[泰國曼谷] Phrom Phong 美食推介 榮泰豬肉粿條米粉湯

之前曾經為大家介紹過泰國嘅船麵，唔知大家覺得吸唔吸引呢？泰國仲有其他麵食都幾值得大家試㗎～今次要介紹嘅係豬肉麵！價錢當然唔能夠同船麵比，不過都好抵食，而且仲可以自己Mix and Match，鐘意咩湯咩麵都可以自己揀，夠晒自由！嚟到Phrom Phong 附近行街嘅話就順路過嚟試吓啦～

行到去目的地嘅時候，你會見到有兩間幾乎一模一樣嘅麵店，兩間都係「榮泰」。據講兩間係由兩兄弟各自分拆出嚟，價錢同款式都好似樣。上網睇大家嘅評價，主要都認為轉角位細舖比較好食，今次我就誤打誤撞入咗大舖，下次有機會再試吓細舖有咩分別～

大舖比較多位，所以接近2點左右去到嘅時候可以直行直入。餐牌有齊英文、簡體中文、日文同韓文，相信一定有起碼一種語言你會睇得明。落單可以用旁邊嘅紙仔寫清楚大細、粉麵、材料同湯底，接住成張交俾佢哋就可以啦，非常簡單易明！細碗就50泰銖，折合咗港紙大概12蚊左右～

今次試咗兩款湯底，分別係清湯同冬蔭湯。想食原味嘅話，就當然首選清湯啦！不過想香口啲，過下口癮嘅話，就試下冬蔭湯啦。雖然係用嚟做湯底，但佢都好香，唔係得個樣㗎。配料方面，魚蛋同豬肉碎都幾出色㗎，而且呢兩樣餸啱啱好可以雙拼，一碗就可以試晒兩樣～若然你鐘意食內臟嘅話，另外有款叫混合，呢個除咗有啲肉碎，有啲魚蛋之外，仲有內臟添㗎！

人多嘅話，可以考慮另外再嗌淨食，60泰銖 (HKD$15) 一碗都有返咁上下份量！飲品方面就大概10泰銖一杯 (HKD$2.4)，同樣算係平嘅～加上環境算企理，值得介紹俾大家試下～

如果你有任何關於旅遊嘅問題，歡迎您Inbox或者留言問，我會盡量幫助您解決疑難！

營業時間：08:30 至 16:30
參考消費：每碗小麵50泰銖

地址：10/3 Sukhumvit Soi 26Rd, Khlong Tan, Khlong Toei, Bangkok
交通：乘搭BTS 素坤逸線 (Sukhumvit Line) 前往澎蓬站 (Phrom Phong)，出站後經4號出口步行約5分將即達。