旅遊新聞

[航空消息] 燃油附加費再現 民航處2018年11月起取消規管

香港國際機場

噚日 (9月21號) 民航處公佈咗新嘅機票價格展示規定,以及燃油附加費嘅新安排,兩者都同各位息息相關,唔單止買機票會有影響,連帶換獎勵機票都一樣有!而呢兩項變動會喺11月1號起正式生效。

先睇機票價格展示規定,根據新規定,航空公司必須時刻都標示最終價格,亦即係連稅同所有附加費後嘅價錢,唔可以再以淨票價作招徠。呢項規定涵蓋航空公司嘅所有直銷途徑,例如航空公司網站等。換言之,喺新規定實施後,航空公司就唔可以再用「1蚊機票」等嚟做促銷~票價更加透明,咁乘客就可以更加容易咁去比較唔同航空公司嘅優惠。

你又會唔會掛住越捷 VietJet 嘅$0機票呢? 唔係買唔到,只係無咁過癮!

不過,因為規定係針對航空公司嘅直銷途徑,所以旅行社同旅遊網站並未列入規管範圍當中。如果旅遊網站依然可以用未連稅嘅價錢做推廣嘅話,大家嚟緊格價嘅時候就要小心比較啦!Flyerlog喺為大家介紹機票優惠嘅時候,一直都盡量顯示最終價格比大家睇。雖然呢個並唔係法例嘅要求,但作為一個提供資訊嘅平台,我哋相信所有嘢寫得清清楚楚先係最重要。

新規定下,好似額外行李收費同旅遊保險等嘅加購項目,航空公司須要喺乘客自己選擇後先可以將佢加入訂單之內,而唔可以自動為乘客加入呢啲收費項目。咁樣大家就唔使擔心唔記得Untick而俾多咗錢~

之但係燃油附加費嘅新安排就未必合乘客心水啦~民航處決定放寬對燃油附加費嘅規管,喺11月1號或之後發出嘅機票,航空公司可以自行決定係咪要收取燃油附加費。放寬規管後對普通機票價格嘅影響可能唔大,不過對獎勵機票嘅影響就大啦!

如果大家睇返仲有燃油附加費嘅時候啲機票價錢,同依家比,其實唔差得好多。咁係因為以前航空公司大多都不過係將燃油附加費從票價分拆出嚟標示,而依家就將兩者合二為一,最後嘅總數並無太大嘅分別。反而獎勵機票就唔同,里數部份不論票價高低都係收咁多分。依家分拆返燃油附加費出嚟,獎勵機票就變相要俾多啲錢啦~

新規定有辣有唔辣,至於對你嘅影響大唔大,相信都係取決於你用錢買機票,定用分換機票,你又點睇呢?

民航處新聞稿全文:www.info.gov.hk

封面圖片由Jimmy Chan (JimBear) 拍攝,並根據CC0 1.0許可協議於本篇文章內使用,特此鳴謝。

0 個留言於 “[航空消息] 燃油附加費再現 民航處2018年11月起取消規管

發佈留言

發佈留言必須填寫的電子郵件地址不會公開。 必填欄位標示為 *