目的地介紹

[日本東京] 2019年上半年精選新酒店巡禮

東京 澀谷

嚟到2019年,東京新酒店嘅浪潮陸續有嚟,大大小小嘅品牌都不斷開酒店,等大家有更多嘅選擇!
今次為大家介紹十間上半年開幕嘅新酒店,清一色係日本本地品牌,當中包括最矚目嘅MUJI HOTEL~最頻密嘅時候,短短一星期就會有成3間酒店登場!論區分,銀座係最熱門嘅區分~
即刻睇睇2019年東京新酒店巡禮嘅上半年篇!

2018年東京精選新酒店巡禮:1月 至 3月 | 4月 至 6月 | 7月 至 12月
2019年東京精選新酒店巡禮:1月 至 6月 (你在此) | 7月 至 12月 (更新)
2020年東京精選新酒店巡禮:淺草、新宿、上野、東京各區 (更新)

2019年1月29日開業
萌木銀座首都酒店 Ginza Capital Hotel Moegi

由觀光巴士公司HATO營辦嘅銀座首都酒店,相隔一段非常長時間後終於有新棟落成~新酒店繼續開喺築地附近,取名「萌木」,訂嘅時候一定要認實佢個名!
酒店離鄰近嘅築地站以及新富町站都係1分鐘路程左右,去銀座買嘢方便,行落去築地場外市場覓食亦都唔使10分鐘~
酒店共有七款房型,雙人房、雙床房固然有,另外仲有三人房同四人房~最特別係有一款可以俾7位入住嘅相連房!無論係一家大細,抑或三五成群去玩,呢度應該總有一款房型適合~雙人房由258呎起,雙床房就由183呎起。
暫時見相連客房未有供應俾訂房網站,建議大家經官網查一查空房供應。

地址:東京都中央区築地3丁目3番1號
鄰近車站:東京Metro地鐵 日比谷線 築地站 及 有樂町線 新富町站
電話:+81 03-3543-8211
立即訂房:Agoda / Booking.com / 酒店官網
參考價錢:每晚約港幣710元(連稅)

2019年2月9日開業
西新宿大和ROYNET酒店 Daiwa Roynet Hotel Nishi-Shinjuku

舊年大和Roynet就喺「新築地」所在嘅豐州開新酒店,今年佢哋就返入市中心進駐西新宿~
縱使西新宿比起新宿嘅中心地帶無咁旺,住喺附近都一樣享受到交通便利嘅好處!酒店附近就已經有兩個地鐵站啦,加上搭一個站就返到入新宿站,喺呢個交通樞紐轉車去邊都好方便~
酒店共有七款房型,雙人房、雙床房以及三人房都有~高級些少亦都有可以住四位嘅套房~雙人房由226呎起,而雙床房就由258呎起。

地址:東京都新宿区西新宿6丁目12番39號
鄰近車站:東京Metro地鐵丸之內線 西新宿站 及 都營地鐵大江戶線 都廳前站
電話:+81 03-5909-8480
立即訂房:Agoda / Booking.com / 酒店官網
參考價錢:每晚約港幣1087元(連稅)

2019年2月11日開業
東京高輪都城市酒店 Miyako City Tokyo Takanawa

都酒店集團可能大家聽得多但係唔為意,佢哋喺日本同萬豪集團聯營唔少酒店,例如係東京喜來登都酒店以及大阪萬豪都酒店。根據呢啲往績,相信佢哋嘅質素一定有保證~
今次佢哋會喺高輪開新酒店。山手線來年開嘅新站「高輪Gateway」就會喺酒店前面~未開之前都無有怕,因為行返去大車站品川都唔算太遠,另外附近亦都有地鐵站。整體交通尚算方便。
酒店分為五款房型,分別有三種雙人房以及兩種雙床房。頂層10樓屬於貴賓樓層,位於貴賓樓層嘅房間會有咖啡機、Google Roomcast等額外嘅玩意㗎~雙人房由194呎起,而雙床房就由215呎起。

