目的地介紹

Flyerlog 2018年回顧

2018年係Flyerlog成立之後第一個完整嘅曆年,呢一年都真係去咗唔少旅行,所以先能夠每個星期日為大家介紹唔同嘅好去處~

開始回顧之前,我哋一齊睇睇數據先~過去一年喺Flyerlog介紹得最多嘅國家係日本,52個星期一共佔咗22篇!位居次席嘅就有新加坡,一共10篇。最多人睇嘅文章,反而唔係介紹呢兩個國家㗎喎~5月介紹曼谷中菜-文苑嘅嗰一篇文章係最受歡迎~如果你未睇過嘅話,就快啲睇睇啦~

重溫:[泰國曼谷] 美食推介 - Chef Man 文苑

接住落嚟就簡單咁回顧一下每個目的地~

今年我就分別去咗兩次台北、曼谷以及新加坡。台北近近哋快閃真係好方便,所以比起唔少人嚟講,我諗我一年去兩次絕對係小巫見大巫。我諗我要認真計劃吓去台灣其他部份玩,因為我舊年回顧已經講過希望去其他地方睇睇,但今年居然無做到~

寒舍艾麗酒店 精緻客房
寒舍艾麗酒店 精緻客房

至於曼谷同新加坡,我就覺得雙城遊零舍特別啦!除咗旅行團之外,相信好少會有人計劃一個咁樣嘅自由行行程。唔試過都唔知,原來咁樣配搭係咁好玩~雙城遊一次過滿足晒兩個願望,唔使左計右計,唔使編排兩次行程,一氣呵成。類似嘅配搭仲有好多,只要價錢同時間許可,我諗我都會繼續去雙城遊!

國泰航空 A350-1000
國泰航空 A350-1000 執飛 CX 717 曼谷-新加坡

日本同韓國方面,今年就重溫咗三個城市~東京同首爾都相隔咗好一段時間未再去過,再加上兩個都係大都會,有好多新事物俾我探索~福岡去嘅季節唔同咗,連帶行程亦都比賞楓嘅時候變咗好多,所以有啲地方一年四季都值得去下!下次要諗諗去多啲郊外地方,玩轉九州唔同嘅縣市~

輕井澤星野度假區 石之教堂
輕井澤星野度假區 石之教堂

2018年比起上一年再飛得密咗,而且越嚟越多地方一年去超過一次~新一年唔知有無機會去得遠啲,衝出亞洲呢?暫時已經計劃咗嘅旅行都係以亞洲區為主,我仲會繼續為大家介紹唔同地方嘅美食、景點同酒店㗎~希望大家繼續多多支持,一齊分享旅遊嘅樂趣~大家今年計劃咗去邊度玩吖?歡迎大家留言一齊交流下心得~

0 個留言於 “Flyerlog 2018年回顧

發表回覆

你的電郵地址並不會被公開。 必要欄位標記為 *