台北下半年將會連續迎接5間屬於國際品牌嘅新酒店，可以話係近年最大規模嘅一次吖！
除咗萬豪 (Marriott) 繼續擴張之外，希爾頓 (Hilton) 將會事隔15年重返台灣，而洲際(IHG) 亦都將金普頓 (Kimpton) 呢個奢華品牌帶入台灣市場，絕對係星光熠熠～
各間酒店嘅選址都好方便，嚟緊計劃去台北玩嘅話就記得留意呢5間酒店，揀返間適合你嘅新酒店享受下啦～
2018年9月開業
台北士林萬麗酒店 Renaissance Taipei Shihlin Hotel
台灣嘅第一間萬麗酒店落戶士林區，比起另外幾間酒店都遠離市中心，而且背靠劍潭山，環境比較清靜～
秉承返萬麗一貫嘅概念－「趣意」、「地道」與「獨特」，所以呢間萬麗選擇透過中西合璧為主題，並且透過唔同嘅設計配合返鄰近嘅士林官邸。
酒店只得104間房，不過設施都好齊全，頂樓有無邊際泳池同空中花園，仲有成4間餐廳添。可以稍為抽一兩晚過嚟呢邊，足不出戶遠離下繁囂～最細嘅房由334呎起～
地址：台灣台北市士林區中山北路五段470巷8號
最鄰近車站：台北捷運淡水信義線－士林站
電話：+886 2 8861 2389
立即訂房：www.agoda.com / 酒店官網
參考價錢：每晚連稅約港幣1752元
2018年10月開業
台北新板希爾頓酒店 Hilton Taipei Sinban
比起中山區嘅DoubleTree，位於板橋區嘅希爾頓會較先開幕～板橋呢一兩年都先後有大型酒店進駐，而希爾頓係呢區嘅第一個國際牌子～
呢間希爾頓同舊年曾經介紹嘅「板橋凱撒大飯店」都屬於宏國集團屬下，所以兩者係喺同一大樓內，並且共享頂樓無邊際泳池等設施。
樓高31層嘅新板希爾頓一共有5款房型，當中仲設有三人房添～最細嘅房由430呎起，一啲都唔細～
地址：台灣新北市板橋區民權路88號
最鄰近車站：台北捷運板南線－板橋站 及 台鐵、高鐵－板橋車站
電話：+886 2 2958 3000
立即訂房：Expedia.com.hk / 酒店官網
參考價錢：每晚連稅約港幣1468元
預計2018年12月開業
台北(國泰)萬怡酒店 Courtyard Taipei Downtown
台北將會喺今年迎接佢哋嘅第二間萬怡酒店，而呢一間就位於中山區，近捷運行天宮站～酒店亦都好近高速公路，揀搭機場巴士都唔太怕塞車。
酒店由國泰商旅集團經營，亦都即係HOTEL COZZI同Madison兩個品牌嘅主人，今次係佢哋第一次同外國品牌合作～酒店一共有227間房，而14樓就有露天酒吧，可以望到101同基隆河㗎～
實際價錢同房嘅大細仲未公佈，據講平均房價會係5500新台幣左右，之後再為大家更新價錢資料。
地址：台灣台北市中山區民生東路三段6號
最鄰近車站：台北捷運中和新蘆線－行天宮站
電話：容後補上
網站：酒店官網
參考價錢：容後補上
預計2018年12月開業
台北中山逸林酒店 DoubleTree by Hilton Taipei Zhongshan
同樣喺今年加入中山區嘅，仲有屬於希爾頓集團嘅台北中山逸林酒店！位置更加方便，鄰近有兩條地鐵線嘅中山站～
酒店一共有106間房，規模相對上細啲。即使唔及正牌希爾頓高檔，呢間逸林酒店都唔遜色㗎，最細嘅房都有355呎，而且係有個露台㗎添！
DoubleTree仲有個獨有嘅傳統，每位住客Check-in嘅時候都會送上朱古力餅乾作為迎賓禮物，等你賓至如歸～酒店仲未開始接受預訂，不過初步定價估計介乎6000至7000新台幣。
地址：台灣台北市中山區中山北路一段123號
最鄰近車站：台北捷運 松山新店線 及 淡水信義線－中山站
電話: +886 2 6617 0320
網站：酒店官網
參考價錢：容後補上
預計2018年12月開業
金普頓大安酒店 Kimpton Da An Hotel
金普頓 (Kimpton) 係洲際旗下嘅豪華精品酒店，亞洲區嘅第一間金普頓會進駐台北，之後會再陸續喺峇里、東京、三亞同上海開業～
話明係精品酒店，設計當然唔會淨係得個「豪」字！酒店主要係行簡約時尚嘅路線，而台北呢間嘅主題就係復古以及白瓷。服務亦都係Kimpton其中一個強項，佢哋每朝早都有免費茶水供應，另外仲有得租借單車同埋參加唔同嘅晨早運動，感覺上有啲似民宿咁親近。
酒店一共有129間房以及套房，而當中最細嘅房就有大約344呎，市中心地段算唔錯～截稿呢刻仲未公佈價錢，但係相信呢間將會係介紹嘅五間酒店裡面，最貴嘅一間。
地址：台灣台北市大安區仁愛路四段27巷25號
最鄰近車站：台北捷運 板南線 及 文湖線－忠孝復興站
電話：+886 2 2779 2000
網站：酒店官網
參考價錢：容後補上
嚟緊我哋仲會繼續為大家介紹世界各地唔同嘅新酒店，大家記得千祈唔好錯過啦！
0 個留言於 “[台灣台北] 2018年精選新酒店巡禮”