地址:東京都港区高輪3丁目19番17號
鄰近車站:JR 品川站 及 都營地鐵淺草線 泉岳寺站
電話:+81 03-3280-4111
立即訂房:Agoda / Booking.com / 酒店官網
參考價錢:每晚約港幣1357元(連稅)

2019年2月15日開業
東京濱町酒店 Hamacho Hotel Tokyo

濱町係日本橋附近嘅住宅區,所以呢一帶旺中帶靜,交通方便得嚟又唔會太熱鬧。今次要介紹嘅東京濱町酒店就集酒店及公寓於一身啦~
酒店附近有兩個地鐵站,分別去新宿同澀谷都唔使轉車。行遠些少嘅人形町站再多兩條地鐵線,而且仲有車去成田機場同羽田機場!
設計相信係呢間酒店嘅最大賣點,佢哋嘅特色房型與眾不同,而且酒店仲設有工藝廊展示唔同嘅工藝品添~
房型方面一共有八款,有雙人房、雙床房以及三人房~其中兩款係配有露台嘅特色房型。雙人房同雙床房嘅大細同樣由161呎起~

地址:東京都中央区日本橋浜町3丁目20番2號
鄰近車站:都營地鐵新宿線 浜町站 及 東京Metro地鐵 半藏門線 水天宮站
電話:容後補上
立即訂房:Agoda /Booking.com / 酒店官網
參考價錢:每晚約港幣748元(連稅)

2019年3月20日開業
皇家花園 Canvas 銀座 8 The Royal Park Canvas – Ginza 8

皇家花園酒店今年會喺銀座開新嘅Canvas系列酒店~Canvas系列設計比較時尚,比起原有品牌更加後生~而且酒店所在嘅位置非常方便,行去新橋同銀座都好近!
Canvas有啲似青年旅舍,因為佢設立咗個住客休息室,俾大家作為公共空間嚟交流,另外仲分別有音樂圖書館以及健身室。以四星酒店嚟講,設施算非常充足~
酒店將房間分為三個等級,然後再分成雙人房、雙床房。大房可以再加床比3人一房。
雙人房由187呎起,雙床房就由216呎起。

地址:東京都中央区銀座8丁目9番4号
鄰近車站:東京Metro地鐵銀座線、日比谷線 及 丸之內線 銀座站 及 JR 新橋站
電話:+81 03-6205-8010
立即訂房:Agoda / Booking.com / 酒店官網
參考價錢:每晚約港幣1526元(連稅)

2019年4月1日開業
東京秋葉原Resol酒店 Hotel Resol Akihabara

Resol系列位於東京嘅第三間酒店將會開喺秋葉原,之前嘅兩間分別位於東池袋以及町田,所以感覺上秋葉原呢一間交通最方便!酒店離開秋葉原站3分鐘左右~
酒店以紐約街頭為主題,行摩登路線~例如大堂採用磚牆,房內燈具就採用仿油燈等等~房間只係分為雙人房以及雙床房,一共兩款房型。當中雙人房佔絕大多數,雙床房就只有13間。
雙人房由151呎起,雙床房就由183呎起,兩款嘅面積都比較細~

地址:東京都千代田区神田須田町2丁目25番12號
鄰近車站:JR、東京Metro地鐵日比谷線 秋葉原站 及 都營地鐵新宿線 岩本町站
電話:+81 03-3258-9269
立即訂房:Agoda / Booking.com / 酒店官網
參考價錢:每晚約港幣1078元(連稅)

2019年4月3日開業
東京京橋雷姆酒店 remm Tokyo Kobashi

隸屬阪急阪神嘅雷姆酒店 remm,今年將會迎接佢哋喺東京嘅第四間酒店,選址東京站附近嘅京橋,繼續同大型車站做鄰居~
酒店離開東京站大約7分鐘左右,附近亦都分別有兩個地鐵站,去澀谷、上野、天空樹等都唔使轉車~佢係今次介紹嘅眾多酒店之中,唯一一間喺東京站附近~如果大家嘅行程集中喺市郊嘅話,相信呢間會最方便~
酒店一共提供三種主要房型,分別係單人房、雙人房以及雙床房。要留意單人房暫時未有提供俾訂房網站,有需要嘅話可以經酒店官網預訂~雙人房由194呎起,雙床房則由198呎起~

