目的地介紹

[日本東京] 東京站尋味地圖-牛たんねぎし

東京站尋味地圖-牛たんねぎし

[日本東京] 東京站尋味地圖-前言
[日本東京] 東京站尋味地圖-POINT ET LIGNE
[日本東京] 東京站尋味地圖-Freminar 小岩井農場
[日本東京] 東京站尋味地圖-豚捨
[日本東京] 東京站尋味地圖-金華豚料理 平田牧場 極
[日本東京] 東京站尋味地圖-Sarabeth’s Tokyo
[日本東京] 東京站尋味地圖-牛たんねぎし

今日嚟到東京站尋味地圖系列嘅最後一集,當然要繼續介紹東京站附近嘅美食~上星期介紹嘅Sarabeth’s 就係位於八重洲口,今日要分享嘅餐廳都係位於八重洲口呢邊㗎,而且仲有成兩間分店!事不宜遲請今日嘅主角 - 牛たんねぎし 出場~

牛たんねぎし-八重洲地下街分店
牛たんねぎし - 八重洲地下街分店

牛たんねぎし始創於1981年嘅新宿,時至今日佢哋喺新宿都有好幾間分店㗎~據佢哋嘅介紹,佢哋留意到當時牛舌店以男性顧客為主,比較少女性嘅顧客,所以就諗到將牛舌,配搭山藥泥以及燕麥飯等等嘅健康食材!佢哋仲有供應其他嘅肉食,例如牛肉、豬肉同雞肉等等,就算一行人唔係全部都食牛舌,都可以嚟開餐~

佢哋對食材都幾有堅持,例如牛舌只係會用其中嘅34%,再將佢按照口感分類,亦都提供厚切薄切兩種選擇~至於山藥泥,雖然唔係個個都鍾意食,不過佢哋都無Hea做,指明係用出名嘅大和芋整,而且仲係由隔離嘅千葉縣運過嚟,夠晒新鮮~佢哋仲有喺網站介紹各種食材嘅功用,大家不妨了解下有無自己心儀嘅功效~

牛たんねぎし-燒牛舌
牛たんねぎし-燒牛舌

套餐除咗自選嘅牛舌之外,會包咗山藥泥、燕麥飯、牛尾湯同埋醃菜~唔夠飽仲可以添飯~除咗剛才提過嘅牛舌、豬肉、雞肉呢啲主餐牌嘅選擇之外,佢哋仲不時有期間限定嘅選擇!例如之前就做過燒牛扒,最近就做緊小牛肉牛舌~燒牛舌夠晒香,所以送飯一流,好快就可以食晒碗飯,唔使特登留餸都可以慢慢嘆~如果你問我,厚薄邊樣好食啲?除非你有特別喜好,我會索性叫你食晒兩款,因為兩款我都覺得好好食~既可以揀混合嘅款式,亦都可以同朋友叫唔同款,然後交換嚟試吓~

牛たんねぎし喺東京以及橫濱都有唔少分店,東京站周邊有兩間,喺新宿一帶更加有成9間分店添!所以大家可以按照自己嘅行程編排而揀一間方便嘅去食,最緊要順路就腳~加上佢哋嘅營業時間都比較長,去到夜晚十點十一點,所以大家玩完一日,夜咗返到東京都應該未閂門,可以嘆返個牛脷餐先返酒店休息!

嚟到呢度,尋味地圖系列要暫告一段落啦,希望好快又可以為大家介紹另一批嘅美食同餐廳~大家如果你有任何關於旅遊嘅問題,歡迎您留言或者Inbox問,我會盡力為您解疑難~傾偈交流下心得亦都可以㗎~

牛たんねぎし官網 (英文):www.negishi.co.jp

營業時間:
星期一至六:10:30 至 22:30 (截單時間:22:00)
星期日及公眾假期:10:30 至 22:00 (截單時間:21:30)

地址:東京都中央区八重洲2-1 八重洲地下2番通り
交通:由JR 東京站八重洲中央口地下出入口可直通至八重洲地下街,餐廳位於八重洲地下2番通右側。

0 個留言於 “[日本東京] 東京站尋味地圖-牛たんねぎし

發佈留言

發佈留言必須填寫的電子郵件地址不會公開。 必填欄位標示為 *