作為關西地區嘅主要城市，大阪一直都深受大家歡迎～大阪喺2018下半年繼續有唔少新酒店登場，今次為大家帶嚟8間新開業嘅酒店！
新登場嘅酒店既有國際大品牌，亦都有當地品牌，開業時間由6月到11月都有，就算係紅葉季節亦都同樣有新酒店等你去住㗎～
一齊嚟睇睇嚟緊有啲咩新酒店登陸大阪啦！
重溫：[日本大阪] 2018精選新酒店巡禮 (1月-3月)
更新：[日本大阪] 2019年上半年精選新酒店巡禮
2018年6月6日開業
格蘭比亞大阪比偲奇酒店 Hotel Vischio Osaka by Granvia
位處於大阪站旁邊嘅比偲奇酒店，只係5分鐘路程咋，搭車四圍去都非常方便～而且對面就已經係梅田地標之一嘅Grand Front Osaka，行街食嘢都一應俱全！
酒店嘅大自然路線貫穿大堂同房間，大堂特意採用天窗引入天然光，走廊又擺有藝術品，房裡面嘅主色調亦都呼應返主題採用湖水綠色～酒店仲特別標明佢哋採用席夢思床褥，就係為咗希望你瞓得舒服！
雙人房最細194呎，而雙床房最細就有221呎，兩者以日本酒店嚟講都唔算細啦～
地址：大阪府大阪市北區芝田2丁目4番10號
鄰近車站：JR 大阪站、地下鐵御堂筋線 梅田站、阪神鐵道 梅田站、阪急電鐵 梅田站
電話：+81 06-7711-1111
立即訂房：Agoda / Booking.com / 酒店官網
參考價錢：每晚約港幣1022元 (連稅)
2018年8月1日開業
多美迎PREMIUM難波別館 Dormy Inn PREMIUM NAMBA ANNEX
Dormy Inn 喺難波再開多一間酒店，今次開嘅別館亦都有溫泉大浴場㗎！有興趣嘅朋友千祈唔好錯過！
別館同原本嗰間Dormy Inn只係爭咗一個街口，只係行多1分鐘路程，而步行去到日本橋站大約就7分鐘路程。至於要去心齋橋嘅話，一條大直路又係行7分鐘左右咋！
住得Dormy Inn 亦都當然唔可以錯過佢哋嘅宵夜啦！每晚9點到11點都有拉麵供應俾大家當宵夜，行完成日街返到酒店都繼續食～最細嘅雙人房有172呎，雙床房就去到248呎大。
地址：大阪府大阪市中央區東心齋橋2丁目1番6號
鄰近車站：地下鐵堺筋線、千日前線 日本橋站、近畿鐵道 近鐵日本橋站
電話: +81 06-6212-5489
立即訂房：Agoda / Booking.com / 酒店官網
參考價錢：每晚約港幣977元 (連稅)
2018年8月1日開業
奧卓雅居酒店及酒店公寓新大阪 Oakwood Hotel & Apartments Shin-Osaka
Oakwood喺世界各地都係以經營服務式住宅為主，嚟到大阪亦都係，而呢間就除咗服務式住宅亦都設有酒店部分，兩者兼備，任君選擇。
酒店選址位於新大阪站附近，大約需要步行15分鐘左右。雖然車站周邊不及大阪站旺，不過交通同樣四通八達，除咗地鐵同東海道本線之外，新幹線、去京都嘅HARUKA、去金澤嘅雷鳥等等都會停新大阪站。
酒店價錢間中會好實惠，見到最平每晚可以做到645蚊！雙人房同雙床房一樣都係194呎大。國際品牌再加上比較闊落嘅房，價錢相當經濟～
地址：大阪府大阪市淀川區西宮原1丁目7番31號
鄰近車站：JR 新大阪站、地下鐵御堂筋線 新大阪站
電話：+81 06-6399-3131
立即訂房：Agoda / Booking.com / 酒店官網
參考價錢：每晚約港幣645元 (連稅)
2018年8月27日開業
拉·弗里爾大阪蒙特利酒店 Hotel Monterey Le Frere Osaka
蒙特利酒店集團嘅版圖都唔細，單計大阪就已經三間酒店，今次喺大阪站附近開設佢哋市內第四間酒店，而且風格仲要嚟個大轉變，唔行西式路線～
酒店設計以和風為主軸，所以裝飾方面就用上傳統日本花紋同燈飾。暖色系加上間房夠光猛，而且間房偏大，住落應該好舒服～酒店三樓設有桑拿同大浴場，每晚都可以去放鬆下。
雙人房有248呎大，而雙床房亦都有237呎大。雙人房本身已經比好多其他酒店都要大，而且價錢仲只係七百幾蚊晚，超值！佢哋亦都有三人房，啱朋友同一家大細住～
地址：大阪府大阪市北區曾根崎新地1丁目12番8號
