[日本福岡] 西鐵沿線一日遊 水都柳川遊記

上星期就同大家介紹過佐賀縣嘅武雄神社，今個星期介紹返福岡縣內嘅景點～仲記得之前曾經介紹過太宰府，其實搭西鐵除咗可以去到太宰府之外，亦都可以一日之內順便去埋有「水都」之稱嘅柳川㗎～今次一於就同大家介紹下風光如畫嘅柳川啦！

重溫遊記：[日本福岡] 太宰府天滿宮

柳川市位於福岡縣南部，市內運河系統相當發達，總長度有成930公里添～以前作為護城河嘅用途，依家就被用作旅遊觀光，另外亦都可以幫助防洪，絕對可以話係物盡其用呀！唔少人都會選擇嚟呢度遊船河，喺大大小小嘅河流之中穿梭。呢度嘅鰻魚飯亦都好出名㗎，不過請容許我下星期再為大家介紹，今日集中講咗柳川嘅景色先～

由西鐵位於天神嘅車站出發，搭特急列車嘅話大約50分鐘車程就會去到西鐵柳川站！如果大家買咗套票遊船河嘅話，呢度會有接駁巴士載大家去碼頭。不過我今次無遊船河，選擇四圍行睇下周邊嘅景色，自己決定路線！遊船河有遊船河嘅好處，行路觀光亦都有佢嘅好處，所以大家出發之前不妨比較下先再決定點遊柳川都未遲。

柳川顧名思義當然有唔少柳樹係河嘅兩側，隨風擺柳～而且河嘅兩側亦都有唔少其他花草襯托，喺呢度遊覽嘅時候絕對係好輕鬆自在，一啲都唔會覺得有壓力。兩旁好多建築物都係住宅，所以四周更加恬靜，有船經過嘅時候先偶然聽到熱鬧嘅聲音。唔同季節嚟睇到嘅景色都唔同，例如春天嚟嘅話可以睇到櫻花，所以任何時間嚟到都好適合！

呢度嘅物產都頗豐富㗎，主要出產稻米以及海苔，所以大家有幸嘅話可以見到大片稻米田，金黃色等候收割㗎～因為柳川自古一直都有出產稻米等農產品，所以佢哋亦都有祭典慶祝收成，大家如果咁啱係十月左右去嘅話就千祈唔好錯過啦～

柳川距離博多同天神等嘅旺區都唔算特別遠，而且景色迷人，非常推介俾大家嚟呢度睇睇！而且既然搭得車去太宰府，點解唔順便嚟埋呢度喎？今次分享到呢度為止啦，如果你有任何關於旅遊或者行程上嘅問題，請隨便留言或者Inbox問，我會盡力解答㗎～

日本國家旅遊局介紹柳川：welcome2japan.hk

交通：從西鐵福岡(天神)站乘搭天神大牟田線特急列車前往西鐵柳川站，約需時50分鐘。