目的地介紹

[日本東京] 東京站尋味地圖-Sarabeth’s Tokyo

[日本東京] 東京站尋味地圖-Sarabeth's Tokyo

[日本東京] 東京站尋味地圖-前言
[日本東京] 東京站尋味地圖-POINT ET LIGNE
[日本東京] 東京站尋味地圖-Freminar 小岩井農場
[日本東京] 東京站尋味地圖-豚捨
[日本東京] 東京站尋味地圖-金華豚料理 平田牧場 極
[日本東京] 東京站尋味地圖-Sarabeth’s Tokyo
[日本東京] 東京站尋味地圖-牛たんねぎし

之前幾個禮拜連續為大家介紹咗四間唔同嘅餐廳,佢哋不約而同係位於東京站丸之內一側~既然應承得大家係介紹東京站附近嘅美食,咁就當然唔係淨得丸之內口嗰邊有美食,八重洲口附近都一樣有!今次就為大家介紹喺八重洲北口附近嘅 Sarabeth’s ~

Sarabeth’s 係美國紐約著名嘅餐廳之一,自1981年成立以嚟得到過唔少稱號㗎,例如係「紐約早餐女王」同「紐約 No.1 甜品舖」等等~佢哋喺紐約有10間分店,近年亦都進軍海外市場,喺日本、韓國、台灣以及阿聯酋都會搵到佢哋!喺日本,除咗東京嘅三間分店之外,去大阪或者名古屋都一樣可以搵佢嚟試試㗎~

今次因為住嘅酒店喺東京站附近,所以我去嘅係東京站分店。如果大家係住新宿或者品川一帶嘅,附近亦都有分店,唔一定要搭車過嚟呢邊先有~東京站呢間嘅位置好容易搵㗎咋,由八重洲北口行出嚟,過咗香格里拉酒店之後就喺正左手邊,馬路都唔使過~餐廳分為兩層,如果大家係早過嚟食早餐嘅話,就只有二樓嘅室內部分可以坐。晏啲過嚟食午餐或者嘆下午茶就可以上到去三樓嘅露天平台坐,又係另一番風味嚟~

Sarabeth's Tokyo-士多啤梨法式多士
Sarabeth’s Tokyo-士多啤梨法式多士

過咗9點半之後就會換成全日餐牌,有更加多嘅款式選擇~例如今次試嘅薑味朱古力格仔餅同埋 Buttermilk Pancakes 就係全日餐牌先有嘅~薑味朱古力格仔餅薑味十足之餘,朱古力味又唔會被蓋過或者太甜,平衡得啱啱好。作為配菜嘅焦糖橙片亦都做得非常出色,又甜又Juicy!佢哋仲不時有期間限定嘅產品,例如今次去食嘅時候就係士多啤梨法式多士啦~法式多士應該都係佢哋嘅皇牌之一嚟,因為驟眼睇都有唔少其他食客係嚟食法式多士!

Sarabeth's Tokyo-薑味朱古力格仔餅
Sarabeth’s Tokyo-薑味朱古力格仔餅
Sarabeth's Tokyo-Buttermilk Pancakes
Sarabeth’s Tokyo-Buttermilk Pancakes

餐牌本身就係日文及英文雙語對照,而且每一個選項都清楚列出佢哋嘅材料,所以點餐一啲難度都無。而且侍應們嘅英文亦都唔錯,溝通上相信唔會有咩問題~佢哋服務亦好周到,就算未齊人嘅時候點餐,佢哋都會等齊人先開始上菜上茶~雖然佢哋係「早餐名店」,不過我覺得大家幾點嚟食甜品都一樣咁適合,尤其係下午茶時段!下次有機會值得試試佢哋嘅晚餐,試完可以再同大家分享下~

下星期就係尋味地圖系列嘅最後一篇,希望大家繼續留意我哋嘅更新啦!大家如果你有任何關於旅遊嘅問題,歡迎您留言或者Inbox問,我會盡力為您解疑難~傾偈交流下心得亦都可以㗎~

Sarabeth’s 官網 (英文)sarabethsrestaurants.jp

營業時間:
二樓室內:
星期一至五:08:00 至 23:00
星期六:09:00 至 23:00
星期日及公眾假期:09:00 至 22:00

三樓平台:
星期一至六:11:00 至 23:00
星期日及公眾假期:11:00 至 18:00

地址:東京都千代田区丸の内1-8-2 鉃鋼ビルディング南館2・3F
交通:由JR 東京站八重洲北口步行約2分鐘即達。

0 個留言於 “[日本東京] 東京站尋味地圖-Sarabeth’s Tokyo

發佈留言

發佈留言必須填寫的電子郵件地址不會公開。 必填欄位標示為 *