目的地介紹

[泰國曼谷] 曼谷拉差阿帕森萬麗酒店 Renaissance Bangkok Ratchaprasong Hotel

仲記得之前同大家介紹過曼谷嘅大倉新頤酒店。老實講我到依家都有啲掛住佢,不過佢定價的確唔平,所以今次再去曼谷就無揀中佢啦~同樣都係五星級嘅酒店,今次選擇試一試喺Chit Lom BTS站旁邊,隸屬萬豪集團嘅萬麗酒店~

曼谷嘅萬麗酒店喺拉差阿帕森購物區内,所以酒店名亦都加入咗呢一區嘅名字。整座大廈都係酒店嘅,低層係餐廳、宴會廳同會議廳,中高層係客房,接住頂層就係泳池、健身室、Spa同埋另一個會議廳。酒店同BTS車站中間隔咗一座商業中心,所以由車站出嚟之後,沿指示牌入咗商業中心之後要落返地下,再沿住外面行入去酒店。沿路都有瓦遮頭,所以落雨都唔太需要擔心。

曼谷拉差阿帕森萬麗酒店 大堂

酒店分別有3種房型以及5種套房,標準嘅豪華房有38平方米(409呎)大。比較好嘅係酒店有相連客房 (Connecting Rooms) ,尤其方便三五成群去旅行嘅朋友或者家庭。不過大家最好就預先同酒店嗰邊聯絡下,睇下佢哋能唔能夠安排得到,始終相連客房嘅數量都幾有限。視乎座向,景觀方面都頗大分別,一邊應該係望Grand Hyatt,另一邊就係望學校。學校嘅建築比較矮,所以景觀幾開揚,可以望返BTS車站同埋Central Chit Lom~

曼谷拉差阿帕森萬麗酒店 豪華房

房間設計以紫色為主題,亦都喺牆上同寫字檯旁邊設有泰式裝飾,的確可以話洋溢住泰國風情!廁所用落地玻璃做間隔,但唔需要擔心私隱,因為有電簾可以落落嚟,就算只係朋友都唔尷尬。酒店開業都有一段時間,所以未採用近年非常熱門嘅乾濕分離嘅設計,唔能夠分開去如廁同沖涼。廁所內備品比較少,常見嘅梳同鬚刨都唔見,唔肯定係無提供定抑或需要查詢先提供。

曼谷拉差阿帕森萬麗酒店 豪華房

酒店自助早餐喺閣樓嘅Flavors裡面供應,每日見到嘅款式都唔同,例如沙律嘅部分,泰式選項至少見過三款唔同嘅沙律,咸蛋沙律、魚仔沙律同蝦仁沙律。湯麵嘅湯底,以及粥亦都每日唔同。除咗白粥日日都有,另外仲有鴨肉粥同雞絲粥等每日輪換。廚師另外仲會拎住一盤盤精選嘅美食四圍推介俾大家,有鹹點有甜點,一試無妨~所以喺呢度食早餐,淨係食一日係唔夠㗎!

曼谷萬麗嘅地點方便,員工嘅服務亦都好好。仲記得Check-in嘅時候,即使酒店好Full,前台職員都好努力咁幫我將兩間房搬返埋同一層嘅隔離左右,唔使分開唔同層。以萬麗五星級嘅標準同呢個定價,性價比相當高,值得推介。

大家如果你有任何關於旅遊嘅問題,亦都歡迎您留言或者Inbox問㗎~

曼谷拉差阿帕森萬麗酒店官網:www.marriott.com
電話:+66-2-125-5000
參考價錢:連自助早餐每晚5300泰銖 (連稅,折合約港幣1267元)

地址: 518/8 Ploenchit Road, Bangkok 10330
交通:乘搭BTS 素坤逸線 (Sukhumvit Line) 前往Chit Lom站 (E1),出站後經2號出口進入Maneeya Centre 大廈內,直行至盡頭乘搭升降機到地下,再沿指示牌行約100米即達。

0 個留言於 “[泰國曼谷] 曼谷拉差阿帕森萬麗酒店 Renaissance Bangkok Ratchaprasong Hotel

發表回覆

你的電郵地址並不會被公開。 必要欄位標記為 *