目的地介紹

[韓國首爾] 建大貨櫃屋 COMMON GROUND

最近除咗去新加坡之外,另外走咗一轉首爾,見到連載咗幾個星期新加坡之旅,今個星期寫下首爾先~今次去同上次去嘅行程都幾大分別,所以好多地方都係第一次去咋!例如今日要介紹嘅COMMON GROUND相信唔少人都聽過,呢個由貨櫃屋組成嘅商場都開咗3年有多了~

COMMON GROUND係韓國第一個由貨櫃屋組成嘅商場,喺2015年上旬開幕嘅。由二百幾個貨櫃組合而成,令到佢成為世界上其中一個最大型嘅貨櫃屋商場~呢度主要分為兩區,分別係「STREET MARKET」以及「MARKET HALL」,前者以女裝為主,後者就較多男裝。戶外嘅中央廣場定期有市集舉行,另外仲恆常有美食車添!

喺COMMON GROUND開舖嘅,大多都係新晉牌子,或者分店唔多嘅小Botique,喺呢度搵到嘅,第二度未必咁容易揾得返~除咗衫褲之外,飾物、精品,甚至係雜貨都有,慢慢行慢慢睇話唔定搵到寶都唔奇!至於頂層三樓就係餐廳集中地,行到攰上去有好多選擇可以醫肚~

有無話要行邊區先方便啲呀?其實都無嘅,因為「STREET MARKET」同埋「MARKET HALL」兩座主建築有天橋相通,要穿梭兩座之間話咁易。要注意嘅反而係呢度無扶手電梯,上落唔同樓層主要係靠行樓梯。雖然係貨櫃屋,不過裡面都有????搭,無論你行動不便,抑或抽住大包細包唔方便落樓梯,呢度都招呼周到。

今日介紹住COMMON GROUND先,嚟緊再為大家介紹其他景點同美食~如果你都去過COMMON GROUND嘅話,歡迎你留言同大家分享下你嘅經歷或者靚相㗎!除此之外,若果你有任何關於旅遊或者行程上嘅問題,請隨便留言或者Inbox問,我會盡力解答㗎~

COMMON GROUND官網 (英文):www.common-ground.co.kr
營業時間:11:00 至 22:00 (部份餐廳營業至00:00)

地址:서울특별시 광진구 아차산로 200 (首爾特別市廣津區峨嵯山路200)
交通:乘搭首爾地鐵2號線7號線前往建大入口站 (212/727),經6號出口前行數百米即達。

0 個留言於 “[韓國首爾] 建大貨櫃屋 COMMON GROUND

發表回覆

你的電郵地址並不會被公開。 必要欄位標記為 *