目的地介紹

[新加坡] 新加坡安達仕酒店 Andaz Singapore

舊年曾經為大家介紹過四間新加坡新開張嘅酒店,年中嘅時候就住過喺Tanjong Pagar嘅Sofitel Singapore City Centre,最近我就有時間試多一間啦~佢就係價位相近,屬於Hyatt旗下嘅新加坡安達仕酒店 Andaz Singapore!今日同大家分享下我嘅體驗~

重溫:
[新加坡] 2017精選新酒店巡禮
[新加坡] 新加坡市中心索菲特酒店 Sofitel Singapore City Centre

節錄返當日嘅介紹,‘Andaz’ 一字喺印度語當中解作「個人風格」,所以Andaz系列嘅酒店比傳統五星酒店截然不同,跳出既定嘅框框。最明顯嘅相信係喺員工身上睇得到,因為佢哋並唔係著西裝等嘅正裝制服,而係一套非常休閒嘅制服,融入喺客人當中,驟眼睇可能分辨唔到佢哋出嚟添~

新加坡安達仕酒店
新加坡安達仕酒店 (圖片來源:酒店官網)

Andaz喺新加坡進駐喺DUO雙景坊內,25樓以下係辦公室,25樓以上就係酒店部分。大堂、泳池同好幾間餐廳都係設喺25樓,頂層39樓就有天台酒吧~酒店除咗可以透過2樓嘅入口落返下層入地鐵站之外,亦都可以喺B3層經商場通去地鐵站。不過後者嘅出入口比較隱蔽,好容易就會錯過,所以唔建議大家一去到就拖住行李去搵,反方向試一試先會好啲。

Andaz系列酒店致力融入當地文化,而喺新加坡嘅Andaz,佢嘅室內設計就係最佳證明。酒店嘅用色七彩繽紛,同酒店外阿拉伯區嘅店屋相映成趣。暖色系顏色同燈光就營造出溫暖嘅感覺,無論喺酒店邊個角落都咁放鬆。搭????上房之後,記得要睇睇中庭橫跨幾層嘅裝飾呀~睇下你可以認得幾多樣新加坡特色或者景點?

新加坡安達仕酒店 中庭裝飾
新加坡安達仕酒店 中庭裝飾

酒店將房分為5個類別,標準房有38平方米(409呎)大。不過因為雙景坊特別嘅形狀結構,所以每間房嘅間隔都唔太一樣㗎~房內設計就當然唔會有大分別,每間房都有個小玄關、Walk-in Closet、乾濕分離嘅洗手間以及浴室。外面嘅景觀望到阿拉伯街以及蘇丹回教堂,而高級少少嘅景觀房就可以望返Marina Bay 濱海灣嗰邊嘅摩天大廈或者向海嘅景色。

新加坡安達仕酒店 Walk-in Closet
新加坡安達仕酒店 Walk-in Closet

其中一個Andaz嘅特色,就係Mini Bar全包!除咗Nespresso咖啡同TWG茶包之外,雪櫃裡面嘅果汁汽水等通通免費,但係要留意返如果要額外添飲嘅話係要收費㗎,每日只添一次~全房裡面就只有書枱上面嘅酒類飲品要收錢。床邊每人有兩個USB位差電,房裡面亦都有唔少電掣位,唔帶拖板都夠用~廁所空間都幾大,不過標準房以至景觀房都無浴缸,要套房級別先有,鍾意浸浴嘅朋友就可能會有啲失望啦。

新加坡安達仕酒店 雙人房
新加坡安達仕酒店 雙人房

大家仲記得唔好錯過25樓大堂旁邊嘅Sunroom吖!呢度全日開放俾住客飲啡嘆茶,下晝5點到7點嘅時候仲係Happy Hour,會有酒類飲品供應~喺呢度同朋友傾下計,休息下都係唔錯嘅選擇嚟㗎~

Andaz當然唔可以話係實惠之選,但價錢同質素成正比,既有出色嘅硬件,亦有相當嘅服務。而且位置方便,交通四通八達之餘,附近亦有唔少嘅景點。希望住得好些少,行程又相對地悠閒啲嘅話,相信Andaz將會適合你~

大家如果你有任何關於旅遊嘅問題,亦都歡迎您留言或者Inbox問㗎~

新加坡安達仕酒店官網:singapore.andaz.hyatt.com

電話:+65 6408 1234
參考價錢:每晚 310 新加坡元 (連稅,折合約港幣1770元)

地址: 5 Fraser Street, Singapore 189354
交通:乘搭新加坡地鐵東西線 (East West Line) 或 濱海市區線 (Downtown Line) 前往武吉士站 (Bugis, EW12/DT14),出站後經E出口返回路面後,沿指示牌靠右行,再乘搭扶手電梯上一層即達升降機大堂。酒店大堂設於25樓。

0 個留言於 “[新加坡] 新加坡安達仕酒店 Andaz Singapore

發佈留言

發佈留言必須填寫的電子郵件地址不會公開。 必填欄位標示為 *