[日本長野] 輕井澤一日遊 星野度假區 及 王子購物廣場

重溫：
[日本東京] 三井花園酒店大手町 Mitsui Garden Hotel Otemachi
[日本新潟] 上越新幹線一日遊 新潟市内遊記
[日本茨城] 國營常陸海濱公園 (国営ひたち海浜公園)
[日本靜岡] 三島Skywalk大吊橋 (三島スカイウォーク)

新潟、茨城、靜岡…之前三個星期為大家介紹咗東京周邊三個唔同嘅縣，今個星期嚟到第四個縣－長野～長野地大物博，係日本第四大嘅一級行政區，要深入體驗都需要唔少時間，所以今次只係到訪咗喺北陸新幹線沿線嘅輕井澤～

輕井澤夏天嘅時候特別涼爽，所以係非常受歡迎嘅避暑勝地。唔單止係咁，秋冬嘅時候又可以分別嚟呢度睇紅葉同滑雪，一年四季都好適合去玩～輕井澤係北陸新幹線進入長野縣後嘅第一站，距離東京只係大約1個鐘頭15分鐘車程～班次頻密嘅時候最多一小時有三班，較疏落嘅話就一個鐘一班，都算方便排行程。

星野度假區相信係唔少人認為係輕井澤必到嘅景點之一，所以我當然亦都無錯過啦～度假區位處於山上，所以搭完新幹線要再轉巴士上山。巴士方面一共有兩個嘅選項，可以由輕井澤站直接搭西武巴士上山，收費單程460日圓。你亦都可以俾260日圓轉火車搭去中輕井澤站，接住搭度假區嘅免費穿梭巴士上山。兩者各有好處，前者簡單直接，後者就平啲。

大家喺度假區內去得最多嘅，我諗必定係嗰度嘅兩間教堂－輕井澤高原教堂，以及石之教堂啦～高原教堂係全日本第一座俾新娘著婚紗辦婚禮嘅西式教堂嚟，至今已經有近百年歷史！石之教堂就比較摩登，以結合大自然為主題～呢兩個教堂都係熱門嘅結婚場地，所以不時都會遇到有人舉辦婚禮～喺婚禮舉辦嘅時候就要稍微俾啲耐性等一等，等儀式結束之後先再參觀～

度假區裡頭仲有實惠嘅美食等緊大家㗎～喺接近巴士站嘅位置有一間叫「村民食堂」嘅餐廳，專做日式料理，唔少仲係採用返當地嘅材料添。千祈唔好諗住喺度假區入面食嘢會好貴，定食平均千幾日圓就有交易，而且仲要質素幾好，好好食！餐牌每季都會按照食材時令而更換，所以你會見每個Blog介紹嘅菜式唔同，不過大家嘅評價都幾一致咁推薦～

楡樹街小鎮亦係度假區內其中一個值得去嘅地方，雖然佔地唔大，但都有唔少Cafe同埋小店～呢排聖誕節仲會搖身一變成為聖誕小鎮，睇相都覺得幾靚！如果大家會去睇嘅話不妨遲啲留言同我哋分享下你影到嘅靚相㗎！

離開星野度假區之後，當然仲未係輕井澤一日遊嘅終結！我留咗少少時間，去埋輕井澤站側邊嘅王子購物廣場先上車返東京～佢無打正旗號叫自己做Outlet，不過裡頭舖頭就大多都係Outlet嚟！園區嘅範圍一啲都唔細，所以有好大片嘅戶外空間可以休息，呢一點同其他Outlet亦都好唔同。最令我印像深刻嘅，相信係廣場入面有專賣當地農產品嘅商店，縱使被云云嘅國際品牌包圍，依然堅持推廣當地特色～

親身去過輕井澤之後，確實了解到點解輕井澤會咁受遊客歡迎～我知道輕井澤仲有唔少地方值得去，所以之後一定會再去！我諗我都要諗下下次需唔需要喺當地留宿一晚啦！

如果您有任何關於旅遊或者行程上嘅問題，請隨便留言或者Inbox問，我會盡力解答㗎～

星野度假區官網：hoshino-area.jp/zh-tw
王子購物廣場官網：karuizawa-psp.jp/tw

交通：
由東京站乘搭北陸新幹線前往輕井澤站，需時約1小時15分鐘。
接駁星野度假區的穿梭巴士－由輕井澤站乘搭信濃鐵道線前往中輕井澤站，需時約4分鐘。