次去咗京橋千疋屋位於大丸東京三樓嘅分店食甜品,不過呢一間就無生果賣,要去返樓下地庫嘅分店先有生果買~三樓嘅餐廳除咗各式甜品之外,佢哋仲有啲以蔬果入饌嘅輕食可以試。我仲見到佢哋會定期搞生果放題,但就要提前預訂,鍾意食生果嘅朋友不妨去試一試吖~

京橋千疋屋-士多啤梨芭菲
京橋千疋屋-士多啤梨芭菲

今個冬季正喺推廣緊士多啤梨,所以佢哋推出咗一系列嘅士多啤梨產品,例如係士多啤梨芭菲、士多啤梨三文治等等。二千幾円一杯芭菲看似好貴,但就相當足料,粗略估算一杯差唔多有半打士多啤梨!士多啤梨三文治望落雖然好厚Cream,不過一啲都唔膩,唔需要覺得有罪惡感!幼滑嘅忌廉配上甜美嘅士多啤梨又點會唔好食呢?食落每一份甜品都有返一定份量,所以嚟食之前記得唔好食太飽~呢啲推廣商品都真係幾受歡迎,幾乎每枱都一定有人嗌份芭菲或者三文治!期間限定以外嘅甜品亦都頗具水準,隨便叫嚟試都一定唔會差得去邊~

京橋千疋屋-士多啤梨三文治
京橋千疋屋-士多啤梨三文治

好老細加上好員工,令到千疋屋嘅品牌做得有聲有色。雖然三間千疋屋嘅規模以及管理層都唔一樣,但就依然好似一家咁互相合作。講到呢到,相信我下次去到都一定要試埋另外兩間千疋屋嘅美味啦!

大家如果你有任何關於旅遊嘅問題,歡迎您留言或者Inbox問,我會盡力為您解疑難~傾偈交流下心得亦都可以㗎~

京橋千疋屋官網 (日文):www.senbikiya.co.jp

大丸東京三樓分店
營業時間:

星期一至三、星期六、日及公眾假期:10:00 至 20:00
星期四及五:10:00 至 21:00

地址:東京都千代田区丸の内1-9-1 グラントウキョウノースタワー3階
交通:JR 東京站八重洲北口可直接通往大丸東京。

0 個留言於 “[日本東京] 市區美食推介-京橋千疋屋 Kyobashi Sembikiya

發佈留言

發佈留言必須填寫的電子郵件地址不會公開。 必填欄位標示為 *