目的地介紹

[日本大阪] 2019年上半年精選新酒店巡禮

大阪

之前先後為大家介紹過東京以及中部地區嘅新酒店,今次為大家介紹大阪2019年上半年嘅新酒店~
大阪單係上半年就已經有唔少新酒店預備登場,當中有連鎖集團第一次進駐大阪,亦都有大牌子開分店,都真係幾熱鬧㗎!
以下落嚟就為大家重點介紹七間今個上半年新開幕嘅大阪酒店啦!

重溫:
[日本大阪] 2018精選新酒店巡禮 (1月-3月)
[日本大阪] 2018下半年精選新酒店巡禮

2019年2月1日開業
海茵娜酒店大阪心齋橋 henn na hotel Osaka Shinsaibashi

henn na 酒店將會喺今年進軍關西地區,喺二月同三月會接連有兩間酒店開張,而且兩間都位於心齋橋添!先開幕嘅一間位置比較好,行3分鐘就到心齋橋站啦~
呢個品牌嘅酒店一直都好前衛,會引入唔同嘅科技嚟提供服務。例如心齋橋呢間就有機械人服務住客~指定房型仲有 LG 嘅智能衣櫃添!
酒店一共有5種房型,其中3款都係雙床房,餘下分別係雙人房以及無障礙房。根據官網資料,雙人房面積由168呎起,而雙床房面積就由177呎起。

地址:大阪府大阪市中央区南船場3丁目5番2号
鄰近車站:大阪地下鐵 御堂筋線、長堀鶴見綠地線 心齋橋站
電話:+81 050-5576-8350
立即訂房:Agoda / Booking.com / 酒店官網
參考價錢:每晚約港幣717元 (連稅)

2019年2月1日開業
大阪北濱最佳西方Plus Fino酒店 Best Western Plus Hotel Fino Osaka Kitahama

同日開幕嘅仲有位於北濱嘅Fino酒店~屬 Best Western 集團嘅佢,地點同樣交通方便,行1分鐘就到北濱地鐵站!呢間亦係大阪嘅第一間 Best Western Plus 嚟~
Best Western Plus 較一般嘅 Best Western 檔次略高,除咗喺酒店房嘅面積反映到出嚟,佢嘅設備亦都比較落本,例如床褥就標明係席夢思啦~設備完善之餘又隸屬於大集團旗下,相信質素有一定保證。
酒店客房分為5種房型,3種雙床房以及2種雙人房。至於雙人房同雙床房嘅面積就分別由199呎起同204呎起,相對同價位嘅酒店大少少。

地址:大阪府大阪市中央区今橋1丁目7番17号
鄰近車站:大阪地下鐵 堺筋線、京阪本線 北濱站
電話:+81 06-4706-8800
立即訂房:Agoda / Booking.com / 酒店官網
參考價錢:每晚約港幣648元 (連稅)

2019年3月14日開業
海茵娜酒店大阪西心齋橋 henna hotel Osaka Nishi-Shinsaibashi

第二間 henn na 酒店會喺3月登場,較遲開幕嘅呢間位於西心齋橋,距離心齋橋中心地帶遠少少,但就靠近難波站多啲,路線多去邊都方便~
呢間酒店都有過癮嘅搞作~佢哋嘅酒店前台係由恐龍機械人服務客人㗎!除咗呢個酒店系列,相信都喺第二度搵唔到類似嘅體驗!
酒店劃一提供雙床房,而其中一款雙床房可以加床成三人房~三種房型嘅間隔都頗為不同,有乾濕分離設計亦有房間唔係,建議大家多加留意。最細嘅雙床房由179呎起。

地址:大阪府大阪市中央区西心斎橋2丁目10番16號
鄰近車站:大阪地下鐵 御堂筋線、長堀鶴見綠地線 心齋橋站
電話: +81 050-5576-8355
立即訂房:Agoda / Booking.com / 酒店官網
參考價錢:每晚約港幣1062元 (連稅)

