[泰國曼谷] Central Embassy 美食推介 Som Tam Nua

今日繼續承接之前兩個星期嘅Blog，為大家介紹曼谷嘅美食～而今次要介紹嘅係一樣泰國嘅名菜－青木瓜沙律！青木瓜沙律相信大家都唔會陌生，而且因為青木瓜沙律嘅配料好多元化，所以就衍生出青木瓜沙律嘅專門店～數到最出名嘅一間，相信就係2010年嘅時候曾經被CNN特輯點名稱讚嘅Som Tam Nua啦！

Som Tam Nua喺BTS沿線有四間分店，除咗喺Siam Square對面嘅街舖之外，Siam Center、CentralWorld同埋Central Embassy都有分店，預着要等位嘅話，行多兩步路去另外一間反而可能唔使排隊。例如今次我就係由CentralWorld走咗過去Central Embassy嗰邊，順便行街之餘又可以避開人潮。

話明係青木瓜沙律專門店，Som Tam Nua嘅餐牌當然有唔同款式嘅青木瓜沙律揀，肉類、海鮮、配菜等都有得揀，各款嘅辣度亦都各有不同，照顧晒各類型嘅需要～今次試嘅呢款泰式香腸青木瓜沙律就算係少辣嘅一款，畢竟係第一次幫襯，唔敢冒險挑戰～嗜辣嘅話可以挑戰多啲辣椒仔嘅款式！

除咗沙律之外，餐廳仲有好多其他美食，例如涼拌豬潤、炸魚、燒豬頸肉等都好好食㗎～想食飽啲嘅話亦都有飯麵等可以叫。另外仲試咗個湯，不過就比較濃同鹹，唔係咁討好，相對上失望少少。至於價錢方面，以Central Embassy咁高級嘅商場嚟計，算幾平㗎，埋單四個人都係千四泰銖，人均消費100蚊有找，平平哋嘅一餐都好豐富，所以喺呢度推介俾大家～

如果你有任何關於旅遊嘅問題，歡迎您Inbox或者留言問，我會盡量幫助您解決疑難！

Central Embassy 分店營業時間：10:00 至 22:00
Central Embassy 分店電話：+66 2 160 5909

地址：5/F, Central Embassy, 57/2 Wireless Rd, Lumphini, Pathum Wan, Bangkok 10330
交通：乘搭BTS 素坤逸線 (Sukhumvit Line) 前往奔集站 (Phloen Chit)，出站後經5號出口天橋可即達Central Embassy。