目的地介紹

[韓國首爾] 美食推介 - All Day Fresh Kitchen 세상의 모든 아침

介紹咗一啲首爾景點之後,今個星期又為大家介紹下首爾嘅美食先~前排就曾經介紹過大家喺明洞食韓國粥做早餐,而今次要介紹嘅,同樣適合大家去食早餐㗎~當然仲可以選擇去食Brunch甚至去食晚飯啦!想一邊睇住漢江靚景,一邊嘆美食,就記得Mark低呢度啦!

喺汝矣島嘅經聯會館大廈內,除咗大量辦公室之外,頂樓有成四間餐廳等緊大家發掘㗎~其中兩間係食韓國菜嘅,另外有一間米芝蓮餐廳,仲有今日要介紹嘅主角-All Day Fresh Kitchen~呢間餐廳其實都好出名,曾經有電視劇、MV等喺呢度取景,亦都試過有明星喺呢度宴客,所以即使位置比較隱蔽,都唔能夠當係啲咩隱世名店,要做好等位嘅準備!

All Day Fresh Kitchen既賣西餐,亦都係一間咖啡吧,所以就算你只係想搵個地方食件餅,嘆杯啡都可以嚟呢度~而且西餐嘅款式都唔算少,Brunch、意粉、意大利飯、漢堡包甚至係韓牛牛扒都有得叫!呢度另外仲有套餐可以揀~整體價位相對其他餐廳唔算低,人均消費大約港幣200蚊左右。大家可以喺餐廳嘅官網睇睇餐牌先~

今次兩個人夾埋分別嗌咗葡萄柚魷魚沙律、藍蟹意粉同埋兩杯飲品,人均消費就啱啱好200蚊左右啦。叫完嘢食之後會先上法包,接住先再上菜。兩度菜嘅份量都唔細,所以兩個人叫兩款嚟Share都唔怕唔飽。藍蟹意粉非常好食,即使佢係其中一款最貴嘅意粉亦都物有所值,因為真係好食嘛~個意粉應該係其中一道主打嚟,因為餐牌圖文並茂嘅一版係呢個藍蟹意粉排頭位㗎~講起都真係有啲念念不忘~

唔知道大家有無嚟過Skyfarm呢度食嘢呢?如果你曾經嚟過All Day Fresh Kitchen,或者試過喺嗰度嘅另外三間餐廳都不妨留言分享下你嘅食評同大家一齊集思廣益㗎!另外,如果你有任何關於旅遊嘅問題,歡迎您Inbox我哋或者留言問,我會盡我全力解答你有嘅疑難㗎~

Skyfarm 官網 (韓文):www.theskyfarm.co.kr
All Day Fresh Kitchen 營業時間:每日 09:00 至 15:00 及 17:00 至 23:00

地址:서울특별시영등포구여의대로 24 FKI타워 50층 (首爾特別市永登浦區汝矣大路 24號 全經聯會館大廈50樓)
交通:乘搭首爾地鐵5號線9號線前往汝矣島站 (526/915),經2號出口出站,前行至十字路口轉右前行,全程約需5分鐘。

0 個留言於 “[韓國首爾] 美食推介 - All Day Fresh Kitchen 세상의 모든 아침

發佈留言

發佈留言必須填寫的電子郵件地址不會公開。 必填欄位標示為 *