目的地介紹

[日本東京] 東京站尋味地圖-金華豚料理 平田牧場 極

金華豚料理 平田牧場 極

[日本東京] 東京站尋味地圖-前言
[日本東京] 東京站尋味地圖-POINT ET LIGNE
[日本東京] 東京站尋味地圖-Freminar 小岩井農場
[日本東京] 東京站尋味地圖-豚捨
[日本東京] 東京站尋味地圖-金華豚料理 平田牧場 極
[日本東京] 東京站尋味地圖-Sarabeth’s Tokyo
[日本東京] 東京站尋味地圖-牛たんねぎし

雖然上星期我為大家介紹過食牛嘅名店「豚捨」,不過豚肉都可以好吸引,唔一定要二選一嘅!今個星期就介紹返一間食豚肉嘅餐廳~啱啱今個星期踏入豬年,我就搵嚟「金豬報喜」!講緊嘅係位於KITTE 6樓嘅「平田牧場 極」,佢哋專做金華豚料理㗎~

唔知講起「金華豚」三個字,大家第一時間會諗到啲咩呢?如果你諗起金華火腿嘅話,咁就啱啦!因為平田牧場係喺上世紀80年代由中國引入用嚟整金華火腿嘅金華豬,經過改良之後再冠上自家品牌嘅名,成為「平田牧場金華豚」~佢哋亦都有自家培育嘅豬種 - 三元豚,即使檔次不及金華豚,都一樣值得一試㗎~位於KITTE嘅分店係專做金華豚,所以今次先試金華豚,下次有機會再試三元豚~

金華豚料理 平田牧場 極-涮涮鍋
金華豚料理 平田牧場 極-涮涮鍋

晚市套餐由6,000円起,最貴嘅套餐就係10,000円。最貴嘅套餐就係極上金華豚套餐,挑選出最上乘嘅金華豚作為食材。套餐包晒前菜、涮涮鍋、麵食、甜品同埋餐飲,肯定夠晒飽~大部分時間侍應都會打點好一切,最主要都係要自己烚肉同埋食㗎咋~雖然啲豚肉片望落好似好肥膩咁,但食落香得嚟又唔會覺得好油,又唔會令你擔心食滯。我唔係好睇得出極上金華豚以及金華豚兩碟嘅分別,不過食落真係有唔同,係再好食啲,所以都算係物有所值㗎~除咗涮涮鍋之外,另外仲單點咗一份炸豬扒~炸豬扒嘅質素真係可以媲美炸豬扒名店嘅水準,真係做得到外脆內軟!

正如剛才提到,侍應們都好殷勤,好多嘢都會打點好晒,所以整個用餐嘅過程都好順暢同滿意~而且佢哋嘅服務仲好周到,會為你掛起大褸,唔需要自己處理~佢哋備有英文餐牌,方便點菜。如果係食套餐嘅話,日文餐牌都有充足嘅漢字,大致都能夠分辨到唔同嘅套餐~午餐嘅時候一樣有供應炸豬扒等嘅美食,所以大家都可以諗諗嚟食晏~

新一年祝大家身體健康,萬事如意,今年繼續玩得開心啲!大家如果你有任何關於旅遊嘅問題,歡迎您留言或者Inbox問,我會盡力為您解疑難~傾偈交流下心得亦都可以㗎~

平田牧場 官網 (日文):www.hiraboku.info

營業時間:
午市時段:11:00 至 15:00 (截單時間:14:30)
晚市時段:17:00 至 23:00 (截單時間:22:00)
備注:週日及公眾假期的晚市打烊時間及截單時間分別提早1小時

地址:東京都千代田区丸の内2-7-2 KITTE 6F
交通:由JR 東京站丸之內南口步行約1分鐘即達。

0 個留言於 “[日本東京] 東京站尋味地圖-金華豚料理 平田牧場 極

發佈留言

發佈留言必須填寫的電子郵件地址不會公開。 必填欄位標示為 *