目的地介紹

[台灣台北] 寒舍艾麗酒店 Humble House Taipei

寒舍艾麗酒店 精緻客房

快閃台北嘅時候,大家會考慮住邊度呢?我最近快閃台北嘅時候就選擇咗住喺信義一帶啦!信義區都有唔少靚酒店㗎,當中就有成3間國際大品牌~不過今次我就唔係選擇佢哋,而係選擇咗本地薑之一嘅寒舍艾麗酒店!今日一於同大家分享下今次嘅住宿體驗~

寒舍艾麗酒店喺信義區,附近就已經有新光三越、微風、統一時代等嘅百貨同商場,非常多姿多采,齋喺酒店附近行下都唔會悶~佢就距離捷運站大約3至5分鐘路程,行路面又得,經天橋都可以,所以落雨都唔怕。酒店喺2013年尾開幕,今年係佢哋五週年誌慶~不過酒店保養得幾好,唔係好睇得出佢嘅年紀㗎!

寒舍艾麗酒店
寒舍艾麗酒店

酒店分別提供4種房型以及4種套房,合共235間房~今次入住入門級嘅精緻客房,有26平方米(280呎)大,中規中矩。景觀方面要對上一級嘅「景隅精緻客房」先有台北101嘅景色,精緻客房就望返一般嘅市區景。慶幸附近唔少建築物例如新光三越都比較矮,再加上佢有基座商場令佢比較高,所以私隱度都唔錯。

寒舍艾麗酒店 精緻客房 浴室
寒舍艾麗酒店 精緻客房 浴室

暖色調嘅房真係好靚㗎,佈局簡單得嚟,配置非常充足。床頭同書枱各有2個插座同1個USB位,夠晒電話平板Notebook用~另一方面,房裡面仲有咖啡機~浴室相對上就遜色一啲,設計美觀但唔夠實用。洗手盆水龍頭嘅設計比較容易濺水。旁邊枱面空間亦都唔多,如果有唔少護膚品嘅話就應該不敷應用~另外浴缸亦都頗細~不過有彈都有讚,呢度係用免治馬桶,既方便又好用。

不得不提嘅,仲有佢哋嘅服務質素~退房嘅時候,一到大堂出𨋢就已經有職員上前幫手!其實入住嘅時候亦都有類似嘅情況,所以佢哋嘅職員係非常主動~辦緊手續嘅時候亦都一直同你傾吓偈,感覺上好親近~所以一間酒店除咗設施要好之外,職員嘅服務亦都好重要,因為好嘅職員真係加好多分㗎!

雖然寒舍艾麗嘅價位比普遍嘅台北酒店都高些少,不過地理位置優越,再加上服務周到,相信非常適合追求質素嘅朋友。順帶一提,旁邊嘅寒舍艾美酒店 (Le Méridien Taipei) 其實都係由寒舍集團營運嘅,兩個嘅中文名實在太相似,訂房嘅時候認住佢哋嘅英文名就無咁易搞錯~

大家如果你有任何關於旅遊嘅問題,亦都歡迎您留言或者Inbox問㗎~

寒舍艾麗酒店官網:www.humblehousehotels.com
電話:+886 2 6631 8000

參考價錢:房價連稅及服務費每晚港幣1700元

地址:台灣台北市信義區松高路18號
交通:乘搭台北捷運板南線前往市政府站,經3號出口出站後經由微風信義、新光三越旁的行人路可抵達松高路,過馬路後即達酒店。

0 個留言於 “[台灣台北] 寒舍艾麗酒店 Humble House Taipei

發表回覆

你的電郵地址並不會被公開。 必要欄位標記為 *