[韓國首爾] 美食推介 － 朝鮮火爐烤肉 조선화로구이

今個星期繼續寫下首爾有咩好食～不過今次要介紹嘅就唔係早餐之選，而係燒肉！去到韓國就當然唔可以錯過好食嘅燒肉啦，尤其係韓牛～所以為大家推介嘅朝鮮火爐烤肉，正正就係韓牛專賣店！佢嘅位置仲好方便添～快啲記低呢度做你行程嘅一部分！

喺介紹餐廳前，先介紹下韓牛嘅背景。韓牛係由歐洲牛以及韓國牛混血而成嘅牛種，按照佢哋嘅質素可以劃分為5個等級，分別係1++、1+、1、2同埋3，當中1++係最優質，價錢亦都最貴！韓牛喺韓國各地都有養殖，不過為數並唔多，所以主要都係集中供應內需。韓牛較少會出口，例如出口韓牛到香港都只不過係最近呢兩三年嘅事。

朝鮮火爐烤肉位處於弘大附近，由地鐵站行過去非常方便～呢間燒肉店喺當地都幾受歡迎，唔單止有劇集去到取景，亦都有唔少明星去食，所以大家話唔定會係嗰度搵到你偶像嘅簽名㗎～餐牌有齊韓文、英文、日文同中文，即使言語不通亦都無問題，看圖識字就可以啦～一系列嘅配菜喺落單後好快就會送上，而且呢度不時會送大醬湯添！

今次一共叫咗三份肉，分別有牛隔膜肉、牛排肉同埋五花腩。雖然呢度主打韓牛，不過亦都有供應韓國豬，所以都同樣食得過。餐廳嘅環境比較地道，然而價位並唔算平，之但係肉嘅質素並無對唔住個價錢，所以價錢其實都好公道。每款牛平均20000至40000韓圜左右，豬就大概萬幾有交易。而且阿姐服務都好周到，不時都會行去唔同枱打點下，幫你反下肉諸如此類～要試下地道嘅燒烤，嚟呢度會係一個相當好嘅選擇，唔會貴到離晒大譜，亦都唔怕無啖好食，最怕你掛住啲名貴嘅韓牛啫～

分享過邪惡既韓牛燒烤之後有無令你流晒口水呢？如果你都有燒肉好去處嘅話，歡迎你喺下低留言同大家分享下～另外，如果你有任何關於旅遊嘅問題，歡迎您Inbox我哋或者留言問，我會盡我全力解答你有嘅疑難㗎～

營業時間：每日 11:30 至 15:30 及 17:30 至 03:00
電話號碼：+82 2-3143-1300
地址：서울특별시마포구서교동351-18 (首爾特別市麻浦區西橋洞351-18)
交通：乘搭首爾地鐵2號線前往弘大入口站 (239)，經1號出口出站，前行至十字路口，於渣打銀行轉右前行即達。