東京嚟緊繼續有唔少新酒店登場，背景多元化得嚟，唔少仲係備受注目嘅新酒店嚟㗎添～
既有國際品牌初次登陸日本，亦都有百年老字號龍名館開新酒店，相信今次介紹嘅酒店裡面，總有一間會吸引到你！
事不宜遲即刻為大家介紹東京下半年新開業嘅酒店～
重溫：[日本東京] 2018精選新酒店巡禮
1月 至 3月 | 4月 至 6月
更新：[日本東京] 2019年上半年精選新酒店巡禮
2018年9月13日開業
三井花園酒店日本橋普米爾 Mitsui Garden Hotel Nihonbashi Premier
上半年喺東京開咗兩間酒店之後，三井集團下半年會再開多一間新酒店，而且呢間仲係屬於比較高級嘅Premier系列～
酒店直通地下鐵三越前站以及JR新日本橋站，去東京站只係1個站，搭地鐵去澀谷銀座等行街亦都唔使轉車，交通非常方便～
酒店大堂設喺9樓，同層另外仲設有大浴場以及加賀料理餐廳。酒店房最低都由10樓開始，去到15樓為止。房間唔算細，最細嘅舒適房都有215呎，雙床房更加係由280呎起添。酒店另外有三人房供應，同樣有280呎大。
地址：東京都中央區日本橋室町3丁目4番4號
鄰近車站：東京Metro地鐵銀座線、半藏門線 三越前站 及 JR 總武本線 新日本橋站
電話：+81 03-3270-1131
立即訂房：www.agoda.com / 酒店官網
參考價錢：每晚約港幣1503元(連稅)
2018年10月開業
東京田町鉑爾曼酒店 Pullman Tokyo Tamachi
Pullman第一次登陸日本，落戶山手線田町站旁嘅新發展項目。酒店設計現代得嚟，亦都揉合咗歌舞伎元素喺裡面，落足心思～
酒店連接田町站，可以透過山手線四圍去。山手線通晒東京市內各個大型車站，無論你要搭咩特急車或者新幹線，都一樣咁輕鬆。
話晒都係五星級酒店，所以酒店房一啲都唔細，雙床房有280呎，而雙人房更加有290呎，喺寸金尺土嘅大都會算唔話得了！頂層9樓係餐廳同天台酒吧，夜晚上去飲杯嘢睇景都唔錯㗎～
地址：東京都港區芝浦3丁目1番21號
鄰近車站：JR 山手線、京濱東北線 田町站 及 都營地鐵淺草線、三田線 三田站
電話：+81 03-6400-5855
立即訂房：www.booking.com / 酒店官網
參考價錢：每晚約港幣1655元(連稅)
2018年10月1日開業
東京有明大和 Roynet 酒店 Daiwa Roynet Hotel Tokyo Ariake
大和集團嘅酒店相信大家都唔陌生，今次佢哋揀喺東京灣開新酒店，離「新築地」豐州市場只係2個站～
酒店旁邊有兩個車站，國際展示場站所屬嘅臨海線，就有直通運行去新宿池袋等嘅列車，再唔係去返新橋站轉車亦都算方便～
雙人房226呎起，而雙床房就由301呎起，兩者以呢個價位嚟講都叫大，話晒每晚600蚊有找！想平得嚟又住得舒服少少嘅話值得考慮～
地址：東京都江東區有明3丁目7番3號
鄰近車站：臨海線 國際展示場站 及 百合海鷗線 有明站
電話: +81 03-3599-6180
立即訂房：www.agoda.com / 酒店官網
參考價錢：每晚約港幣556元(連稅)
2018年10月4日開業
格拉斯麗淺草酒店 Hotel Gracery Asakusa
格拉斯麗品牌喺東京嘅第四間酒店會開喺淺草附近。今次呢間無好似新宿嗰間咁有個恐龍地標，行相對上低調嘅和式風格～
淺草地區嘅交通都好四通八達，雖然無JR覆蓋，但就分別有銀座線同淺草線兩條地鐵線，另外仲有東武鐵道添。前者連接東京市內唔少大型車站，後者就接通日光、櫪木等近郊地方！
雙人房最細有194呎，雙床房就有258呎，對比今次另外介紹嘅幾間酒店都細啲。另外酒店可以直接預訂相鄰客房，唔使另外要求或者等安排。
地址：東京都台東區雷門2丁目10番2號
鄰近車站：東京Metro地鐵銀座線、都營地鐵淺草線 及 東武鐵道 淺草站
電話：+81 03-6632-8977
立即訂房：www.agoda.com / 酒店官網
參考價錢：每晚約港幣739元(連稅)
2018年11月1日開業
NOHGA HOTEL UENO
NOHGA係新晉品牌嚟，因為佢嘅不動產母公司只係第一次開酒店咋～酒店位於上野，離開上野站只係5分鐘路程，集京成電鐵、JR同地鐵於一身，去邊都咁方便！
酒店主打佢哋同社區嘅聯繫，房內備品、餐廳用具、咖啡等都採用當地品牌或職人嘅出品～佢哋仲有單車出租俾大家去探索四周，想貼地咁體驗當地文化嘅話，呢間酒店相信非常適合～
雙人房最細有194呎，而雙床房就由258呎起，雙床房亦都可以加床變成三人房㗎～
地址：東京都台東區東上野2丁目21番10號
鄰近車站：JR、東京Metro地鐵銀座線 及 日比谷線 上野站、京城電鐵 京城上野站
電話：+81 03-5816-0213
立即訂房：www.booking.com / 酒店官網
參考價錢：每晚約港幣1282元(連稅)
2018年12月1日開業
東京1899酒店 Hotel 1899 Tokyo
始創於1899年龍名館係當地嘅老字號，兩間龍名館酒店亦都叫好又叫座，網上評價非常好！今次佢哋就以自己嘅開業年份為品牌開間新酒店喺新橋附近～
酒店以「日本茶道」為主題，酒店設有茶室，而餐廳亦都理所當然地有同茶有關嘅食物同飲品。其餘地方嘅設計亦都同茶道有關㗎，例如房內嘅燈就做成茶筅咁啦！
雙人房有三款房型，最細一款有194呎，而雙床房就只有一款房型，355呎屬於全酒店中最大嘅房型，所以雙床房嘅價錢亦都相對上昂貴。
地址：東京都港區新橋6丁目4番1號
鄰近車站：都營地鐵三田線 御城門站 及 JR、東京Metro地鐵銀座線、都營地鐵淺草線 新橋站
電話：+81 03-3432-1899
立即訂房：www.agoda.com / 酒店官網
參考價錢：每晚約港幣914元(連稅)
今次介紹住咁多先，下次再為大家介紹另一啲新酒店，大家記得留意啦～
0 個留言於 “[日本東京] 2018下半年精選新酒店巡禮”