目的地介紹

[新加坡] 濱海灣花園 華僑銀行空中走道 Gardens by the Bay OCBC Skyway

大概一年前曾經同大家介紹過新加坡嘅Gardens by the Bay 濱海灣花園,嗰陣時就淨係介紹過花園嘅兩大溫室,未有同大家講下喺戶外嘅Supertree 超級樹,以及超級樹上嘅OCBC Skyway 華僑銀行空中走道。今日就等我介紹埋下半部份,等大家完完全全咁認識呢個新加坡地標啦~

佔地過百公頃嘅濱海灣花園,雖然係起響填海用地之上,但由規劃到開幕,其實只係短短6至7年左右嘅時間,而建築開支更加只係大約60億港元。對比起好多其他唔同嘅建設,講緊下下都數以百億、千億,甚至係兆嘅時候,呢個價錢話抵都不為過。當大家親身去到現場感受呢個花園嘅時候,相信大家都會不約而同希望自己住緊嘅地方,都能夠喺市中心有一個咁樣嘅空間。

今日介紹嘅主角Supertree 超級樹,高度由25米到50米都有,而最高最大嘅一棵,上面仲設有餐廳酒吧添~而另外兩棵細少少嘅,就分別係華僑銀行空中走道嘅出入口,要行上呢條128米長嘅走道就係靠佢哋~另外其他細小啲嘅樹就無對外開放,不過喺燈光匯演嘅時候都會一齊相輝映!

空中走道嘅飛同入溫室嘅飛係分開賣嘅,前者收費8坡幣,而後者就要28坡幣。今次上網經Klook買飛就平啲,同埋一張門票就包晒咁多樣入場。唯一嘅壞處就係要先行去紅點設計博物館攞飛,要預多少少時間。淨係包兩個溫室入場嘅嗰張就比較方便,可以直接入場唔使再兌換。

聲樂燈光匯演每晚都會喺Supertree 超級樹度上演,而呢個時間前後就係空中走道最繁忙嘅時間,通常都要排隊上去,平均要等大概20至30分鐘。大家如果想喺高空近距離咁睇匯演嘅話,就記得預早少少排隊啦!不過走道亦都有限時,職員會不時呼籲大家唔好停留,所以大家唔好諗住晨早就上去霸位,咁係行唔通嘅~

匯演每個月嘅主題都唔同,九月嘅時候就係以中秋節賞月為主題,而今個月就係以音樂劇為主題,所以大家每次去到都會有唔同嘅表演睇,絕對唔係睇過一次就夠~就算唔係每一次都上走道睇,最好都抽時間過嚟花園呢邊睇下表演,接住再行返去濱海灣睇夜景!

講咗咁多,濱海灣花園要介紹嘅都差唔多介紹晒啦~希望去過嘅朋友加深咗對花園嘅認識,未去過嘅話去過之後都會同我一樣咁鐘意個花園~

如果你有任何關於旅遊嘅問題,歡迎您Inbox或者留言問,我會盡量幫助您解決疑難!

濱海灣花園官網:www.gardensbythebay.com.sg

開放時間:
溫室 (Cloud Forest and Flower Dome) 及 華僑銀行空中走道 (OCBC Skyway)
每日:09:00 至 21:00 (最後入場時間: 20:30,票務處於20:00截止售票)

戶外花園 (Outdoor Gardens)
每日:05:00 至 02:00 (翌日)

地址:18 Marina Gardens Drive, Singapore
交通:乘搭新加坡地鐵 MRT 環線或濱海市區線:前往海灣舫站 (Bayfront),經B出口可抵達Gardens by the Bay入口。

0 個留言於 “[新加坡] 濱海灣花園 華僑銀行空中走道 Gardens by the Bay OCBC Skyway

發佈留言

發佈留言必須填寫的電子郵件地址不會公開。 必填欄位標示為 *