飛行報告

[飛行報告] 日本航空 JL735 東京成田-香港 B787-9 特選經濟艙

上星期嘅遊記同大家介紹過東京嘅酒店,今個星期同大家分享下我嘅飛行體驗~本身都無計劃同大家分享飛行報告,不過誤打誤撞遇著轉機型同Upgrade,咁就一於寫一寫~

今次去日本揀搭日本航空,主要因為佢嘅停留日數比較長,唔使限住7日就要走~而且都有好幾年無坐過,見佢有優惠就好爽快咁決定咗係佢。來回程本身都係兩艙等配置嘅波音787-8,客艙產品方面亦唔係最新嘅Sky Wider,所以就無計劃到要寫Blog做記錄。如是者就盡情玩,直至去到機場自助Check-in嘅時候Check-in唔到,呢一刻先突然間知道原來臨時改咗機型!事前真係一啲端倪都無~

執飛嘅客機由原先兩艙等配置嘅波音787-8,改成三艙等配置嘅波音787-9。因為經濟艙嘅座位數目減少咗,再加上呢班機本身無賣特選經濟艙嘅機票,所以經濟艙前排乘客嘅位變晒做PEY嘅位~至於有無乘客直升商務艙,咁就真係無從稽考~呢個突如其來嘅Upgrade,造就我第一次體驗日航嘅特選經濟艙!

日本航空 JL735 東京成田-香港
出發地:東京成田國際機場 (NRT)
目的地:香港國際機場 (HKG)
出發時間:18:10
抵達時間:22:30
飛行時間:5 小時 20 分鐘
機型:波音 787-9

雖然波音787-9比波音787-8大,不過因為客艙配置嘅原故,日航部份787-9嘅載客人數 787-8仲要少。回程呢架飛機設有195個座位,而去程嗰架反而設有206個座位,相信係因為特選經濟艙嘅密度比較低先會有呢個有趣嘅現象發生。日航平日只會喺香港來往東京羽田嘅航線售賣特選經濟艙,而成田線就無嘅~

日本航空 波音787-9 特選商務艙
日本航空 波音787-9 特選商務艙

特選經濟艙嘅座位理所當然地比較闊落,電視螢幕亦都大啲。不過座位就採用獨立靠背式設計Hard Shell,類近國泰嘅舊款經濟艙設計,後傾嘅時候係張凳滑向前,而唔係向後。配合埋腳踏之後,成個坐姿都好舒服~而且凳邊仲有盞閱讀燈,好梳乎咁睇書睇雜誌都OK~

餐點得一款無得揀,但係質素非常高,由得佢決定都無所謂!日航最近幾個月喺短途航線都係同著名和食店「賛否両論」嘅主廚合作,每個月上半部同下半部嘅餐牌都會輪替。豚丼即使係幾款之中無咁豪華嘅一款,不過都已經好好食~大家可以預先上日航官網睇定餐牌了解下食咩先,萬一真係唔啱食嘅話就記得訂定特別餐啦。

日本航空 JL735 東京成田-香港 晚餐
日本航空 JL735 東京成田-香港 晚餐

雖然今次特選經濟艙嘅乘客全部都係由經濟艙升上嚟,但就好明顯見到空姐應該係按照返特選經濟艙嘅標準提供服務。佢哋周不時就巡機艙睇大家有咩需要,亦都好頻密咁派飲品。去程完咗午餐時段之後,客艙就直接較暗咗,無再提供啲咩服務。當然亦有可能係因為時段唔同而安排唔同,但感覺上就有頗大嘅差別,顯得特選經濟艙特別優秀。

依家開始踏入北半球冬季,由日本飛返嚟香港嘅航班時間會比夏天慢,比去程更慢,大家可以坐耐啲,唔使咁快返到嚟香港~當中嘅主要原因係因為氣流。回程嘅時候客機逆風飛行,風阻比較大,所以會飛得慢好多。反之去程順風飛行,就好似推住架飛機去咁,所以飛行時間就短啲啦!

正如之前提過,日航今年先喺Skytrax攞到五星級評價。今次嘅體驗確實係五星級,無咩可以挑剔嘅地方~即使日航好多時比其他航空公司票價高少少,但我覺得佢值呢個價錢~遇著特價嘅話就更加唔使講啦!

如果大家有任何關於旅遊、行程等等嘅問題,歡迎您留言或者Inbox問㗎~

0 個留言於 “[飛行報告] 日本航空 JL735 東京成田-香港 B787-9 特選經濟艙

發表回覆

你的電郵地址並不會被公開。 必要欄位標記為 *