目的地介紹

[日本靜岡] 三島Skywalk大吊橋 (三島スカイウォーク)

三島Skywalk大吊橋

旅程重溫:
[日本東京] 三井花園酒店大手町 Mitsui Garden Hotel Otemachi
[日本新潟] 上越新幹線一日遊 新潟市内遊記
[日本茨城] 國營常陸海濱公園 (国営ひたち海浜公園)

今個禮拜繼續同大家介紹下關東嘅景點~上兩星期介紹嘅地方都喺海邊,今個星期我哋移入內陸,去到三島Skywalk大吊橋,望下山望下海~除咗喺橋上欣賞景色之外,大吊橋周邊有好多唔同嘅景點同活動,喺呢度可以消磨唔少時間~

由東京站出發搭東海道本線嘅特急踴子號,一般去到熱海站都要轉一次車先去到三島站,大概需時2小時15分鐘。有啲班次就唔使轉車,可以由東京一路搭到去三島。如果你係用東日本JR Pass嘅話,就要喺熱海出站買過張飛,因為三島站喺Pass嘅覆蓋範圍以外,唔能夠用Pass出閘。當然你都可以考慮搭東海道新幹線,貴就貴啲,不過唔使一粒鐘就到~

三島Skywalk大吊橋 - 三島站南口5號巴士站
三島Skywalk大吊橋 – 三島站南口5號巴士站

要去三島Skywalk大吊橋,需要喺三島站轉乘巴士上山,車程大約20分鐘左右。單程票價560日圓,所以買承惠900日圓嘅一日巴士券搭來回程會抵啲。大家落車嘅位置會係大吊橋嘅南邊,呢邊集中係商店以及餐廳。作為園區裡面嘅餐廳,呢度餐廳定價都唔算貴㗎~另外仲有啲攤檔售賣各類型農產品,即場開生果食都可以㗎,記得唔好喺橋上飲食就得啦~

入場之後可以先喺旁邊嘅觀景台欣賞下條橋先行上去,話晒三島Skywalk大吊橋係全日本最長嘅吊橋,全長一共400米,高就有70米~行上全日本最長嘅吊橋之後,可以分別望到全日本最高嘅富士山,以及全日本最深嘅駿河灣~當然要配合埋天氣,咁先可以睇得一清二楚,所以嚟之前記得做足功課睇睇天氣預報~

去到吊橋嘅北邊就有好多活動玩啦!呢度有高空滑索、攀石、Segway等等俾大家玩~想休閒的亦都可以賞花或者沿散步徑行下~呢度仲有個叫Flower Drop嘅活動,大家可以買粒花嘅種子,然後喺橋中間掉落去許願。載住啲種子嘅木塊,喺嚟自當年興建吊橋所砍伐嘅樹木,所以都算係物盡其用~

三島Skywalk大吊橋 - Sky Garden 入口
三島Skywalk大吊橋 – Sky Garden 入口

返轉頭去到南邊,搭車走之前建議大家去睇睇Sky Garden~雖然呢度係商店,不過裡面吊滿晒花,真係好靚㗎~入面嘅茶座仲可以用入場券附送嘅優惠券買雪糕食,咁就唔使喺戶外嗰間大排長龍!而且Sky Garden裡面賣嘅紀念品同停車場旁邊嘅禮品店又有啲唔同,唔趕撘巴士就行埋先走啦~

雖然轉車複雜少少,不過三島Skywalk大吊橋都係一個幾值得去嘅景點嚟~景色唔錯之餘,入場費亦都唔算貴。尤其係計劃會去靜岡一帶,例如箱根同伊豆玩嘅話,更加值得順路到訪!

如果您有任何關於旅遊或者行程上嘅問題,請隨便留言或者Inbox問,我會盡力解答㗎~

三島Skywalk大吊橋官網 (日文):mishima-skywalk.jp

開放時間:每日 09:00 至 17:00,開放時間可能因應活動或天氣而調整
入場費:成人 1000日圓、中學生 500日圓、小學生 200日圓

地址:静岡県三島市笹原新田313

交通:乘搭JR東海道本線特急踴子號列車由東京站前往熱海站,再轉乘普通列車前往三島站,需時約2小時15分鐘。於三島站南口5號巴士站可轉乘巴士前往三島Skywalk大吊橋。

0 個留言於 “[日本靜岡] 三島Skywalk大吊橋 (三島スカイウォーク)

發表回覆

你的電郵地址並不會被公開。 必要欄位標記為 *