地址:東京都中央区京橋2丁目6番
鄰近車站:東京Metro地鐵銀座線 京橋站、都營地鐵淺草線 寶町站 及 JR 東京站
電話:+81 03-6685-4123
立即訂房:Agoda / Booking.com / 酒店官網
參考價錢:每晚約港幣1377元(連稅)

2019年4月4日開業
MUJI HOTEL GINZA

無印良品旗下嘅酒店終於登陸佢哋喺日本嘅主場~位於銀座全新嘅旗艦店內將會有MUJI HOTEL GINZA!由3月尾已經開始接受預訂啦~
酒店將會位於大廈6樓至10樓嘅部份,而下低嘅樓層就當然係無印旗艦店所在嘅層數啦!
全間酒店只有79間房,但就有成9種房型!每個房型都好唔同,有啲係普通嘅雙人房,有啲就係和式風格,仲有款係碌架床設計添~
雙人房由215呎起,雙床房就由366呎起,後者對比起其他酒店嚟講非常大~所以整體價錢亦都比較貴~

地址:東京都中央区銀座3丁目103番3、4、6、14、15、21、40號
鄰近車站:東京Metro地鐵銀座線、日比谷線 及 丸之內線 銀座站 及 JR 有樂町站
電話:+81 03-3538-6101
酒店網站:酒店官網
參考價錢:每晚約27,900日圓,折合約港幣1,963元

2019年4月11日開業
MIMARU東京八丁堀 MIMARU Tokyo Hatchobori

MIMARU係屬於Daiwa 大和集團嘅酒店品牌,同大和Roynet唔同,呢個品牌比較似公寓酒店,而且喺2018年先急速冒起,喺東京一年之內連續開咗5間~
嚟到2019年,佢哋會喺八丁堀開今年第一間酒店~八丁堀站本身有齊JR以及地鐵,而且東京站同銀座都好近,搭JR四圍去又得,搭地鐵玩轉東京都得~
至於房間方面,每間房都有小型廚房㗎~入門級嘅家庭房有兩張床以及一張碌架床,亦設有六人房,以及住八個人嘅相連房!除咗西式房之外,佢哋仲有和式客房添~
家庭房由409呎起,而最大嘅6人家庭房就有624呎大~

地址:東京都中央区日本橋茅場町3丁目
鄰近車站:
JR、東京Metro地鐵日比谷線 八丁堀站 及 東京Metro地鐵日比谷線、東西線 茅場町站
電話:+81 03-5444-3600
立即訂房:Agoda / Booking.com / 酒店官網
參考價錢:每晚約港幣1369元(連稅)

2019年5月1日開業
卡拉扎酒店Premier東京銀座 karaksa hotel premier Tokyo Ginza

karaksa集團今年由關西過到嚟關東,初次喺東京開酒店。第一間先落戶銀座,下半年會再多一間喺東京站八重洲。
佢哋嘅主要賣點係交通方便,毗鄰大車站新橋站,亦都喺銀座嘅步行距離之內~雖然酒店規模比較細,不過佢哋依然設有休息室俾大家閒坐~
酒店唔算多房,全間夾埋只有57間房,分別有雙人房同雙床房,14間仲係相連房~呢度比較多雙床房房型,適合大家分床瞓~雙人房有237呎,而雙床房就由291呎起~

地址:東京都港区新橋1丁目7番1號
鄰近車站:JR、東京Metro地鐵銀座線、都營地鐵淺草線、百合海鷗線 新橋站
電話:+81 03-5544-5800
立即訂房:Agoda / Booking.com / 酒店官網
參考價錢:每晚約港幣1430元(連稅)

今次介紹住咁多先,下次再為大家介紹另一啲新酒店,大家記得留意啦~

0 個留言於 “[日本東京] 2019年上半年精選新酒店巡禮

發佈留言

發佈留言必須填寫的電子郵件地址不會公開。 必填欄位標示為 *