目的地介紹

[泰國曼谷] 曼谷洲際酒店 InterContinental Bangkok

曼谷洲際酒店 豪華雙人房

近排去咗曼谷玩幾日,不過今次去玩嘅日期唔知點解唔少酒店標價都好貴,上次介紹過嘅萬麗更加只係賣淨套房添咋~見對面洲際嘅價錢同平日差唔多,於是就決定試一試啦!今日為大家介紹同樣位於Ratchaprasong購物區內嘅-InterContinental Bangkok 曼谷洲際酒店~

洲際酒店嘅位置喺正大馬路,所以感覺上較萬麗更近BTS車站,不過就唔及得旁邊同一集團嘅Holiday Inn啦!InterContinental位於President Tower之內,除咗地下幾層係大堂、餐廳同宴會廳等設施之外,較低嘅樓層都係辦公室嚟,要去到中層以上先至係酒店房,變相房外景觀都算開揚~至於戶外泳池就設係頂層37樓,泳池設計比較傳統,唔係近年大受歡迎嘅無邊際泳池。

曼谷洲際酒店 豪華雙人房 景觀
曼谷洲際酒店 豪華雙人房 景觀

酒店一共有3款房型以及6款套房,入門級嘅豪華房已經有45平方米(484呎)大,對兩個人嚟講非常闊落!酒店仲有提供加床服務以及相連客房 (Connecting Rooms)~至於景觀方面,主要係兩個方向,一係望CentralWorld,一係望Central Embassy~今次間房就望CentralWorld嗰邊,高樓大廈唔算太多,而且本身間房所在嘅層數都唔低,所以景觀都唔錯~

曼谷洲際酒店 豪華雙人房 浴室
曼谷洲際酒店 豪華雙人房 浴室

曼谷洲際所行嘅路線比較傳統,喺房間設計方面就睇得最清楚~雲石浴室用返牆壁間隔,亦都無採用乾濕分離設計。好處當然係同朋友去旅行嘅時候唔會因為廁所太開放而尷尬,不過壞處就係無得兩人分別如廁同沖涼~電視同電話等設備嘅款式亦都比較舊,但就保養得好妥當!另外值得一讚嘅係佢哋依然有提供歡迎果盤~我仲係IHG嘅基本會員,所以我諗歡迎果盤應該人人都有~依家已經越嚟越少酒店會人人都送歡迎果盤啦~

曼谷InterContinental有好幾間餐廳,而Espresso就係供應自助早餐嘅餐廳~食物嘅款式好多元化,涵蓋西式、泰式、中式、日式等等~就算係生果、果汁等嘅選擇亦都非常多,所以我深信呢度嘅早餐應該滿足到任何人!若然你係住喺呢度嘅話,記得一定要預時間朝早落樓嘆個早餐先出發!

總括而言,曼谷洲際係一間面面俱圓嘅酒店。佢唔夠摩登酒店新潮,亦都唔夠奢華酒店咁豪,但就非常之沉穩,樣樣都係一線嘅水準。洲際兩個字始終都算係信心保證,既然價錢合理,選擇佢基本上都唔會錯嘅~順帶一提,龍蝦名店Burger and Lobster就係酒店旁邊嘅Gaysorn Village~由酒店行1分鐘就到,近過飛十幾個鐘好多,無理由唔試啦!

大家如果你有任何關於旅遊嘅問題,亦都歡迎您留言或者Inbox問㗎~

曼谷洲際酒店官網:bangkok.intercontinental.com
電話:+66 (0) 2656 0444

參考價錢:房價連自助早餐每晚6500泰銖 (連稅及服務費,折合約港幣1547元)

地址: 973 Phloen Chit Road, Lumpini, Pathum Wan, Bangkok 10330
交通:乘搭BTS 素坤逸線 (Sukhumvit Line) 前往Chit Lom站 (E1),出站後經6號出口旁邊的樓梯到地下即達。

0 個留言於 “[泰國曼谷] 曼谷洲際酒店 InterContinental Bangkok

發表回覆

你的電郵地址並不會被公開。 必要欄位標記為 *