目的地介紹

[日本新潟] 上越新幹線一日遊 新潟市内遊記

舊齋藤家別邸

先前兩星期同大家分享過我嘅飛行體驗同住宿體驗,今個星期起開始慢慢同大家介紹下我今次旅程嘅所見所聞~今次先介紹車程最遠嘅新潟!講起新潟,唔知道大家最先諗到嘅,會唔會係新潟米呢?不過呢個地方除咗米之外,仲有好多其他嘢值得大家發掘㗎~

新潟位處於日本海沿岸,自古已經係重要嘅港口城市嚟。佢哋除咗農業發達之外,仲憑地理優勢發展漁業發展得唔錯㗎~市內景點都幾多元化,既有水族館同高樓等嘅近代建築,亦都有今次到訪嘅舊齋藤家別邸呢類型嘅古代建築,可以話老少咸宜~

上越新幹線連接住東京同新潟兩地,由東京站出發由頭搭到尾就係啦~車程大約係2個鐘,都唔算短途,所以大家可以買定便當上車食。新潟站有兩個主要出入口,分別係萬代口以及南口。萬代口一側出去會係市內比較旺嘅區域,如果大家選擇搭觀光巴士嘅話亦都係喺呢邊上車。若然大家時間充足,單靠步行已經可以去到好多地方,唔使俾巴士時間表限制住自己行程嘅步伐。

市中心被信濃川一分為二,分為車站所在嘅新城區,以及大部分景點所在嘅舊城區。不過大家又唔好趕住過河,因為過河前嘅萬代島都有嘢值得睇!萬代島上分別有縣立美術館以及高層展望台~我就無去到呢兩點,而係去佢哋旁邊嘅Pia萬代市場。市場內唔單止有海鮮,蔬果、肉類、酒,甚至係花都有!生食嘅又有,即場BBQ嘅又有,所以我就選擇咗喺呢度開餐啦~

Pia萬代市場 新潟產壽司
Pia萬代市場 新潟產壽司

食完嘢我就過河去到舊齋藤家別邸~入大宅嘅時候要除鞋參觀,只有庭園部分先可以著鞋。呢間屋最特別嘅地方並唔係建築物嘅本身,而係佢嘅庭園。設計理念在於將庭園融入於大宅之內,令到兩者相映成趣,亦即係封面張相裏面嘅靚景~庭園裡面有楓樹有松樹,所以秋季嘅時候亦都有紅葉睇㗎!今個星期啱啱好就係佢哋舉辦夜間賞楓嘅日子,若果大家有幸呢段時間去當地玩嘅話,就記得唔好錯過啦!

舊齋藤家別邸
舊齋藤家別邸

返轉頭行去車站嘅時候,順路途經新潟最旺嘅兩個商業區,喺呢度都搵到大型百貨公司同埋一啲地道嘅商店街㗎~雖然規模點都比唔上東京咁犀利,不過正所謂「行過路過,唔好錯過」,話唔定會有意想不到嘅發現呢~

新潟雖然係一個大城市,但我就覺得佢有小鎮嘅味道。就算無特定嘅行程只係隨便行,相信都唔會悶得去邊。而且當地人都好好人,喺搵路嘅時候會好主動咁上前幫手添!所以我對新潟嘅印象非常好,好值得再去過!

如果您有任何關於旅遊或者行程上嘅問題,請隨便留言或者Inbox問,我會盡力解答~

新潟觀光會議協會官網:www.nvcb.or.jp
Pia 萬代官網:www.bandai-nigiwai.jp
舊齋藤家別邸官網:saitouke.jp

交通:由東京站乘搭上越新幹線前往新潟站,需時約2小時。

0 個留言於 “[日本新潟] 上越新幹線一日遊 新潟市内遊記

發佈留言

發佈留言必須填寫的電子郵件地址不會公開。 必填欄位標示為 *