目的地介紹

[日本佐賀] 武雄神社 大楠樹及夫婦檜樹

最近睇返過去一年寫過嘅Blog,先發現原來仲有唔少想介紹嘅地方未寫,唯有快啲補返為大家介紹!之前寫我嘅九州之旅嘅時候,主要都係集中寫博多美食,反而少介紹福岡周邊地方。所以今日要為大家介紹位於福岡縣旁邊,佐賀縣武雄市嘅武雄神社啦~

喺介紹武雄神社之前,先講多些少背景先~今次之所以會去武雄,主要都係因為買咗北九州嘅JR Pass,可以5日內任搭九州北部嘅JR火車,除咗有三日兩夜喺小倉嗰邊,另外去咗久留米,剩低嗰一日就決定嚟佐賀睇睇!喺博多換Pass嘅時候順便預先劃位,之後就可以安安樂樂搭火車四圍去啦~今次要去嘅武雄溫泉站都唔算細車站,所以除咗有特急車停站之外,亦都有綠色窗口,大家要重新訂飛劃位嘅話都可以喺度處理得到。

由博多出發,經過大概70分鐘車程之後,就會去到武雄溫泉站。由呢度再行大約20分鐘就係武雄神社啦!雖然去嗰日落住雨,不過都係選擇咗行路而無搭巴士,順便漫步睇吓武雄嘅四周。途中亦經過另一個武雄地標-武雄圖書館~淨係睇外觀都已經相當靚,相信內裡嘅裝潢亦都同樣咁好睇~下次必定要再抽時間入去裡面睇下!

神社內主要係睇兩棵大樹,分別係大楠樹同夫婦檜樹。根據神社嘅介紹,前者係全日本排第七大樹,樹齡已經超過3000年~但即使經過多年風吹雨大,大樹依然咁茂盛,強勁嘅生命力實在叫人讚嘆!樹下有個頗大嘅樹窿㗎,以前會開放俾遊客參觀,不過依家為咗保護呢棵獨一無二嘅大樹,遊客要行人止步,只可以喺外面欣賞,唔能夠近距離接觸。

至於另一個重點就係夫婦檜樹~兩棵檜樹無論係樹根定枝幹部分都連住一齊,關係極之親密,就好比夫妻一樣。喺神社內有賣鈴鐺俾大家掛上夫婦檜樹,唔同嘅顏色各自有唔同嘅意思。除咗可以祈求夫婦和睦相處之外,都可以祈求其他方面嘅嘢,例如係人際關係,又或者錢財方面嘅都可以!

武雄雖然係一個細小嘅城市,但係呢度同樣可以令你大開眼界。若果唔係得三日兩夜快閃福岡嘅話,非常推薦大家四出去唔同嘅縣市嚟個一日遊,遊覽下大城市以外嘅景色~除此之外,若果你有任何關於旅遊或者行程上嘅問題,請隨便留言或者Inbox問,我會盡力解答㗎~

武雄神社官網 (日文):takeo-jinjya.jp
地址:佐賀県武雄市武雄町大字武雄5335

交通:從博多站乘搭豪斯登堡特急前往武雄溫泉站,約需時70分鐘。由武雄溫泉站步行前往武雄神社約20分鐘路程,亦可選擇轉乘巴士。

0 個留言於 “[日本佐賀] 武雄神社 大楠樹及夫婦檜樹

發佈留言

發佈留言必須填寫的電子郵件地址不會公開。 必填欄位標示為 *