飛行報告

[飛行報告] 國泰航空 CX717 曼谷-新加坡 A350-1000 經濟艙

國泰航空 A350-1000

相信大家最近都會喺Facebook見到國泰鋪天蓋地咁宣傳佢哋新嘅A350-1000客機,而我去玩嘅時候就啱啱好搭中咗呢款新機型,咁今日就一於同大家分享下我嘅體驗啦~

國泰喺亞洲區內有唔少第五航權嘅航線,除咗大家經常會接觸到台北往返日韓嘅航線之外,佢哋另外仲有曼谷往返新加坡嘅服務㗎!至於咩係第五航權呢?簡單嚟講就係航空公司營辦往返兩個第三方國家嘅路線,而乘客可以淨係單獨買呢一段嘅機票。香港仲有好多第五航權嘅航班㗎,最多就係飛曼谷,阿聯酋航空、皇家約旦航空、埃塞俄比亞航空等等都係!

我平日都會考慮轉機嘅,不過今次假期有限,但又想一次過去晒曼谷同新加坡,唯有選擇國泰搭三程直航慳返啲時間。訂機票嘅時候已經知道呢班機用最新嘅A350-1000,好好彩到飛嗰日都無臨時換機型,等我可以試新嘢!

國泰航空 CX717 曼谷-新加坡
出發地:曼谷蘇凡納布機場 (BKK)
目的地:新加坡樟宜機場 (SIN)
出發時間:11:50
抵達時間:15:25
飛行時間:2 小時 35 分鐘
機型:空中巴士 A350-1000XWB

A350-1000嘅客艙佈局同A350-900相當類似,同樣配備商務艙、特選經濟艙同經濟艙。分別在於A350-1000載客人數較多,以及採用再新款啲嘅經濟艙座位。頭枕唔再用布而改用皮,而置物空間亦都作出咗唔少嘅改動,所以兩款飛機不盡相同。

今次班機乘客人數唔多,粗略估計得百零人,所以唔少人都可以自己坐一排三個位~亦正因為呢個原因,我喺揀位嘅時候都揀到第一排嘅位,空間闊落啲可以伸長隻腳舒服啲。但係唔好彩地嗰日架飛機延誤,不過好在早發現,可以喺酒店食耐啲早餐先出發,到最後都遲咗成2個鐘先飛。

經濟艙嘅第一排座位,只有中間係設有嬰兒籃,左右兩旁就係優先座,會先安排俾有需要人士,無嘅話就所有乘客都可以揀~因為電視安裝咗喺牆上邊,離個位有啲遠,所以係全個經濟艙裡面少有有遙控用嘅位,唔駛下下伸手向前撳。

航程比預定飛行時間短大概半個鐘,啱啱好兩個鐘左右,比香港飛曼谷短少少,一樣都有熱餐供應,亦都有雪糕食。今次分別有雞肉飯同豬肉飯,兩者味道都唔錯。因為同平日普通嘅飛機餐實在太相類似,所以無特登影相同大家分享。

沿住馬來半島一路向南飛,好快就到新加坡啦~降落樟宜機場之後停泊喺4號客運大樓,同一時間只係得另外一班飛機到,所以好快就可以過關、攞行李、撇!由降落到離開客運大樓應該只係半個鐘內嘅事,非常有效率~

今次嘅體驗都唔錯,除咗唔準時之外都無啲咩特別挑剔,價錢合理嘅話始終都不失為一個選擇。今個星期寫完呢篇Blog之後,下星期就為大家介紹曼谷以及新加坡唔同嘅美食!如果大家有任何關於旅遊、行程等等嘅問題,歡迎您留言或者Inbox問㗎~

0 個留言於 “[飛行報告] 國泰航空 CX717 曼谷-新加坡 A350-1000 經濟艙

發佈留言

發佈留言必須填寫的電子郵件地址不會公開。 必填欄位標示為 *