目的地介紹

[日本東京] 三井花園酒店日本橋普米爾 Mitsui Garden Hotel Nihonbashi Premier

三井花園酒店日本橋普米爾

舊年曾經為大家介紹過14間東京新開幕嘅酒店,唔知大家仲記唔記得呢?話唔定大家都已經去試過部份嘅新酒店~上次就試過位於大手町嘅三井花園酒店,近排我就住咗另一間2018年新開幕嘅酒店啦~今次住宿體驗同大家介紹下三井花園酒店日本橋普米爾!

三井花園酒店日本橋普米爾係三井集團舊年喺東京開嘅第三間酒店,過晒暑假之後嘅9月先開幕~酒店同 JR 嘅日本橋站同地鐵嘅三越前站相通,出入都唔怕落雨。JR 日本橋站屬於總武線,喺東京站係同N’EX共用同一月台,咁就可以好輕鬆轉車去到酒店~反正N’EX嘅來回車票可以喺東京區間內免費轉乘,所以拎住行李嘅時候,最好當然係搭到酒店樓下!

除咗交通方便之外,酒店附近嘅環境亦都相當唔錯,喺附近行都唔會悶~附近係三越百貨喺日本橋嘅本店,行落啲過橋之後就有高島屋!三越本店嘅本館更加係國家重要文化財,極具歷史價值㗎!另外仲有合共三期嘅商場「COREDO 室町」,既有當地老字號進駐,亦都有唔少食肆添!喺正酒店對面嘅「COREDO室町テラス」將會喺今個秋天開業,屆時就連誠品生活都會喺日本登場~

三井花園酒店日本橋普米爾 大堂
三井花園酒店日本橋普米爾 大堂

酒店位於大廈中上部分,所以大堂設於9樓,而房間就分佈喺10至15樓~地面入口喺日間會有職員當值,拎行李又或者查詢旅遊資訊都係喺呢度~至於Check-in 同Check-out就要去到9樓嘅大堂,同一層嘅仲有餐廳、酒吧以及大浴場。大堂佈置格調高雅,好適合坐喺度傾吓偈,而且座位附近設有唔少叉電位,坐耐啲都仲得~

全間酒店有9種房型合共264間房,所以每層嘅房間數量都唔少,景觀亦都有頗大嘅差別。單計園景就已經有兩款,一款係真園景,另一款亦即係今次住嘅就完全無景,望住緊急樓梯。即使景觀遜色,採光都尚算唔錯嘅,而且房內燈光亦都唔會話太光或者太暗~高級少少嘅房型望返街道景就應該相當唔錯啦~

三井花園酒店日本橋普米爾 舒適房
三井花園酒店日本橋普米爾 舒適房

房間採用乾濕分離設計,洗手盆亦都係喺一個半開放式嘅空間,好處係增加間房嘅空間感,但壞處就換嚟私隱度不足,要同朋友非常信任先接受到。除咗衛浴部分嘅設計遜色啲之外,房內都有唔少細心位值得讚!例如係最細嘅房型都有張小梳化同櫈,可以每人坐一張~另外衣櫃偏大,能夠放得落好幾件大褸!杯具一啲都唔「杯具」,更加係加分位!事關佢哋有成三款杯,酒杯、茶杯同日式茶杯都有,媲美高級酒店!房內叉電位亦都充足,有插頭位又有USB位,兩個人夠晒用!

三井花園酒店日本橋普米爾 舒適房
三井花園酒店日本橋普米爾 舒適房

一貫服務好嘅三井酒店,喺日本橋呢度亦都令我好滿意~走嘅時候因為帶住唔少行李,職員好主動咁安排我哋搭職員用嘅升降機落地庫,唔使用扶手電梯上落。未開口問佢哋,就已經知道要提供乜嘢嘅服務或者協助,咁樣嘅服務都好難話唔好啦,係咪?

三井花園酒店日本橋普米爾價位比較高,不過「普米爾」(Premier) 呢三個字都唔係浪得虛名㗎~我相信佢能夠提供嘅體驗,比起佢嘅價錢更高,值得投下信心嘅一票。

今次介紹暫告一段落,大家如果你有任何關於旅遊嘅問題,歡迎您留言或者Inbox問㗎~

三井花園酒店日本橋普米爾
官網:www.gardenhotels.co.jp
電話:+81 03-3270-1131
參考價錢:連稅每晚港幣1221元

地址:東京都中央區日本橋室町3-4-4
交通:JR 新日本橋站、東京地鐵銀座線 及 半藏門線 三越前站 均與酒店地庫相通。
另外,由JR 東京站日本橋口出發步行約11分鐘即達,由東京地鐵東西線 及 都營地鐵淺草線 日本橋站出發則需步行約8分鐘。

0 個留言於 “[日本東京] 三井花園酒店日本橋普米爾 Mitsui Garden Hotel Nihonbashi Premier

發佈留言

發佈留言必須填寫的電子郵件地址不會公開。 必填欄位標示為 *