目的地介紹

[日本茨城] 國營常陸海濱公園 (国営ひたち海浜公園)

國營常陸海濱公園

旅程重溫:
[日本東京] 三井花園酒店大手町 Mitsui Garden Hotel Otemachi
[日本新潟] 上越新幹線一日遊 新潟市内遊記

上星期同大家分享咗新潟一日遊嘅遊記,今個星期我哋就由日本海海邊,走過嚟太平洋海邊~今日要寫嘅係茨城縣嘅國營常陸海濱公園!呢度一年四季都有唔同嘅花睇,而且仲有各式各樣嘅活動可以玩,無論係大人定細路都有嘢啱睇或者啱玩~

由東京站出發,搭特急列車大約個半鐘車程就會去到最近公園嘅勝田站。由勝田站東口嘅巴士站再搭大約15分鐘巴士就會去到國營常陸海濱公園~上巴士前可以喺側邊嘅櫃檯買定套票,包咗巴士車費同公園嘅入場券㗎!除咗JR之外,由東京出發嘅大家仲可以選擇搭高速巴士。雖然唔使轉車,不過車程就長少少,大約要搭2個鐘。

國營常陸海濱公園
國營常陸海濱公園

公園分為兩大部分,中間被高速公路貫穿,來往兩邊就要靠天橋~如果大家俾錢搭園內嘅小火車,小火車亦都會駛過呢啲天橋~小火車會圍繞成個公園咁行,每一圈大概要行35分鐘。夾啱行程靠火車仔代步都唔錯。想親力親為啲嘅話,可以考慮踩單車~自己帶單車入場又得,喺公園裡面租車又得。

成個公園裡面最受歡迎嘅,相信非見晴之丘莫屬!呢度就係壯觀嘅掃帚草海所在地~夏天嚟就有另外一個花海睇,就係粉蝶花~見晴之丘嘅花海非常受歡迎㗎,所以喺春秋兩季開花嘅時候會特別多人,影出嚟嘅相唔單止會有花海,仲會有人海!不過公園面積夠晒大,就算人多都唔會逼人,只係影相嘅時候需要少少技巧同耐性。

見晴之丘旁邊仲有一大片樹林以及水仙花園。即使唔夠見晴之丘咁大,水仙花園嘅面積都唔細,同樣值得去睇下~公園嘅另一邊係大草原同遊樂場,有摩天輪可以搭。呢邊亦都有花睇,例如玫瑰就係喺呢邊啦~要行晒成個公園都要花唔少時間,尤其係鐘意睇花同影相嘅話,分分鐘嚟呢個公園已經係一日嘅行程啦!

國營常陸海濱公園 美食車
國營常陸海濱公園 美食車

既然要喺呢度遊覽大半日,午餐就自然要喺公園裡面解決啦。當然大家可以自備食物入園內享用,好似平日野餐咁自己帶嚟自己帶走啦。要方便嘅話公園裡面有一系列嘅美食車,熟食小食都有,一定食得飽!想好坐啲嘅話亦都有Cafe可以幫襯~

國營常陸海濱公園離東京車程唔算遠,地方大又多嘢睇,我覺得值得大家專程到訪~因為喺香港真係好難可以搵到一個咁大,咁多嘢睇嘅空間!識踩單車嘅話更加要考慮下嚟呢度玩添!

如果您有任何關於旅遊或者行程上嘅問題,請隨便留言或者Inbox問,我會盡力解答㗎~

國營常陸海濱公園官網:en.hitachikaihin.jp

開放時間:

3月 至 7月20日09:30〜17:00
7月21日 至 8月09:30〜18:00
9月 至 10月09:30〜17:00
11月 至 2月09:30〜16:30

備註:
逢星期一休息,若遇上公眾假期則順延至星期二休息。年末12月31日及新年1月1日休息。
每年二月首個星期二休息四天直至星期五,星期六重開。
特定期間不作例休,每日開園。

地址:茨城県ひたちなか市馬渡字大沼605-4

交通:乘搭JR常陸號、常磐號特急列車由東京站前往勝田站,需時約1小時20分鐘。於勝田站東口2號巴士站轉乘巴士前往國營常陸海濱公園,巴士會先後抵達公園西口及南口。


0 個留言於 “[日本茨城] 國營常陸海濱公園 (国営ひたち海浜公園)

發表回覆

你的電郵地址並不會被公開。 必要欄位標記為 *