鄰近車站：JR 東西線 北新地站
電話：+81 06-7634-7557
立即訂房：Agoda / Booking.com / 酒店官網
參考價錢：每晚約港幣743元 (連稅)
2018年9月15日開業
三交旅館－大阪淀屋橋 Sanco Inn Osaka Yodoyabashi
三重交通旗下嘅旅館系列，喺東海地區都已經開咗好幾間，今次就第一次過到嚟關西地區嘅大阪開旅館！
旅館揀喺淀屋橋站同肥後橋站之間，去兩個站都係5分鐘路程左右，搭地鐵去大阪站或者難波站，又或者去心齋橋都唔使轉車。另外去京都亦都可以直接搭京阪本線，又係一次車都唔使轉～
佢嘅房比較細，雙人房得136呎，而雙床房就有177呎。房雖然唔大，但係佢哋整咗個枕頭Bar，有6款唔同枕頭俾你揀，等你就算喺細小嘅空間都可以好好休息！
地址：大阪府大阪市中央區高麗橋4丁目4番14號
鄰近車站：地下鐵御堂筋線 淀屋橋站、京阪電鐵 淀屋橋站
電話：+81 06-6228-3539
立即訂房：Agoda / Booking.com / 酒店官網
參考價錢：每晚約港幣743元 (連稅)
2018年10月1日開業
新大阪安住睦世酒店 hotel androoms Shin-Osaka
hotel androoms 將會喺大阪多開一間酒店，之前一間開喺本町，而今次呢間就開喺新大阪站附近，比較適合會跨縣市去玩嘅朋友～
酒店採用日式設計，唔單止用上唔少木材，就連燈都係用日本紙燈，望落舒服得嚟又好睇～酒店亦都設有大浴場，室內室外各有特色。酒店仲照顧埋大家宵夜，夜晚免費請大家食蕎麥麵～
房型有頗多唔同種類俾大家揀，單人、雙人、雙床、三人房都有，最大嘅雙床房開埋梳化床之後可以住成5個人添！標準雙人房有151呎大，而標準雙床房就係194呎大，前者相對一般酒店細小。
地址：大阪府大阪市淀川區西宮原1丁目4番28號
鄰近車站：JR 新大阪站、地下鐵御堂筋線 新大阪站
電話：+81 06-4807-5111
立即訂房：Agoda / Booking.com / 酒店官網
參考價錢：每晚約港幣609元 (連稅)
2018年10月11日開業
RELIEF心齋橋菲利斯酒店 Hotel Felice Shinsaibashi by Relief
行大約5分鐘就到心齋橋站，RELIEF心齋橋菲利斯酒店係今次介紹嘅咁多間酒店裡面最近心齋橋嘅一間，要行街購物嘅話相信係不二之選～
同樣地都係用和式設計，用上唔少木材作裝飾，不過房內用色就相對上低調柔和，同之前另外幾間酒店嘅風格都唔一樣。酒店設有大浴場，另外亦設有屋頂酒吧，夜晚返到酒店都可以Hea多陣先瞓～
房型主要分兩級－高級、豪華，同埋分雙人同雙床房。有啲房可以加床變成三人房，三人行都唔會有人單丁～
地址：大阪府大阪市中央區東心齋橋1丁目17番10號
鄰近車站：地下鐵御堂筋線、長堀鶴見綠地線 心齋橋站
電話：+81 06-6281-8000
立即訂房：Agoda / Booking.com / 酒店官網
參考價錢：每晚約港幣798元 (連稅)
2018年11月1日開業
宜必思大阪梅田酒店 Ibis Osaka Umeda
Ibis喺日本嘅版圖一直都偏細，而且現有嘅幾間酒店都唔係一落成就由佢哋辦酒店。今次開喺梅田嘅呢間Ibis，就係佢哋喺日本第一間新起嘅酒店啦！
Ibis貴為Accor集團旗下實惠型嘅酒店，一直都有唔少捧場客，質素相對上比較穩定。而且如果大家有儲分嘅習慣，住Accor酒店儲分都算容易，因為佢哋經常都有唔同推廣～
酒店分為兩種房型，就係雙人房同雙床房嘅分別，前者得161呎，而後者就有194呎。暫時較少見有優惠，相信近啲酒店開張或之後會較多特價！
地址：大阪府大阪市北區小松原町1丁目5番
鄰近車站：JR 大阪站、地下鐵谷町線 東梅田站、阪神鐵道 梅田站、阪急電鐵 梅田站
電話：+81 06-6211-3571
立即訂房：Booking.com / 酒店官網
參考價錢：每晚約港幣817元 (連稅)
今次介紹住咁多先，下次再為大家介紹另一啲新酒店，大家記得留意啦～
0 個留言於 “[日本大阪] 2018下半年精選新酒店巡禮”