2019年4月25日開業
道頓堀SARASA酒店 SARASA HOTEL Dotonbori

接住落嚟要介紹嘅就係大阪本地薑 SARASA 酒店~先後喺難波、心齋橋以及新大阪開業嘅佢,今年將會有第四間酒店喺道頓堀附近開業!
SARASA 嘅酒店選址以交通方便為前提,所以道頓堀呢間亦都唔例外,離開地鐵站大約3分鐘路程左右~就算係行落去非常熱門嘅黑門市場都係10分鐘路程~
房型方面就最有特色!除咗設有一般嘅酒店房(洋室),佢哋仲有和洋室,最多可以俾6人一房~一般洋室就有齊雙人房、雙床房以及三人房。雙人房及雙床房面積分別由151呎及161呎起。

地址:大阪府大阪市中央区島之内2丁目9番6號
鄰近車站:地下鐵堺筋線、千日前線 日本橋站、近畿鐵道 近鐵日本橋站
電話:容後補上
立即訂房:Agoda / Booking.com / 酒店官網
參考價錢:每晚約港幣503元 (連稅)

2019年5月15日開業
大阪阪神酒店別館 Hotel Hanshin Osaka Annex

阪急阪神呢個品牌應該無人不曉㗎啦~嚟緊今年阪神酒店就會開別館,同樣位於福島站旁邊,離開大阪站只係1個站嘅距離。
酒店設計融合日本傳統花紋以及色調,主題圍繞住櫻花以及茜草。大堂嘅走馬燈仲係酒店嘅影相位嚟!佢哋唔單止設計美觀,客房設計亦都好實用~最基本嘅房型喺床下面有充足嘅置物空間,可以收埋行李喼唔使阻埞~
酒店一共提供五種房型,雙人房、雙床房以及三人房~三人房加埋梳化床之後可以住四個人添~雙人房以及雙床房嘅面積都係由161呎起。

地址:大阪府大阪市福島区福島5丁目
鄰近車站:JR 大阪環狀線 福島站、東西線 新福島站、阪神電鐵 福島站
電話:+81 06-6344-1662
立即訂房:Agoda / Booking.com / 酒店官網
參考價錢:每晚約港幣847元 (連稅)

2019年5月18日開業
the b 大阪御堂筋 the b Osaka Midosuji

the b系列酒店喺關西地區已經先後進駐京都同神戶,嚟到今年夏季就會集齊京阪神啦~事關佢哋將會喺大阪御堂筋開新酒店,行去本町站只係3分鐘左右咋!
酒店設計走摩登路線,用色亦都幾多元化㗎~the b 酒店設有免費嘅咖啡吧,無論係要朝頭早嚟個Good Morning,抑或夜晚提神開通頂都幫到手~
酒店除咗提供雙人房及雙床房外,另外仲有三人房。雙人房嘅面積由172呎起,而雙床房嘅面積就由205呎起。

地址:大阪府大阪市中央区北久宝寺町4丁目1番12號
鄰近車站:大阪地下鐵 御堂筋線、中央線 及 四橋線 本町站
電話:+81 06-6282-0111
立即訂房:Agoda / Booking.com / 酒店官網
參考價錢:每晚約港幣810元 (連稅)

2019年6月7日開業
皇家花園 Canvas 大阪北濱 The Royal Park Canvas Osaka Kitahama

另一間上半年登陸北濱嘅新酒店,有皇家花園 Canvas ~呢間將係皇家花園系列喺大阪嘅第一間酒店,亦係新品牌Canvas 嘅第三間酒店!酒店離開北濱站只係1分鐘路程咋~
Canvas 系列嘅酒店都設有 Canvas Lounge ,俾住客有個空間放鬆下~佢哋仲不時會有唔同嘅活動俾大家參加㗎~正如東京嘅Canvas一樣,我覺得佢幾似一間Hostel~
酒店以雙人房及雙床房兩種房型為主,另外仲設有套房~當中高級雙床房可以加床俾三人入住~面積方面,雙人房由151呎起,雙床房就偏大,由226呎起~

地址:大阪府大阪市中央区北浜1丁目9番8號
鄰近車站:大阪地下鐵 堺筋線、京阪本線 北濱站
電話:+81 06-6220-1111
立即訂房:Agoda / Booking.com / 酒店官網
參考價錢:每晚約港幣802元 (連稅)

今次先介紹住咁多先,下次再為大家介紹其他地區嘅新酒店,大家千祈唔好錯過~

0 個留言於 “[日本大阪] 2019年上半年精選新酒店巡禮

發表回覆

你的電郵地址並不會被公開。 必要欄位標記為 *